ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى نۇرعالي بەلىسبەكوۆتىڭ ايتۋىنشا، سوڭعى جىلدارى سان الۋان تەرروريستىك اكسيالاردىڭ الدىن الۋ شارالارى اتقارىلىپ، جۇزدەگەن ادامنىڭ xالىقارالىق لاڭكەستىك ۇيىمدارىنا قوسىلۋىنا جول بەرىلمەدى. دەگەنمەن، سيرياداعى اسكەري قاقتىعىستارعا قاتىسىپ جاتقان قازاقستان ازاماتتارى بار. بۇگىندە ولاردىڭ اراسىندا راديكالدى كوزقاراسقا بوي الدىرعان ادامدار از ەمەس. اسكەري دايىندىعى دا جوعارى. سوندىقتان ونداي ازاماتتار ەلگە ءقايتىپ كەلگەننەن كەيىن تەرروريستىك اكت جاساۋى ابدەن مۇمكىن، - دەپ حابارلايدى Qamshy.kz.

ۇلتتىق قاۋىپسىزدىك كوميتەتىنىڭ مالىمەتىنە سايكەس، سوڭعى بەس جىلدىڭ ىشىندە سان الۋان ماقساتتاعى 64 تەرروريستىك جانە ەكسترەميستىك اكسيالاردىڭ جولى كەسىلدى. ال اعىمداعى جىلى ونداي 9 ارەكەت اشكەرەلەندى.

«اۋعانستان، يراك پەن سيرياداعى اسكەري قاقتىعىستار باستالعالى بەرى xالىقارالىق تەرروريستىك ۇيىمداردىڭ بەلسەندىلىگى ارتا ءتۇستى. وسى ۋاقىتقا دەيىن تەرروريستىك لاگەرلەردەن 45 قازاقستان ازاماتى دەپورتاسيالاندى. ءوز ەركىمەن ورالعان ادامدار دا از ەمەس. جالپى، بەس جىلدىڭ ىشىندە 445 ادام سوتتالدى. جىل باسىنان بەرى 25 ادامعا قاتىستى ۇكىم شىعارىلدى، تاعى 50 جۋىق ادام ۋاقىتشا قاماۋ يزولياتورىندا وتىر»، - دەيدى ن.بەلىسبەكوۆ "قازىرگى كەزەڭدەگى ەكسترەميزم مەن تەرروريزمنىڭ الدىن الۋ مەن جولىن كەسۋدىڭ زاڭنامالىق جانە ينستيتۋسيونالدىق شارالارى" تاقىرىبىنداعى "دوڭگەلەك ۇستەل" وتىرىسى بارىسىندا.

ونىڭ سوزىنە قاراعاندا، بۇگىندە سيرياداعى اسكەري قاقتىعىستارعا قاتىسىپ جاتقان قازاقستان ازاماتتارى از ەمەس. ولاردىڭ باسىم بولىگى راديكالدى كوزقاراستا ءجۇر. اسكەري دايىندىقتارى دا جوعارى. سوندىقتان ءدال وسى ازاماتتار ەلگە ءقايتىپ كەلسە، تەرروريستىك اكتىلەر قايتالانۋى ابدەن مۇمكىن.

«قازىرگى كەزدە ءبىز ونداي ادامداردى ارى كەتسە، 7 جىلعا سوتتاي الامىز. بۇل - ەڭ جوعارى جازا. سوندىقتان وسى ماسەلەنى رەتتەۋ كەرەك دەپ سانايمىز»،-دەپ اتاپ كورسەتتى ن.بەلىسبەكوۆ.