سەيىتقازى ماتايەۆتان سوتتا جاۋاپ الىندى، - دەپ حابارلايدى Qamshy.kz   Tengrinews.kz-كە سىلتەمە جاساپ. استاناداعى ەسىل اۋداندىق № 2 سوتىندا قازاقستاننىڭ جۋرناليستەر وداعىنىڭ باسقارما ءتوراعاسى، ۇلتتىق باسپا ءسوز كلۋبىنىڭ پرەزيدەنتى سەيىتقازى ماتايەۆقا قاتىستى سوت وتىرىسى جالعاسىپ جاتىر.

سوتتالۋشى سەيىتقازى ماتايەۆ وزىنە تاعىلىپ وتىرعان ايىپتارعا قاتىستى ءسوز سويلەدى. 

"143 ميلليون تەڭگە جىمقىردى دەگەن ايىپتاۋلار ماعان اۋىر ءتيدى. ءبىزدىڭ شىعىس قۇجاتتارىمىز بار. ءبىراق تەرگەۋدىڭ بۇل قۇجاتتاردى نەلىكتەن قابىلداعانىن بىلمەيمىن. پروكۋراتۋرادالاعىلار دا بۇل شىعىس ماتەريالدارىن قابىلداماي تاستادى. ال بۇل قۇجاتتاردا قاراجاتتى قايدا جانە قاشان جىبەرگەنىمىز تۋرالى بارلىق مالىمەت بار. ءتىپتى اۋعانستانعا، تاجىكستانعا، وزبەكستانعا جىبەرگەنىمىزگە دەيىن بار"، - دەپ مالىمدەدى سەيىتقازى ماتايەۆ. ايتۋىنشا، بۇل قاراجاتتار وڭىردەگى تىلشىلەرگە قالاماقى رەتىندە بەرىلگەن. 

"ۇلتتىق باسپا ءسوز كلۋبىندا شتاتتا مەن عانا بولدىم. "قازتاگتا" (قازاق تەلەگراف اگەنتتىگى - اۆت.) تارتىلعاندارمەن بىرگە ەسەپتەگەندە شامامەن 50 ادام جۇمىس ىستەدى. ءبىراق ءبىزدىڭ حالىقارالىق جوبالارىمىزدا ولار وزدەرى تابىس تاپتى. ءبىز كەيدە سىياقى بەرىپ تۇراتىنبىز، قانداي دا ءبىر ماتەريالدىق كومەك جىبەرىپ تۇراتىنبىز. ارينە، 143 ميلليون تەڭگەنىڭ ءبىر بولىگى سول جاققا جىبەرىلدى. ءبىز وسى قاراجاتتىڭ ءبىر بولىگىن دوللارعا اۋىستىرىپ جىبەرەتىنبىز. مۇنىڭ بارلىعى "شىعىس قۇجاتتارى"، بارلىق وردەر بار. قاراجاتتىڭ اۋدارىلۋى - ۇلتتىق باسپا ءسوز كلۋبىنىڭ شەشىمى"، - دەدى ماتايەۆ. 

سەيىتقازى ماتايەۆ سالىق تولەۋدەن جالتاردى دەگەن ايىپتاۋعا دا قاتىستى پىكىرىن ايتتى. 

"بارلىق تەندەرلىك قۇجاتتارمەن جانە بارلىق ماتەريالدارمەن الەكساندر ماكسيموۆيچ كيماسوۆ اينالىستى. وكىنىشكە قاراي، ول 2015 جىلدىڭ 25 قىركۇيەگىندە اۋىر دەرتتەن قايتىس بولدى. (...) ول ەكونوميست، ول وسى ىسپەن اينالىسقان. (...) سالىق بويىنشا. وسى ەسەپ بويىنشا بارلىق ىسپەن الەكساندر ماكسيموۆيچ كيماسوۆ اينالىستى. ول وتە مەيلىنشە ۇقىپتى ادام. شىنىمدى ايتسام، مەن 130، 110، 101 فورمالارىن وتكىزۋ كەرەك ەكەنىن بىلمەدىم"، - دەدى سوتتا ماتايەۆ. 

"كەلىسەمىن، سالىق ىستەرىندە قاتەلىكتەرىمىز بولدى. مۇندا ەشتەڭە دە جاسىرمايمىن. تەرگەۋ بارىسىندا، ايىپتار تاعىلعاندا ەسەپشىلەرىمىزدى تاپتىق. (...) تاعى ءبىر رەت اتاپ وتكىم كەلەدى، تەرگەۋ بارىسىندا ءبىز سالىق بويىنشا جالپى شامامەن 47 ميلليون تەڭگە تولەدىك، قايتا اۋداردىق. 2011-2015 جىلدار ارالىعى بويىنشا ءبىز 35 ميلليون 986 مىڭ 405 تەڭگەنى شىعىس رەتىندە، ال 5 ميلليون 890 مىڭ 768 تەڭگەنى قورىتىندى رەتىندە تولەدىك"، - دەپ كەلتىردى سوتتالۋشى مالىمەتتەردى. 

"ارينە، بۇل مەنىڭ قاتەلىگىم بولدى. مەن ءبىرىنشى باسشى رەتىندە مۇنى بىلمەدىم. بۇل تەرگەۋ بارىسىندا اشىلدى. مەن ءتىپتى سالىق تۋرالى ءبىلىمىم تاياز"، - دەدى سەيىتقازى ماتايەۆ. 

سەيىتقازى ماتايەۆ ق ر قك-نىڭ 190-بابى، 4ء-بولىمى، 2-تارماعى جانە 245-بابى، 3ء-بولىمى بويىنشا، سونداي-اق ق ر قك-نىڭ (16.07.1997 جىلعى رەداكسيا) 177-بابىنىڭ 4ء-بولىمىنىڭ "ب" تارماعى بويىنشا ايىپتالۋدا. استانانىڭ اۋداندىق سوتىنا سەيىتقازى ماتايەۆتىڭ ۇلى - اسەتتىڭ دە ءىسى جىبەرىلگەن، وعان ق ر قك-نىڭ 190-بابىنىڭ 4ء-بولىمىنىڭ 2-تارماعى بويىنشا ايىپ تاعىلعان.