وڭتۇستىك قازاقستاندا بۇگىنگى تاڭدا 21 كاسىپورىن ءوز ونىمدەرىن شەت ەل اسىرىپ، ەكسپورتتايدى. ايماقتىڭ كاسىپكەرلەرى وزبەكستان، قىرعىزستان، اۋعانستان جانە تاجىكستان رەسپۋبليكالارىنا وسىمدىك مايى مەن ۇن، بالىق سۇبەسى مەن كونسەرۆىلەنگەن بالىق، قۇس جۇمىرتقاسىن، ماكارون، كونديتەرلىك ونىمدەردى، قوي ەتىن جانە سيىر ەتىن ەكسپورتتايدى، دەپ حابارلادى وقو اكىمىنىڭ باسپا ءسوز قىزمەتى.  

رەسەي نارىعىنا شىعارىلاتىن نەگىزگى ونىمدەر باقشالىق داقىلدار، مەن كوكونىستەر ءىقم-عا ارنالعان مال ازىعى، كونسەرۆىلەنگەن بالىق، جەمىستەر، ماقتا، قىزاناق، كۇركەتاۋىق ەتى،سۋسىندار جانە ت.ب. ماسەلەن، وسى جىلدىڭ التى ايىندا تەرىسكەيدەگى كورشىلەرگە 45 مىڭ توننا قاۋىن، 17 مىڭ توننا قاربىز ەكسپورتتالعان. 

ال وڭتۇستىكقازاقستاندىق «حاميت» كومپانياسى بالىقتىڭ سۇبە ەتىن گرۋزيا، گەرمانيا، ۋكراينا رەسپۋبليكالارىنا جانە رەسەي فەدەراسياسىنا جىبەرەدى. 

قازىرگى تاڭدا اۋىلشارۋاشىلىعى ونىمدەرىنىڭ ەكسپورتى ەۋرو وداق ەلدەرىنە شىعا باستادى. مىسالى، "قارشىعا" شارۋا قوجالىعى الما، قاۋىن جانە قاربىز ونىمدەرىن گەرمانياعا جىبەرە باستادى.

بۇگىندە وڭىرىمىزدە يران رەسپۋبليكاسىنا جۇگەرى جانە قوي ەتىن ەكسپورتقا شىعارۋ جايى رەتتەلۋدە. ساۋد ارابياسىنا، ءباا جانە يراك رەسپۋبليكاسىنا كوي ەتىن ەكسپورتتاۋعا الدىن الا كەلىسىمدەر تۋرالى جۇمىس جۇرگىزىلىپ جاتىر. وسى باعىت بويىنشا وسى جىلدىڭ ماۋسىم ايىندا ءباا-عا قويلار ەكسپورتتالعانى ەسىمىزدە.