ەلباسىنىڭ 5 ينستيتۋتتىق رەفورمانى جۇزەگە اسىرۋ بويىنشا «100 ناقتى قادام» ۇلت جوسپارىن وڭىردە ءىس جۇزىنە اسىرۋ ءۇشىن جەتىسۋلىق عالىمدار دا وزىندىك ۇلەسىن قوسۋعا ۇمتىلۋدا. باستى ماقسات – ەل ەكونوميكاسىن نىعايتا وتىرىپ، وركەنيەتتى دامىعان 30 ەلدىڭ قاتارىنان ءوز ورنىمىزدى ايقىنداۋ بولىپ تابىلاتىنى ءمالىم. وسى يگىلىكتىڭ نەگىزى قالانىپ، سەنىمگە سەنىم قوسىلعاندىعىنى ەلىمىز تاۋەلسىزدىك العان 25 جىلدىڭ ىشىندە قول جەتكەن تابىستارىمىزدىڭ ناتيجەسى ايقىن ايعاق بولادى. ەلباسى نۇرسۇلتان نازاربايەۆتىڭ باستاماسىمەن جۇزەگە اسىرىلىپ جاتقان حالقىمىزدىڭ ءال-اۋقاتىن كوتەرۋگە، تۇرمىس-جاعدايىن جاقسارتۋعا باعىتتالعان سان-سالالى ءىس-شارالار، مەملەكەتتىك باعدارلامالاردىڭ ورىندالۋى ەل كوڭىلىنە مەدەت.
مەملەكەت باسشىسىنىڭ قازاقستاندا 2017 جىلدان باستاپ بارشا ءۇشىن تەگىن كاسىپتىك-تەحنيكالىق ءبىلىمدى ەنگىزۋ يدەياسى قوعامدا وزىندىك قاجەتتىلىگىمەن قولداۋ تاپتى. تەحنيكالىق كادرلار دايارلاۋ قاجەتتىگىنە ەرەكشە توقتالىپ، تەحنيكالىق جانە كاسىبي ءبىلىم بەرۋ ينۆەستيسيالىق ساياساتتىڭ نەگىزگى باعىتتارىنىڭ ءبىرى بولۋى تيىستىگىن دە ناقتىلاعانى حالىقتىڭ كوكەيىندەگى كوپ ويدى ءدوپ باستى. گەرمانيا، كانادا، اۆستراليا، جانە سينگاپۋر سياقتى مەملەكەتتەرمەن بىرگە كادر دايىنداۋ ورتالىقتارىن بىرلەسىپ قۇرۋ كەرەكتىگىن دە ايقىنداپ بەردى. بىلە بىلسەك، بۇل جارقىن ومىرگە جول اشىپ، ءار قادامدى نىق باسۋعا كورسەتىلگەن ايقىن جول عوي. وسى ورايدا ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ اتقارىپ جاتقان ءىس-شارالارى دا جەتكىلىكتى. قاڭتار ايىنىڭ باسىندا «جاراتىلىستانۋ – تەحنيكالىق باعىتتاعى ماماندىقتار دايارلاۋدىڭ وزەكتى ماسەلەلەرى» دەگەن تاقىرىپتا تالدىقورعان قالاسىنىڭ كوللەدجدەرى، «كازگيدرومەت» رەسپۋبليكالىق مەملەكەتتىك مەكەمەسى، «ستاندارتتاۋ جانە باعالاۋ» ورتالىعى، الماتى وبلىسىنىڭ ەكولوگيالىق دەپارتامەنتى قىزمەتكەرلەرىمەن كەزدەسۋ وتكىزىپ، زامان تالابىنا ساي ەكىجاقتى كەلىسىم جاسالىپ، تەحنيكالىق ماماندىقتار بويىنشا ءبىلىم الاتىن بىلىمگەرلەردىڭ وقۋ تراەكتورياسىنا وزگەرىس ەنگىزۋ ماسەلەسى دە شەشىلدى.
سونىمەن قاتار، ۋنيۆەرسيتەت جوعارى بىلىكتى كادرلارى، زاماناۋي وقۋ-ادىستەمەلىك جانە ماتەريالدىق بازاسى بار، كوپ سالالى باعىتتا ءۇش دەڭگەيلى جۇيەمەن ماماندار دايارلايتىن (باكالاۆريات، ماگيستراتۋرا، PhD دوكتورانتۋرا)، ايماقتىڭ جانە ەلىمىزدىڭ يننوۆاسيالىق دامۋىن بارلىق جاعىنان قامتاماسىز ەتەتىن، بولون دەكلاراسياسى قاعيدالارىنا سايكەس ءبىلىم بەرۋ جۇيەسىنىڭ جاڭعىرتىلۋىن الماتى وبلىسىندا ىسكە اسىراتىن عىلىمي ءبىلىم بەرەتىن ءىرى ورتالىق بولىپ تابىلادى.ۋنيۆەرسيتەت ۇجىمىنىڭ ساپا سالاسىنداعى ساياساتىنىڭ نەگىزگى قاعيداتتارى دا ەلباسىنىڭ «ۇلت جوسپارى قازاقستاندىق ارمانعا باستايتىن جول» ماقالاسىنا سايكەس كەلىپ وتىر. اتاپ ايتقاندا، جەتەكشى عالىمداردىڭ باستاماسىمەن ۋنيۆەرسيتەتتە عىلىم مەن ءبىلىم سالاسىنىڭ ءارتۇرلى باعىتتارىنداعى زەرتحانالاردان تۇراتىن عىلىمي-زەرتتەۋ كلاستەرى قۇرىلىپ، بۇگىنگى كۇنى ناتيجەلى جۇمىس جۇرگىزۋدە. جالپى، كلاستەردىڭ نەگىزگى قىزمەتى ىرگەلى جانە قولدانبالى زەرتتەۋلەر جۇرگىزۋ، عىلىمي-زەرتتەۋ جۇمىستارىنىڭ ناتيجەسىن تاجىريبە جۇزىندە قولدانۋعا ەنگىزۋ، ينتەللەكتۋالدىق مەنشىك نىساندارىنا قۇقىقتى جۇزەگە اسىرۋ، سونىمەن قاتار، ۋنيۆەرسيتەتتىڭ پروفەسسور-وقىتۋشىلىق قۇرامىنىڭ يننوۆاسيالىق، عىلىمي-زەرتتەۋ قىزمەتىن جۇزەگە اسىرۋعا جاعداي جاساۋ بولىپ تابىلادى.
كلاستەردىڭ عىلىمي-زەرتتەۋ جۇمىسىنا مەملەكەتتىك، ايماقتىق باعدارلامالاردى، ۋنيۆەرسيتەتتىڭ قىزمەت باعىتىنا سايكەس يننوۆاسيالىق- ءبىلىم بەرۋ جوبالارىن دايىنداۋ مەن جۇزەگە اسىرۋعا قاتىسۋ كىرەدى. سونىمەن قوسا، كلاستەر نەگىزىندە ق ر بعم عىلىم كوميتەتىنىڭ جانە جمۋ رەكتورىنىڭ گرانتتارى بويىنشا زەرتتەۋلەر جۇرگىزىلەدى.
عىلىمي-زەرتتەۋ جۇمىستارىن جانداندىرۋ ماقساتىندا ۋنيۆەرسيتەت جىل سايىن رەكتور گرانتىنا «يننوۆاسيا» اتتى ايماقتىق عىلىمي-زەرتتەۋ جوبالارىنىڭ بايقاۋىن وتكىزەدى. ونىڭ نەگىزگى ماقساتى – قازاقستان رەسپۋبليكاسىنداعى ءبىلىم مەن عىلىمدى دامىتۋ باعىتتارىنداعى باسىم سيپاتتى پراكتيكالىق يننوۆاسيالىق ماڭىزى بار جوبالاردى ىرىكتەۋ، ايماقتىق عىلىمي-زەرتتەۋدى دامىتۋ، عىلىم جانە جوعارى ءبىلىم بەرۋدىڭ قوعامدىق-ەكونوميكالىق تۇردە الماتى وبلىسىنداعى دامۋ ينتەگراسياسىنا قولعابىس ەتۋ. رەكتور گرانتى بويىنشا ايماقتىق عىلىمي بايقاۋلارى «يننوۆاسيا-2014»-كە 18 ملن تەڭگە، «يننوۆاسيا-2015»-كە 9،9 ملن تەڭگە مولشەرىندە قاراجات ءبولىنۋى رەكتور بۇيرىعىمەن بەكىتىلدى.بۇل عىلىمي جوبالار بايقاۋىنا 2014 جىلى 15 جۇمىس قاتىسسا، 2015 جىلى عىلىمي جوبا 35 جۇمىسقا ارتتى. نەگىزىنەن، عىلىمي جوبالار قوعامداعى، نارىقتاعى سۇرانىستى باعدارلاۋدى، قازاقستان رەسپۋبليكاسىنىڭ عىلىمي-زەرتتەۋ جانە يننوۆاسيالىق قىزمەتىنە باعىتتالعان باسىمدىقتارىن جۇزەگە اسىرۋ ءۇشىن قولدانبالى جانە ىرگەلى زەرتتەۋلەردى جۇرگىزۋگە، يننوۆاسيالىق تەحنولوگيانى پايدالانۋ جانە ۋنيۆەرسيتەت قىزمەتىنىڭ مونيتورينگ ساراپتاماسىنا ارنالعان. 2015 جىلى الماتى وبلىسى اكىمىنىڭ «Very Innovative People-2015» اتتى يننوۆاسيالىق ويلار، جوبالار گرانتى بايقاۋىنا «بيولوگيا» ماماندىعىنىڭ 3-كۋرس ستۋدەنتتەرى فاريدا مۇقانوۆا، نازىم حاميتوۆا جانە گۇلجاۋحار تولەندى «قانت قىزىلشاسى تۇقىمىن كاپسۋلالاۋ ارقىلى ەگۋ ساپاسىن جانە ونىمدىلىگىن ارتتىرۋدىڭ جاڭا تەحنولوگياسىن دايىنداۋ» تاقىرىبى بويىنشا قاتىسىپ، الماتى وبلىسى اكىمىنىڭ گرانتىن ۇتىپ الدى.
ۋنيۆەرسيتەتتە بىلىمگەرلەردىڭ عىلىمي-زەرتتەۋ جۇمىستارىنا باسا نازار اۋدارىلىپ، كوڭىل ءبولىنۋى عىلىمدا وركەنيەتتىڭ ءبىر جولىن اشۋدا.
ەرلان انداسبايەۆ،
ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى جاراتىلىستانۋ-تەحنيكالىق فاكۋلتەتىنىڭ دەكانى.
الماتى وبلىسى
