پوليسيا پاۆلودار وبلىسىندا اۋىل تۇرعىندارىمەن بولعان توبەلەستى زەرتتەپ جاتىر، - دەپ    حابارلايدى Qamshy.kz  Tengr inews.kz cىلتەمە جاساپ.

ايتا كەتەيىك، پاۆلودار وبلىسىندا بولعان جاپپاي توبەلەستەن 15 جاستاعى مەكتەپ وقۋشىسى زارداپ شەككەن بولاتىن. مەكتەپتەن قايتىپ بارا جاتقان وقۋشى مەكتەپ ماڭىندا بەتپەردە كيىپ العان ادامداردىڭ ونىڭ اكەسى مەن باسقا دا ەر ادامداردى ۇرىپ جاتقانىن كورگەن. ول اكەسىنە كومەكتەسپەك بولعانىمەن بۇزاقىلار ونى دا سوققىعا جىققان. سالدارىنان بالانىڭ ميى شايقالىپ، اۋرۋحاناعا جەتكىزىلدى.

قوسكول اۋىلدىق وكرۋگى اكىمدىگىندەگىلەردىڭ ايتۋىنشا، وبلىستىق پوليسيا دەپارتامەنتىنىڭ وزىندىك قاۋىپسىزدىك باسقارماسىنداعىلار قىزىلقاق اۋىلىندا بولعان توتەنشە جاعدايمەن اينالىسىپ جاتىر. "مەن وقيعا بولعان كەزدە اۋدان ورتالىعىندا بولدىم. ءبىراق كۋاگەرلەردىڭ ايتۋىنشا، 14 قىركۇيەكتە تۇستەن كەيىنگى ۋاقىتتا اۋىلعا ارنايى بولىمشەنىڭ پوليسەيلەرى كەلىپ كەتكەن. سودان اۋىل تۇرعىندارىن سوققىعا جىققان. ولاردىڭ اراسىندا بولعان توبەلەس ۆيدەوعا ءتۇسىرىلىپ، وسىعان قاتىستى دەرەك تە تىركەلگەن"، - دەدى قوسكول اۋىلدىق وكرۋگىنىڭ اكىمى تالعات بەسپايەۆ.

اكىمنىڭ ايتۋىنشا، اۋرۋحانانىڭ كومەگىنە بەس ادام مەن توبەلەستە زارداپ شەككەن 15 جاستاعى وقۋشىنىڭ اتا-اناسى جۇگىنگەن.

ايتا كەتەيىك، پوليسيا قىزمەتكەرلەرى وقيعانىڭ ءمان-جايىن ازىرشە ايتقان جوق. راستالماعان مالىمەتتەرگە سۇيەنسەك، ارنايى بولىمشە قىزمەتكەرلەرىنىڭ اۋىل تۇرعىندارىن ۇرىپ-سوعۋ سەبەبى ولار جەرگىلىكتى قىزىلقاق وزەنىندەگى شايانداردى الماق بولعان. "ءبىراق بۇل تال تۇستە اۋىل تۇرعىندارىن ۇرۋعا سەبەپ ەمەس. وسى وقيعادان بۇرىن، ياعني ەكى كۇن بۇرىن بىزگە ەرتىس اۋداندىق ءىىب وكىلدەرىنەن تۇرعىندارمەن تۇسىندىرمە جۇمىستارىن جۇرگىزۋ قاجەتتىلىگى تۋرالى حابارلاما كەلدى. بولعان جاپپاي توبەلەستەن كەيىن، 15 قىركۇيەكتە ءبىز تۇرعىندارمەن جينالىپ، ارقايسىسىمەن سويلەستىك. اۋىل تۇرعىندارى ولاردى نەلىكتەن سوققىعا جىققاندارىن دا بىلمەيدى. بارلىعى قورقىپ وتىر"، - دەدى تالعات بەسپايەۆ.

سونداي-اق، جاپپاي توبەلەستەن زارداپ شەككەن 41 جاستاعى ەر ادامنىڭ اۋرۋحاناعا جەتكىزىلگەنى ايتىلادى.