«قازىرگى كەزەڭدەگى ەكسترەميزم مەن تەرروريزمنىڭ جولىن كەسۋ مەن الدىن الۋدىڭ زاڭنامالىق جانە ينستيتۋسيونالدىق شارالارى» تاقىرىبىندا وتكەن دوڭگەلەك ۇستەلگە قاتىسقان ساياساتكەر مۇحتار تايجان قۇزىرلى ورگان باسشىلارىنا وسىنداي ساۋال تاستادى، - دەپ حابارلايدى Qamshy.kz.
ەكسترەميزم، تەرروريزممەن كۇرەس ماسەلەلەرىن تالقىلاعان جيىندا ساياساتكەر جاستاردىڭ تەرىس اعىمدار جەتەگىندە كەتۋىنىڭ باستى سەبەپتەرى رەتىندە كەدەيشىلىك پەن مەملەكەتتىك ساياساتتاعى ادىلەتسىزدىكتى اتادى.
«لاڭكەستىكتىڭ باستى نەگىزى – كەدەيشىلىك پەن جۇمىسسىزدىق. تەرروريزممەن كۇرەستە ۇكىمەت باسشىلارىنىڭ جاۋاپكەرشىلىگى زور. ەلدە كەدەيشىلىك بولماۋى كەرەك. ويتكەنى، ەلىمىز – باي. قازاقستاندا بار-جوعى 17 ميلليون عانا ادام بار. سوندىقتان، ءبىز دۇنيە جۇزىندەگى احۋالدىڭ وزگەرۋىنە بايلانىستى ۇكىمەتتەن باسقا ەكونوميكالىق ساياسات كۇتەمىز»، - دەدى م. تايجان.
جاستاردىڭ ەكسترەميستىك يدەيالارعا ەرۋىنە ءبىلىم بەرۋ جۇيەسىندەگى كەمشىلىكتەردىڭ، قوعامداعى ادىلەتسىزدىكتىڭ دە سەبەپ بولىپ وتىرعانىنا نازار اۋدارتتى.
سونداي-اق، م. تايجان جەر رەفورماسىنا نارازىلىق ءبىلدىرىپ، اكسيالار ۇيىمداستىرعان بەلسەندىلەردى قۋدالاۋ ماسەلەسىنە دە توقتالدى.
«جاڭا زاۋرەش باتتالوۆا حانىم دۇرىس ايتىپ كەتتى. مىسالى، ماكس بوقايەۆ پەن تالعات اياننىڭ ءتورت اي قاماۋدا وتىرعانى دۇرىس ەمەس دەپ ويلايمىن. ويتكەنى، ءالى سوت ۇكىمى جوق. ولاردى ءۇي قاماققا اۋىستىرۋعا بولادى عوي. مىسالى، ۇلكەن جەمقورلىققا بارعان «ەكسپو» باسشىلارى سوت شەشىمىن ۇيلەرىندە كۇتتى، ال، بۇل جىگىتتەر نەگە سوتتى ۇيدە وتىرىپ كۇتپەيدى؟»، - دەگەن م. تايجان بەلسەندىلەر سوتتالىپ كەتسە، ول شەشىم ەشكىمگە ابىروي اكەلمەيتىنىن، مەملەكەت راقىمشىلىق تانىتۋى كەرەكتىگىن ەسكە سالدى.
