ەلباسى نۇرسۇلتان نازاربايەۆ الماتى وبلىسىنا جۇمىس ساپارى بارىسىندا ءبىرقاتار نىسانداردى ارالادى، - دەپ حابارلايدى Qamshy.kz اقوردا سايتىنا سىلتەمە جاساپ.

پرەزيدەنت تالدىقورعان قالاسىنىڭ جاستارعا قىزمەت كورسەتۋ ورتالىعىنا بارعان كەزدە شەكارا ماڭىندا سالىنعالى جاتقان نۇركەنت قالاسىنىڭ باس جوسپارىمەن، ورتالىقتىڭ جۇمىسىمەن، وڭىردەگى جاستار ساياساتىنىڭ نەگىزگى باعىتتارىمەن تانىستى.

الماتى وبلىسىنىڭ اكىمدىگى حابارلاعانداي، جاڭا قالا پانفيلوۆ اۋدانىنىڭ اۋماعىندا، قازاقستان-قىتاي شەكاراسىندا بوي كوتەرمەك. بولاشاقتا نۇركەنتتە 100 مىڭ حالىق تۇراتىن بولادى دەپ جوسپارلانۋدا.

ودان بولەك، ەلباسى  جاركەنت-قورعاس اگلومەراسياسىن دامىتۋ جوباسىن قاراپ شىقتى.

ەستەرىڭىزگە سالساق، بۇگىن پرەزيدەنت ن. نازاربايەۆ جۇمىس ساپارىمەن الماتى وبلىسىنا بارعان بولاتىن. ساپار بارىسىندا ەلباسى ءوڭىر دامۋىمەن تانىسىپ، وقۋشىلار سارايىندا، «جاستار» ساياباعىندا، قالالىق كوپسالالى اۋرۋحانادا، «گ.نام» شارۋا قوجالىعى مەن تەكەلى كەن وڭدەۋ كەشەنىندە بولدى.