قازاقستان پرەزيدەنتى نۇرسۇلتان نازاربايەۆ الماتى وبلىسىنا ساپارى بارىسىندا جاڭا نۇركەنت قالاسىنىڭ دامۋىنىڭ باس جوسپارىمەن تانىستى، - دەپ حابارلايدى Qamshy.kz اقوردانىڭ باسپا ءسوز قىزمەتىنە سىلتەمە جاساپ.

سونىمەن قاتار، نازاربايەۆ تالدىقورعان قالاسىنىڭ دامۋىنىڭ باس جوسپارىمەن، سونداي-اق جاركەنت-قورعاس اگلومەراسياسىنىڭ قالا قۇرىلىسى تۇرعىسىنان دامۋىنىڭ كەشەندى جوباسىمەن تانىستى.

نۇركەنت قالاسى "قورعاس - شىعىس قاقپاسى" ارنايى ەكونوميكالىق ايماعىنىڭ قۇرامىنا كىرەدى. بولاشاقتا بۇل قالادا 100 مىڭنان اسا ادام تۇرىپ، اۋدانى 300 گەكتاردان اسادى. ارنايى ەكونوميكالىق ايماقتىڭ قۇرىلىسى 2020 جىلى اياقتالادى. وسىدان كەيىن بۇل شەكارا ايماعى جاڭا جىبەك جولىنىڭ تىرەگىنە اينالادى.

ەسكە سالايىق، وسىعان دەيىن نۇرسۇلتان نازاربايەۆ تالدىقورعان قالاسىنا كەلىپ، اۋەجاي مەن اۋە ۆوكزالى عيماراتىنا باردى. مەملەكەت باسشىسى اۋەجاي مەن اۋە ۆوكزالى عيماراتتارىن قايتا جوندەۋ جۇمىستارىنىڭ بارىسىمەن تانىستى. سونداي-اق، ەلباسىعا ۇشۋ-قونۋ جولاعىن جاڭارتۋ جۇمىسى، اۋەجايدى جانە ءوڭىردىڭ تۋريستىك ينفراقۇرىلىمىن دامىتۋ پەرسپەكتيۆالارى تۋرالى باياندالدى.

وسىدان كەيىن نۇرسۇلتان نازاربايەۆ تەكەلى تاۋ-كەن ءوندىرىسى كەشەنىندە بولدى. اقوردانىڭ باسپا ءسوز قىزمەتى مالىمەتىنشە، ەلباسى  كاسىپورىننىڭ جۇمىسىمەن تانىستى. قازاقستان پرەزيدەنتىنە يننوۆاسيالىق تەحنولوگيالاردى قولدانا وتىرىپ، قايتا بالقىتىلعان شويىن الۋ ارقىلى تەمىر رۋداسىن ءوندىرۋ جانە وڭدەۋ جونىندەگى جوبانىڭ ىسكە اسىرىلۋ بارىسى باياندالدى. 

كەيىن مەملەكەت باسشىسى تالدىقورعان قالاسىنىڭ كوپسالالى اۋرۋحاناسىندا بولدى. قازاقستان پرەزيدەنتىنە وبلىستىڭ دەنساۋلىق ساقتاۋ جۇيەسىن دامىتۋدىڭ باستى باعىتتارى جانە ءتيىستى مەملەكەتتىك باعدارلامالاردىڭ ىسكە اسىرىلۋ بارىسى تۋرالى باياندالدى. سونداي-اق، نۇرسۇلتان نازاربايەۆ اۋرۋحانا قىزمەتكەرلەرىمەن كەزدەستى. ولار جۇرگىزىلىپ جاتقان الەۋمەتتىك ساياساتقا قولداۋ ءبىلدىرىپ، دەنساۋلىق ساقتاۋ سالاسىنا كورسەتىلىپ وتىرعان قامقورلىق ءۇشىن ەلباسىعا العىستارىن ايتتى. كەيىن قازاقستان پرەزيدەنتى وقۋشىلار سارايىندا بولىپ، ولارعا جايلى اۆتوبۋس سىيلاعان ەدى.