"ەڭبەك - ءبارىن جەڭبەك!". بۇگىن وقۋشىلار سارايىندا وسىنداي تاقىرىپتا  تالدىقورعان قالاسىنىڭ اكىمى باعدات قاراسايەۆ-- قالا مەكتەپتەرىنىڭ ۇزدىك 11-سىنىپ وقۋشىلارىنا ءدارىس وقىدى. اكىم ساباعىنا قاتارىنىڭ الدى بولعان 111 وقۋشى قاتىستى، - دەپ حابارلايدى Qamshy.kz "جەتىسۋ" ارناسىنا سىلتەمە جاساپ.

ولارعا شاھار باسشىسى تابىستى ادام بولۋدىڭ قۇپياسىن ايتتى. ايتۋىنشا، بۇگىندە بيىكتەردى باعىندىرۋ ءۇشىن تالانت ازدىق ەتەدى. ادام ەڭبەكقور بولسا عانا ءوز ارمانىنا جەتەدى. تانىمال سپورت جانە ەسترادا جۇلدىزدارى، ساياساتكەرلەر مەن ونەر قايراتكەرلەرى بۇگىنگى بيىگىنە -- تەك ەڭبەكتىڭ ارقاسىندا جەتكەن. شاراعا ارنايى شاقىرىلعان قۇرمەتتى قوناق - ريو وليمپياداسىنىڭ جۇلدەگەرى كارينا گوريچيەۆا دا وسى ءسوزدى قۋاتتادى. ول وقۋشىلارعا تابىس تىلەپ، ارمانعا جەتۋ ءۇشىن جان اياماي جۇمىس ىستەۋ كەرەكتىگىن ايتتى. ساباقتان قىز-جىگىتتەر ۇلكەن اسەر الىپ قايتتى. 

ماديار دانيالوۆ قازاق-تۇرىك ليسەيىنىڭ 11-سىنىپ وقۋشىسى

بۇگىن ءبىزدىڭ قالا اكىمى ەستەن كەتپەيتىن ءبىر وقيعا جاسادى. قالامىزداعى بارلىق ۇزدىك وقۋشىلارىن جيناپ الدى دا، بارىمىزگە جىگەر بەرىپ، بولاشاعىمىزعا ۇلكەن سەنىم ءبىلدىردى. الداعى بولاتىن ەمتيحانداردان وتۋگە سەپتىگىن تيگىزەتىن اقىل-كەڭەستەرىن بەردى. ءوز باسىم ول كىسىنىڭ اڭگىمەسىنەن ەڭ باستىسى دارىن ەمەس ەڭبەك ەكەنىن ءتۇسىندىم. ەڭبەك ارقىلى قوعامدا كوپ جەتىستىككە جەتۋىمىزگە بولادى. ءوز جەتىستىكتەرىمىزبەن ەلىمىزگە ۇلكەن ۇلەس قوسامىز دەپ ويلايمىن.