تۇرمىستىق زورلىق-زومبىلىقتى باستان كەشكەن تانىمال پروديۋسەر بايان ەسەنتايەۆا بەيىمدەلۋ ورتالىقتارىنا ءوزى جۇگىنۋى كەرەك بولعان. بۇل تۋرالى ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا باسقارۋشىسىنىڭ ورىنباسارى ەلەنا تاراسەنكو حابارلادى. بۇل تۋرالى  Qamshy.kz inform.kz سىلتەمە جاساپ حابارلايدى.

ەستەرىڭىزگە سالا كەتسەك، 10 ماۋسىمدا ورىن العان وقيعا بويىنشا بەرگەن العاشقى سۇحباتىندا بايان ەسەنتايەۆا ايەلدەر ۇيىمىنىڭ بىردە-بىرى حابارلاسىپ، كومەك قولىن سوزباعانىن ايتىپ، مۇنداي ورتالىقتاردىڭ ءالسىز جۇمىسىنا مەڭزەدى. وسى سەبەپتى پروديۋسەر ايەلدەر تۇرمىستىق زورلىق-زومبىلىقتان قورعاۋ ۇيىمىن قۇرماق.

«ارينە، مۇنداي جاعدايدا ۇيىم ەمەس، ءزابىر كورگەن ايەلدىڭ ءوزى حابارلاسۋى كەرەك. ءبىراق اتالعان ۇيىمداردىڭ بىزدە از ەكەنىن مويىندايمىن.  سوڭعى جىلدارى جاعداي ايتارلىقتاي تۇزەلىپ كەلەدى. دەسە دە ول ازدىق ەتەدى. ءزابىر كورگەن ادام، ول ايەل عانا ەمەس، بالا دا، ەر-ازامات تا بولۋى مۇمكىن، بەيىمدەلۋ ورتالىقتارىنا جۇگىنگەندە، ولار جەتكىلىكتى دەڭگەيدە قىزمەت اتقارمايدى (…) ءبىراق مۇندا ءوز ۇستانىمىڭدى قورعاۋدان قورىقپاۋ قاجەت. سوندىقتان ۇلتتىق كوميسسيا بۇل سالادا جۇمىس جاسايتىن قوعامدىق بىرلەستىكتەردى دە، مەملەكەتتىك قۇرىلىمداردى دا قولدايدى. مەنىڭ ويىمشا، بىزگە بۇل جۇمىستى جالعاستىرۋ اۋاداي قاجەت»، – دەيدى ەلەنا تاراسەنكو.

دەنساۋلىق ساقتاۋ جانە الەۋمەتتىك قورعاۋ ۆيسە-مينيسترى سۆەتلانا جاقىپوۆانىڭ مالىمەتى بويىنشا، مەملەكەتتە 32 داعدارىس ورتالىعى، 17 باسپانا بار. بىلتىرعى جىل بويىنشا مەملەكەتتىك ۇيىمدارعا 4،6 مىڭ ايەل جۇگىنگەن. ال مەملەكەتتىك ەمەس ۇيىمداردان كومەك سۇراعان ايەلدەر سانى 11 مىڭدى قۇرايدى.

سونىمەن قاتار ەلەنا تارسەنكو ايەلدەردى تۇرمىستىق زورلىق-زومبىلىقتان قورعايتىن زاڭ نورمالارىنىڭ باسىم كوپشىلىگى قازاقستاندا جۇمىس ىستەمەيتىنىن اتاپ ءوتتى. سول سەبەپتى بۇل سالاعا قاتىستى زاڭناما قازاقستان رەسپۋبليكاسىنداعى وتباسىلىق جانە گەندەرلىك ساياسات تۇجىرىمداما اياسىندا 2030 جىلعا دەيىن جەتىلدىرىلە تۇسپەك. تۇجىرىمداما جوباسى بۇگىن استانادا وتكەن دوڭگەلەك ۇستەل بارىسىندا تالقىلاندى.

«ءبىز بۇگىندە الدىن-الۋ ءىس-شارالارىنىڭ جەتكىلىكسىزدىگىن، ايەل مەن بالانى قورعايتىن قىزمەتتەردىڭ جەتكىلىكتى تۇردە دامىماعانىن تۇسىنەمىز. ءتىپتى، ءزابىر كورسەتۋشىنى پاتەردەن شىعارۋ سىندى قابىلدانعان نورمالار دا… بۇل نورما پاتەردەن شىعارىلۋى ءتيىس ەركەكتىڭ ودان بولەك باسپاناسى بولۋى كەرەكتىگى جونىندەگى ەسكەرتپەگە بايلانىستى تولىق جۇمىس ىستەمەيدى. ءبىز بۇل نورمانى پارلامەنتتە تالقىلاعان كەزدە پاتەردەن ۋاقىتشا شىعارۋ بويىنشا نورما قابىلداساق، ادام قۇقىعىن بۇزاتىنىمىز تۋراسىندا ءسوز ەتتىك. سوندىقتان ءبىز جاڭا تۇجىرىمدامادا تۇرمىستىق زورلىق-زومبىلىق سالاسىنداعى زاڭناما كەمەلدەنە تۇسەدى دەپ بىلەمىز»، – دەيدى ەلەنا تاراسەنكو.

ايتا كەتسەك، بۇرىنعى جۇبايىن سوققىعا جىعىپ، بىرنەشە مارتە پىشاقتاعان باقىتبەك ەسەنتايەۆتىڭ ءىسى بويىنشا الدىن-الا تىڭداۋ 14 قىركۇيەكتە  قاسكەلەڭ قالالىق وكرۋگىندەگى الماتى وبلىسى قاراساي اۋداندىق مامانداندىرىلعان سوتىندا باستالدى. بايان ەسەنتايەۆانىڭ ءوزى العاشقى وتىرىسقا كەلمەگەن. ۇلكەن قىزى  ايساۋلە باقىتبەك سوتتا اكەسىن جاقتاماق.