بۇگىن پارلامەنت سەناتىنىڭ جالپى وتىرىسى ءوتتى، - دەپ حابارلايدى Qamshy.kz.

سەنات دەپۋتاتى رەتىندە بۇل وتىرىسقا ءبىرىنشى رەت قاتىسقان داريعا نۇرسۇلتانقىزىن ارىپتەستەرى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى ەتىپ سايلاپ الدى. اتالعان كوميتەتتىڭ بۇرىنعى جەتەكشىسى يكرام ادىربەكوۆ ورنىن بوساتقان مەن سول قۇرىلىم قۇرامىندا قالاتىن بولدى.

ەستەرىڭىزگە سالساق، داريعا نازاربايەۆا 13 قىركۇيەك كۇنى مەملەكەت باسشىسىنىڭ جارلىعىمەن سەنات دەپۋتاتى بولىپ تاعايىندالعان بولاتىن. بۇل تاعايىنداۋ قوعامدا ءتۇرلى بولجامداردىڭ جاسالۋىنا تۇرتكى بولدى. بىرەۋلەر د. نازاربايەۆانىڭ قاتارداعى سەناتور بولىپ قالمايتىنىن، پالاتا ءتوراعالىعىنا سايلاناتىنىن بولجاسا، تانىمال ساياساتتانۋشى ايدوس سارىم داريعا نۇرسۇلتان قىزىنىڭ دەپۋتات اتانۋىن ساياسي قىزمەتتەگى قۇلدىراۋى دەپ باعالاعان ەدى. 

قالاي بولعاندا دا بۇل اۋىس-تۇيىستەردىڭ تۇپكى ماقساتى ءبىر قۇدايعا جانە وسى روكيروۆكالاردىڭ اۆتورىنا عانا ءمالىم. سەنات قۇرامىن جاساقتاۋدا پرەزيدەنتتىڭ ءبىرشاما وكىلەتتىلىگى بارىن ەسكەرسەك، داريعا نۇرسۇلتان قىزىنىڭ ءالى تالاي سەكىرىس جاساۋ مۇمكىندىگىنە يە ەكەنىن جوققا شىعارا المايمىز.