"مينيسترلەر قازاق ءتىلىن مەنسىنبەي مە؟" - اقپارات قۇرالدارىنان.
ورىس ءتىلى:
اسسالۋماعالايكۋم! قازاق ءتىلى!
قازاقتار سويلەمەيتىن مازاق ءتىلى.
جەتپىس جىل جەتىمەكتەي سورلاپ ەدىڭ،
كورسەمشى ءدال وزىڭدەي ازاپتىنى.
بارمىسىڭ،ءتىرىمىسىڭ قازاق ءتىلى.
قازاقتىڭ تەڭدىك العان ازات ءتىلى.
وتاننىڭ انا تىلدەن باستالارىن،
قاي كەزدە ۇعار ەكەن قازاق مۇنى.
بۇل ءسوزدى مەن ايتپايمىن كەكەسىنمەن،
ايتامىن دوس بولعان سوڭ توتەسىنەن.
سويلەيدى ورىسشىلاپ وت باسىندا،
بالاسى اتاسى مەن كوكەسىمەن.
قازاق ءتىلى:
زدراستي! كاك دەلا؟ ورىس ءتىلىم!
جاڭا شىعىپ كەلەدى مەنىڭ ءۇنىم.
مەملەكەتتىك ءتىل دەگەن –اتاعىم بار،
قۇداي جازسا مەنىڭ دە تۋار كۇنىم!
قازاقشا ۇيرەنۋ دە ورىستار دا،
نەمىس پەن ۋكراين،كارىستەر دە.
بار مەكەمە كوشىۋدە وسى كۇنى،
قولدانىپ قازاق ءتىلىن بار ىستەرگە!
ورىس ءتىلى:
سەن ءالى قازان-وشاق باسىنداسىڭ.
تويلار مەن جىلدىق بەرۋ اسىنداسىڭ.
پارلامەنت،ۇكىمەتىڭ ماعان كوشەر،
ەكى مينۋت جينالىس اشىلعان سوڭ.
سەن ءالى اۋىلداسىڭ الىستاعى.
«قوياندى ولتىرمەيمە قامىستاعى».
قازاقشا سويلەسپەيدى قالالىقتار،
قازاقتا جەتپەي جاتىر نامىس جاعى.
قازاق ءتىلى؛
ولاي دەپ ەي، باۋىرىم سوكپە مەنى.
جاتىر-عوي ۇيرەتە الماي كوپكە مەنى.
ورىسشا ۇعىساتىن سان ۇلىتتار،
تۇسىنبەسە قازاققا وكپەلەيدى.
سەن بىزگە كەلىمسەكسىڭ اۋىپ كەلگەن.
قازاقتاي باۋىرمالدى تاۋىپ كەلگەن.
سەندەرگە جالعىز لاعىن سويىپ بەرىپ،
ءبىر كورپەسىن سەندەرگە جاۋىپ بەرگەن.
كوبەيىپ سەن سىياقتى كەلىمسەكتەر.
قازاقتىڭ سورى بولدى ءتىلىن شەكتەر.
قازاق ءتىلدى مەكتەپتەر جابىلعان سوڭ،
قايتىپ قانا ءتىلى ونىڭ ءوسىپ كوكتەر.
ورىس ءتىلى؛
تاعدىردىڭ تاتتىڭ تالاي اششىلارىن.
قاتتى ايتىپ نامىسىڭدى قامشىلارمىن.
شەتەلگە ەكى ادىم اتتاعان سوڭ،
«سايرايدى» ورىسشىلاپ باسشىلارىڭ.
ۇكىمەتىڭ زاڭ جازار ورىسشىلاپ،
اۋدارماسى قازاقشا تىم-اق ولاق.
پارلامەنتتەن وتكىزەر سول كۇيىندە،
«ءتىلىن تاۋىپ اقىرىن سىلاپ-سىيپاپ».
قازاق ءتىلىن بىلمەيدى جاستار ءالى،
ءسويتىپ ءجۇرىپ مەكەمە باسقارادى.
موسكۆادا بىلمەسە ورىس ءتىلىن،
باسشى تۇرماق،نان جەمەي اش قالادى.
قازاق ءتىلى؛
ءبىز وندايعا بارمايمىز،قورلامايمىز،
باسقا ءتىلدى شەكتەۋدى قولدامايمىز.
قاجەت بولسا قازاقشا ءبارى ۇيرەنەر،
«ءتىل ۇيرەن»- دەپ ەش كىمدى زورلامايمىز.
قازاقشاعا استانام كوشەدى ءالى.
سودان كەيىن مارتەبەم وسەدى ءالى.
بۇل كۇندە سىعالاسام مەن ەسىكتەن،
ەرتەڭ-اق ساعان بەرەم بوساعانى.
ورىس ءتىلى؛
اڭقاۋسىڭ- اۋ، قازاعىم سوزگە سەنگەن،
كورمەيسىڭ بە، "حوزاين" بىزگە كەلگەن.
ەندى ەكۋمىز تۇرامىز بوساعادا،
اعىلشىنعا باس ۇرىپ تورگە ەنگەن!
مەن ولمەيمىن رەسەي امان تۇرسا!
نامىسى جوق قازاقتىڭ نەگە مۇنشا!
"ەكى تىلمەن" ۇشپاق قا شىقپاپ ەدىڭ،
"ءۇش تىلمەنەن" جۇرەرسىڭ سورلاپ قۇلشا!
* * *
ايتىستى جازىپ العان: ايمۇحانبەت بەيسەمبەكوۆ
