وقو وتىرار اۋدانىنىڭ اكىمى ەرلان ايتاحانوۆ ماياقۇم، بالتاكول اۋىل وكرۋگتەرىندەگى «وتىرار-سۇت-ەت» سەلولىق تۇتىنۋ كووپەراتيۆى مەن «وتىرار اگرو ونىمدەرى» جاۋاپكەرشىلىگى شەكتەۋلى سەرىكتەستىگىنىڭ جۇمىسىمەن تانىسىپ، ديقاندارمەن كەزدەستى.

قازىرگى تاڭدا كووپەراتيۆ قۇرامىنا جەرگىلىكتى «سەرىكباي-ب»، «مەيىربەك لتد»، «ۇسەنوۆ-ن» جاۋاپكەرشىلىگى شەكتەۋلى سەرىكتەستىكتەرى كىرەدى.

وقو اكىمى باسپا ءسوز قىزمەتىنىڭ مالىمەتىنشە، كووپەراتيۆ بيىل 190 گەكتار القاپقا «جيەنباي» سورتتى قاۋىن، 130 گەكتارىنا جوڭىشقا، 100 گەكتارىنا جۇگەرى داقىلدارىن ەككەن.

تىڭ تەحنولوگيالاردى پايدالانۋ ارقىلى مول ونىمگە قول جەتكىزگەن شارۋاشىلىقتىڭ ونىمدەرىنە سۇرانىس جوعارى بولىپ وتىر. بۇگىندە رەسەيدىڭ ماسكەۋ، سانكت-پەتەربۋرگ قالالارىنان كەلگەن كاسىپكەرلەر وزدەرى تاسىمالداپ اكەتۋدە. بۇل – شارۋالاردىڭ توككەن تەرى مەن ەڭبەگىنىڭ جەمىسى.

ال، بالتاكولدەگى ديقاندار عىلىمعا نەگىزدەلگەن، سوڭعى وزىق تەحنولوگيالاردى پايدالانىپ 104 گەكتار القاپقا تامشىلاتىپ سۋارۋ ادىسىمەن پياز ەككەن بولاتىن. ديقاندار ءار گەكتارىنان 60 توننادان ءونىم الۋدا. بۇل ونىمدەر كەلىسىمشارت بويىنشا «وتىرار قويما» ءجشس-نىڭ قويماسىندا ساقتالادى. سونىمەن قاتار، 50 گەكتار القاپقا تامشىلاتىپ سۋارۋ ادىسىمەن كۇزدىك پياز ەگىلىپ ءبىتتى.

اۋىلشارۋاشىلىق شارۋالارىنىڭ ايتۋىنشا، تامشىلاتىپ سۋارۋ ادىسىمەن ەگىلگەن كۇزدىك پياز القابى اۋىلدىڭ، اۋداننىڭ، قالانىڭ، وبلىستىڭ اۋىلشارۋاشىلىعىندا اتقارىلعان بىردەن ءبىر ءىس بولىپ وتىر. ايتۋلارىنشا، پياز ءونىم بەرگەن كەزدە جازدىق ونىمدەر تاۋسىلىپ، قازاقستاننىڭ بارلىق ايماقتارىنان سۇرانىستار ارتا تۇسەدى ەكەن.

اۋدان باسشىسى ديقانداردىڭ ءونىمدى ەڭبەگىنە ريزاشىلىعىن ءبىلدىرىپ، جۇمىستارىنا تابىس تىلەدى.