قازاقستاندىق بلوگەر دامير بايمولدين قىزىنا حات جازىپ، قازاقستاندا قىز بالا بولىپ دۇنيەگە كەلۋدىڭ كەمشىلىكتەرىن ءتىزىپ بەردى،- دەپ حابارلايدى Qamshy.kz Stan.kz-كە سىلتەمە جاساپ. 

“قىمباتتى، قىزىم! سەنىڭ جولىڭ بولمادى – ويتكەنى سەن قازاقستاندا دۇنيەگە كەلدىڭ. دەمەك، بويجەتىپ، ەسەيگەننەن كەيىن قانداي جولدى تاڭداساڭ دا، جۇرتتىڭ سىنىنا قالاسىڭ. ءاربىر ەركەك ساعان ەسكەرتۋ جاساۋدى ءوز پارىزى سانايتىن بولادى. ونىڭ سەبەبى كەز كەلگەن نارسەمەن بايلانىستى بولۋى مۇمكىن. كيىمىڭنەن باستاپ، سويلەگەن ءسوزىڭ، تاققان نەمەسە تاقپاعان ورامالىڭ، قولدانعان ءتىلىڭ، سىرت كەلبەتىڭ، قىسقاسى كەز كەلگەن نارسە ءۇشىن ءسوز ەستۋىڭ مۇمكىن. باسقاسىن ايتپاعاندا، كولىك جۇرگىزۋدى شەبەر مەڭگەرسەڭ دە، “قولىنا انار ۇستاعان مايمىل” دەپ ايتاتىن ادام تابىلادى. وعان ءلام-ميم دەپ ءتىل قاتۋدىڭ ءوزى ارتىق. سويلەگەن ءسوزىڭ جاقپاي قالسا، سوققىنىڭ استىندا قالاسىڭ. بولماعىر “قاتىننىڭ” ءسوزىن باسىنان اسىرمايتىن “ازاماتتار” سەنى ۇرىپ-سوعۋدان ارلانبايدى”، – دەپ باستايدى بلوگەر حاتىندا.

—
سەن قازاقستاندا ايەل زاتى بولىپ دۇنيەگە كەلدىڭ. ەگەر جۇمىس ىستەپ، مانساپ قۇرساڭ، ەلدىڭ ءبارى سەنى “پەرزەنتسىز جالماۋىز” دەپ، ال كۇيەۋگە شىعىپ، ءۇي شارۋاسىمەن اينالىساتىن ايەل بولساڭ، كۇيەۋىڭ “موينىما ماسىل بولدىڭ، ءبىر تيىن تاپقان جوقسىڭ” دەپ عۇمىرىڭنىڭ سوڭىنا دەيىن ايتىپ وتەدى. ەگەر تەڭقۇقىقتىق جايلى ءسوز قوزعاساڭ، ەل سەنى “فەمينيست” دەيتىن بولادى (بۇل سوزدە ءبىر جامانشىلىق بارداي).

—
سەن قازاقستاندا ايەل زاتى بولىپ تۋىلدىڭ. سەنى وزىڭە بەيتانىس جىگىت الىپ قاشۋى مۇمكىن. ول ازداي، ونىڭ ەسكى ءداستۇردى ۇستاناتىن تۋىستارى ونى تولىقتاي قولداپ، پوليسيا ونداي جاعدايعا كوز جۇما قاراي سالادى. كۇن باتقاندا ول سەنى زورلايدى، ال سەن ءومىر بويى ونىڭ تۋىستارىنىڭ قورلىعىنا شىداپ، جۇمىسسىز كۇيەۋىڭ ىشكىلىككە سالىنادى، ال سەن ءوز بالالارىڭدى ءوزىڭ اسىرايسىڭ، -دەپ جالعادى ءسوزىن.
—-
سەن قازاقستاندا ايەل زاتى بولىپ دۇنيەگە كەلدىڭ. سەنى كۇندىز دە، تۇندە دە، ءوز ۇيىڭدە دە، قوناقتا دا زورلاپ كەتۋى مۇمكىن. قۇقىق قورعاۋ ورگاندارىنا شاعىمدانساڭ، ولار القىمىڭنان الادى. ادىلدىككە قول جەتكىزۋ ءۇشىن ساعان بۇكىل ەلدىڭ الدىنا شىعۋعا تۋرا كەلەدى. اقپاراتتىق شۋ تۋدىرعان سوڭ عانا پوليسيا ارەكەتكە كىرىسەتىن بولادى. ودان بولەك، قوعامنىڭ باسىم بولىگى كىنانى وزىڭە ارتادى. ەركەكتەر: «ءوزىڭ كىنالىسىڭ»، «اشىق-شاشىق كيىنبەۋىڭ كەرەك ەدى”، “تانا كوزىن سۇزبەسە، بۇقا ءجىبىن ۇزبەيدى” – دەپ ايتاتىن بولادى.

ال ايەلدەر ەلدىڭ كوزىنشە ساعان جاناشىرلىق تانىتقانىمەن، ءوز ارالارىندا سىناپ-مىنەيدى. سول ساتتەن باستاپ قوعام سەنى جەزوكشە دەپ قابىلدايتىن بولادى. ۇلگىلى وتباسىلارعا جولىڭ جابىلادى، قۇربىلارىڭ سەنى بۇزىلعان قىز ساناسا، جىگىتتەر سەنىمەن تەك كوڭىلدەس بولۋدى كوزدەيدى، ال ايەلدىككە سەندەي قىزداردى المايدى.
—
الايدا جاپان دالاداعى اۋىلداردىڭ بىرىندە دۇنيەگە كەلسەڭ، جاعدايىڭ بۇدان دا ناشار بولۋى مۇمكىن ەدى. ونداي جاعدايدا سەنىڭ “بيىككە” كوتەرىلەر جالعىز جولىڭ – جەرگىلىكتى اكىم ورىنباسارىنا نە اگادىر ستانساسىنداعى پوليسەيگە، مەكتەپ ديرەكتورىنا نەمەسە تاعى ءبىر جەمقورعا تۇرمىسقا شىعىپ، اقسۇيەكتىڭ ءرولىن ويناۋ. ول كەزدە ءبۇتىن ءبىر اۋىلدا قاقپالارى بىردەي بولىپ كەلەتىن ۇقساس ۇيلەر تۇرعىزىلادى. باعىڭ جانسا، ۇيىڭدە بارقىتتان جاسالعان جيھاز بەن التىن تۇستەس ءتۇسقاعازدار بولادى. مىنا ءومىر ساعان ءوز ارتىقشىلىقتارىن ۇسىنعان ەكەن – ونى مەيلىنشە ءوز پايداڭا اسىر.
—
ءوزىڭدى تاستاپ كەتەتىن جىگىتكە عاشىق بولۋدان قۇداي ساقتاسىن. جەڭىلتەكتىك ابىرويىڭا ماڭگىلىك ءمور بولىپ باسىلادى. اجىراسۋىڭا قۇداي جول بەرمەسىن. ايتپەسە سەنى كەزدەسۋگە شاقىرعان كەز كەلگەن جىگىت العاشقى كۇنى-اق وزىڭمەن جاقىنداسپاعانىنا تاڭ قالادى.

—
ەگەر بايقاۋسىزدا ءبىر جىگىتتى ۇناتىپ قالار بولساڭ، ونىڭ قازاق ۇلتىنان بولاتىنىنا ۇمىتتەنەيىك. ءبىر ۇلتتىڭ وكىلى بولىپ تۋىلۋ ادامنىڭ قولىندا بولماسا دا، كەزدەيسوق قۇبىلىس بولسا دا – تاڭداعان جىگىتىڭ قازاق بولماي شىقسا، جۇرتتىڭ ءبارى سەندەردى سىنايتىن بولادى. سەندەردى كەز كەلگەن ورىندا، ءتىپتى، قوعامدىق جەردە ءبىر عانا سەبەپپەن سوققىعا جىعۋى مۇمكىن. سەبەبى سەندەر “قاننىڭ تازالىعىن” بۇزىپ، “نامىسىمىزعا” سىزات تۇسىرەسىڭدەر.

قىزىم، ەگەر دە جىگىتتەردى ەمەس، قىزداردى ۇناتاتىن بولساڭ – ونى ءومىر بويى جاسىرىپ وتۋىڭە تۋرا كەلەدى. ءتىپتى، سەنىڭ دوستارىڭ دا مۇنداي جاعدايدا سەنى تۇسىنە الماۋى مۇمكىن. باسقالاردان ەش وزگەشەلەنۋىڭە بولمايدى. كەرى جاعدايدا ەلدىڭ ءبارى بەتىڭە تۇكىرىپ، قۋدالايدى، قينايدى. تەك سۇيگەن ادامىڭنىڭ جانىندا جاساندىلىق تانىتپاۋىڭا بولادى.

—
سەن قازاقستاندا ايەل زاتى بولىپ دۇنيەگە كەلدىڭ. دەمەك مىنا ءومىردىڭ اششىسىن قابىلداماۋدى ۇيرەنۋىڭە تۋرا كەلەدى. داۋلەتتى وتباسىلاردان شىققان قۇربىلارىڭ ساعان جوعارىدان قارايتىن بولادى. ال جاعدايى تومەن ءبىراق قاتال ەرەجەلەردى ۇستاناتىن وتباسىنىڭ پەرزەنتتەرى ءوز تاندەرىن كۇندىزگى ۋاقىتتا ساتۋمەن اينالىسادى. سەبەبى كەشكى 8-دەن كەيىن ولاردى ۇيدەن شىعارمايدى. سىنىپتارىڭدا ابايسىزدا ىشىمدىك ىشكەن ۇزدىك وقۋشىنى ءوز جىگىتتەرىڭ “بۇزادى”. ال مەكتەپتە وقىپ جۇرگەن كەزدەرىڭدە،  ستاتيستيكا بويىنشا ەكى بالا ءومىرىن سۋيسيدپەن اياقتايدى.