«ۇلتتىق باسپا ءسوز كلۋبى» قوعامدىق بىرلەستىگى ءوزىنىڭ قىزمەتىنىڭ قۇنىن كوتەرىپ جىبەردى،- دەپ حابارلادى «ماتايەۆتار ءىسى» بويىنشا سوت وتىرىسىندا ونلاين-كورسەتىلىم بويىنشا سوتقا تۇسىنىك بەرگەن كۋاگەر – «قازاقتەلەكوم» اق-نىڭ بۇقارامەن بايلانىس جونىندەگى باسقارماسىنىڭ مەنەدجەرى ءمادينا شىلىكبايەۆا. ونىڭ ايتۋىنشا، بۇقارالىق اقپارات قۇرالدارىنىڭ بارلىعى مەملەكەتتىك ساتىپ الۋ شارتى جاسالماي تۇرىپ، «قازاقتەلەكوم» اق-نىڭ قىزمەتى تۋرالى اقپاراتتىق-جارنامالىق ماتەريالداردى جاريالاۋعا كەلىسىمىن بەرگەن. كۋاگەر «ۇلتتىق باسپا ءسوز كلۋبى» قوعامدىق بىرلەستىگىنىڭ قىزمەت كورسەتۋ قۇنىن ادەيى كوتەرىپ جىبەرگەنىن اشىق ايتتى.

«2013 جىلى مەن «قازاقتەلەكوم» اق-نىڭ جارنامالىق ماتەريالدارى «ۆرەميا» گازەتىندە جاريالانعانىنا كوز جەتكىزۋ ءۇشىن، اتالعان گازەتتىڭ قىزمەتكەرلەرىمەن تەلەفون ارقىلى حابارلاستىم. مەن ولارعا ءوتىنىش جاساپ، «قازاقتەلەكوم» تۋرالى ماتەيالداردىڭ بارلىعىن ءوزىمنىڭ ەلەكتروندىق پوشتاما جىبەرۋلەرىن سۇرادىم. ولار مەنىڭ ەلەكتروندىق پوشتاما تابليسا جىبەردى. وسى تابليسادا گازەتتىڭ ءنومىرى، جاريالانعان ماتەريالداردىڭ كولەمى، جارنامالىق-اقپاراتتىق ماتەريالداردىڭ ءبىر شارشى مەترىنىڭ قۇنى جونىندە مالىمەتتەر بولدى. مەنىڭ بايقاعانىم، تابليساداعى باعا مەملەكەتتىك ساتىپ الۋ شارتىنىڭ قوسىمشاسىنداعى باعادان كەم بولدى»،- دەپ اڭگىمەلەدى كۋاگەر م. شىلىكبايەۆا.

ول سوتقا بەرگەن جاۋابىندا ءبىرقاتار جايتتاردىڭ باسىن اشتى. ماسەلەن، ءمادينا شىلىكبايەۆا ءارتۇرلى باسىلىمدارعا تەلەفون ارقىلى حابارلاسىپ، ولارعا جارنامالىق-اقپاراتتىق ماتەريالداردى جاريالاۋعا ءوتىنىش جاسايدى. مەنەدجەر مەملەكەتتىك ساتىپ الۋ تەندەرىنىڭ ءالى وتكىزىلمەگەنىن، ياعني ول وتكەننەن كەيىن، تەندەردى ۇتىپ العان تۇلعانىڭ بارلىق قىزمەتتەردىڭ اقىسىن تولەيتىنىن ايتادى. اتاپ ايتارلىعى، بۇقارالىق اقپارات قۇرالدارىنىڭ بارلىعى وسى تالاپقا بىردەن كەلىسىمىن بەرگەن.  ناتيجەسىندە «قازاقتەلەكوم» تۋرالى ماتەريالدار جارىققا شىعادى.

ءمادينا شىلىكبايەۆانىڭ سوت وتىرىسىنداعى تۇسىنىگىن ءوزىنىڭ ارىپتەسى، «قازاقتەلەكوم» اق-نىڭ بۇقارامەن بايلانىس جونىندەگى باسقارماسىنىڭ تاعى ءبىر مەنەدجەرى زاۋرە قازىبايەۆا دا راستادى.  ول «ۇلتتىق باسپا ءسوز كلۋبى» بەلگىلەگەن باعا باسپا باق-تاردىڭ پرايس-پاراعىنداعى باعامەن سالىستىرعاندا جوعارى ەكەنىن كورىپ، بۇل تۋرالى «قازاقتەلەكوم» اق-نىڭ بۇقارامەن بايلانىس جونىندەگى باسقارماسىنىڭ جەتەكشىسى يۋليا يساكوۆانى حاباردار ەتەدى. «مەن شارتتىڭ جوباسىن دايىنداۋ كەزىندە «ۇلتتىق باسپا ءسوز كلۋبى» قوعامدىق بىرلەستىگى ۇسىنعان باعانى كورسەتتىم. سونىمەن قاتار، ۇلتتىق باسپا ءسوز كلۋبى بەلگىلەگەن باعا باسپا باق-تاردىڭ پرايس-پاراعىنداعى باعامەن سالىستىرعاندا جوعارى ەكەنىن يۋ. يساكوۆاعا ايتتىم»،-دەدى زاۋرە قازىبايەۆا.

ايتا كەتەلىك، بۇعان دەيىنگى سوت وتىرىستارىنىڭ بىرىندە تۇسىنىك بەرگەن «قازاقتەلەكوم» اق-نىڭ ستراتەگيالىق باسقارۋ جونىندەگى باس ديرەكتورى باتىر ماحانبەتاجييەۆ مەملەكەتتىك ساتىپ الۋ ەرەجەلەرى بويىنشا قوسالقى مەردىگەرلىككە بەرۋدى ىقشامداۋ قاجەتتىگىن الدىن الا بىلسە دە، سەيىتقازى ماتايەۆتىڭ ۇسىنىسىمەن كەلىسكەنىن حابارلادى. ءسويتىپ ول ءوز قىزمەتكەرلەرىنە تەندەرلىك قۇجاتتاردى بەلگىلەنگەن تارتىپكە سايكەس دايىنداۋعا س. ماتايەۆقا قول ۇشىن سوزۋعا تاپسىرما بەرەدى. تەرگەۋ بارىسىندا انىقتالعانداي، «ۇلتتىق باسپا ءسوز كلۋبى» قوعامدىق بىرلەستىگىنىڭ پرەزيدەنتى سەيىتقازى ماتايەۆ باسىلىمدارعا جارنامالىق ماتەريالدار شىعارۋ بويىنشا كورسەتىلەتىن قىزمەتتەردىڭ قۇنىن كوتەرىپ جىبىرگەن. ءسويتىپ كوتەرىلگەن باعانىڭ ايىرماسىنان تۇسكەن قاراجاتتى قولما-قول اقشاعا اينالدىرىپ، ءوزىنىڭ جەكە قاجەتتىلىكتەرىنە جاراتقان.

تەرگەۋدىڭ نۇسقاسى بويىنشا، «ۇلتتىق باسپا ءسوز كلۋبى» قوعامدىق بىرلەستىگىنىڭ پرەزيدەنتى سەيىتقازى ماتايەۆ 2011-2013 جىلدار ارالىعىندا قىزمەت تۇرلەرىنىڭ قۇنىن كوتەرۋ جولىمەن «قازاقتەلەكوم» اق-نا جارنامالىق-اقپاراتتىق ماتەريالداردى ورنالاستىرۋعا بولىنگەن 398 ملن. تەڭگەنىڭ 143 ملن-ىن ۇرلاعان.

ءامىرلان ءالىمجان