شىمكەنت-تاشكەنت تاس جولىندا تاعى دا ءىرى جول اپاتى ورىن الدى. قايعىلى وقيعا بۇگىن ساعات 14:00 شاماسىندا تاشكەنت تاس جولىنىڭ 30-شاقىرىمىندا ورىن العان. جول كولىك وقيعاسى سالدارىنان ەكى ادام قايتىس بولدى. بۇل تۋرالى  Qamshy.kz  Nur.kz-كە سىلتەمە جاساي وتىرىپ حابارلايدى.

تاس جول بويىندا «فولكسۆاگەن-دجەتتا» مەن جولاۋشىلار تاسيتىن «كيا-كارنيۆال» كولىكتەرى سوقتىعىسقان. سالدارىنان «دجەتتا» ەكىگە ءبولىنىپ قالدى، ونىڭ جۇرگىزۋشىسى وقيعا ورنىندا كوز جۇمعان. ال، «كيا» كولىگىنىڭ قوزعالتقىشى جۇلىنىپ ءتۇسىپتى. كولىكتەگى جولاۋشىلاردىڭ ءبىرى قايتىس بولدى، ونىڭ باسى كەسىلىپ تۇسكەن دەپ حابارلايدى تەلەارنا تىلشىلەرى.

اپاتتان كەيىن اۋرۋحاناعا 6 ادامنىڭ جەتكىزىلگەنى بەلگىلى بولدى. ولاردىڭ قازىرگى جاعدايى بەلگىسىز.

الدىن الا بولجام بويىنشا، «فولكسۆاگەن-دجەتتا» جۇرگىزۋشىسى تىزگىنگە يە بولا الماي، جولدىڭ قارسى باعىتىنا شىعىپ كەتكەن. الايدا، كىمنىڭ كىنالى ەكەنىن سوت ساراپتاماسى انىقتايتىن بولادى.

جولاۋشىلار كولىگى جىبەك جولى اۋىلىنان شىمكەنتكە قاراي بەت العان ەكەن. ونىڭ سالونىندا وزبەكستاننىڭ 6 ازاماتى بولعان. بارلىعى دا فەرعانا وبلىسىنان قازاقستانعا جۇمىس ىستەۋ ماقساتىندا كەلىپتى. تەك، كولىك جۇرگىزۋشىسى عانا ق ر ازاماتى.

ەستەرىڭىزگە سالايىق، ءدىل وسى تاس جولدىڭ بويىندا بىرەر كۇن بۇرىن ءىرى جول كولىك وقيعاسى ورىن العان بولاتىن. ول كەزدە دە جولاۋشىلار تاسيتىن Ford ميكرواۆتوبۋسى مەن جەڭىل كولىك سوقتىعىسقان. سالدارىنان 6 ادام قايتىس بولىپ، تاعى بىرنەشە جولاۋشى اۋرۋحانادا ەم قابىلداپ جاتىر.  كوز جۇمعاندار قاتارىندا ءۇش جاسار قىز دا بار.