استانا قالاسىنداعى №2 ەسىل اۋداندىق سوتىندا سەيىتقازى جانە اسەت ماتايەۆتاردىڭ ءىسى بويىنشا سوت وتىرىسى ودان ءارى جالعاسۋدا. بۇگىنگى وتىرىستا سوتقا تۇسىنىك بەرگەن سەيىتقازى ماتايەۆ سالىق تولەۋدە قاتەلىكتەر جىبەرگەنىن، سونىڭ ناتيجەسىندە ميلليونداعان سومانى تولەۋدەن جالتارعانىن مويىندادى.

«بارلىق ەسەپ-قيساپ جۇمىستارىمەن مەنىڭ مارقۇم دوسىم – الەكساندر قيماسوۆ اينالىستى. ول وتكەن جىلى 21 قىركۇيەكتە ماسكەۋدە اۋىر ناۋقاستان قايتىس بولدى. شىنىمدى ايتسام، ءوزىم ءالى كۇنگە دەيىن كومپيۋتەرمەن جۇمىس ىستەۋدى بىلمەيمىن. مەن سالىق تولەيتىن كەزدە 130.00 فورماسىن، 100.00، 101.04 فورمالارىن تاپسىرۋ كەرەكتىگىنەن حابارسىز بولدىم. سوندىقتان سالىق تولەۋدە قاتەلىكتەر جىبەرگەنىمدى مويىندايمىن. بۇل جەردە جاسىراتىن ەشتەڭە دە جوق»،- دەپ ءتۇسىندىردى س. ماتايەۆ. ونىڭ ايتۋىنشا، «ۇلتتىق باسپا ءسوز كلۋبى» قوعامدىق بىرلەستىگىنىڭ ۆيسە-پرەزيدەنتى قىزمەتىن اتقارعان ا. قيماسوۆ ەسەپ-قيساپپەن قوسا، تەندەرلىك قۇجاتتاردى دايىنداۋمەن اينالىسقان. سويتە تۇرا «ۇلتتىق باسپا ءسوز كلۋبى» قوعامدىق بىرلەستىگىنىڭ شتاتىندا جالعىز عانا سەيىتقازى ماتايەۆ تىركەلىپتى. «ۇلتتىق باسپا ءسوز كلۋبى» قوعامدىق بىرلەستىگىنىڭ شتاتىندا جالعىز ءوزىم عانا بولدىم. ال «قازتاگ» حالىقارالىق اقپارات اگەنتتىگى» ءجشس-نىڭ شتاتىندا 50-گە جۋىق قىزمەتكەرلەر جۇمىس ىستەدى. سولاردىڭ جالاقىسىن اگەنتتىك ءوزى تاۋىپ بەردى، مەملەكەتتەن اقشا العان جوق»،- دەدى س. ماتايەۆ سوتتاعى سوزىندە.

الماتى قالالىق مەملەكەتتىك كىرىستەر دەپارتامەنتىنىڭ سالىق تولەمدەرى بويىنشا تەكسەرۋىنەن انىقتالعانداي، سەيىتقازى ماتايەۆ زاڭدى تۇلعا رەتىندە بيۋدجەتكە 168 730 897 مىڭ تەڭگە كورپوراتيۆتىك تابىس سالىعىن تولەۋدەن جالتارعان. سونىمەن قاتار، جەكە تابىس سالىعى بويىنشا 2011-2015 جىلدارى 65 420 741 تەڭگە، رەزيدەنت بولىپ تابىلمايتىن تۇلعالار ءۇشىن 2011- 2014 جىلدارى 8 578 748 تەڭگە تولەنبەگەن. اتاپ ايتارلىعى، «ۇلتتىق باسپا ءسوز كلۋبى» قوعامدىق بىرلەستىگىنىڭ ىشكى ۇدەرىسىندە ءىرى كولەمدەگى اقشا اينالىمىنا بايلانىستى س. ماتايەۆ 100.00 (وندا زاڭدى تۇلعالاردىڭ كورپوراتيۆتىك تابىس سالىعى بويىنشا تابىسى كورسەتىلەدى)، 101.04 (بۇل رەزيدەنت بولىپ تابىلمايتىن زاڭدى تۇلعالار ءۇشىن تاپسىرىلادى) جانە 200.00 (وندا ازاماتتىق تۇلعالاردىڭ تابىسىن كورسەتەدى) ءنومىرلى سالىق تولەۋ فورمالارىن تاپسىرۋعا مىندەتتى بولعان. الايدا ول تابىسىن جاسىرىپ، تەك 130.00 سالىق تولەۋ فورماسىن تاپسىرىپ كەلگەن. وندا كوممەرسيالىق ەمەس ۇيىمنىڭ تابىسى كورسەتىلەتىندىكتەن سالىق تولەنبەيدى.

سوتقا دەيىنگى تەرگەۋ ءىس-شارالارىنان انىقتالعانداي، «2010-2015 جىلدار ارالىعىندا سەيىتقازى ماتايەۆ ءوز ۇلى – «قازتاگ حاا» ءجشس-ىنىڭ باس ديرەكتورى اسەت ماتايەۆپەن بىرلەسىپ، الدىن-الا ءبىر توپ ادامدارمەن ءسوز بايلاسىپ، الداۋ مەن سەنىمدى تەرىس ماقساتقا پايدالانۋ جولىمەن مەملەكەتتىك ساتىپ الۋ سالاسىنداعى 169 ملن. تەڭگە بيۋدجەت قاراجاتىن جىمقىردى» دەپ ايىپتالۋدا. ءبىراق ول مۇنداي ايىپتاۋلارمەن كەلىسكەن جوق. «مەن ەشقانداي اقشا ۇرلاعان جوقپىن. ەگەر كوپ اقشا ۇرلاسام، وعان پاتەرلەر مەن اۆتوكولىكتەر ساتىپ المايمىن با؟ «ۇلتتىق باسپا ءسوز كلۋبى» قوعامدىق بىرلەستىگىنىڭ قاراماعىندا بىردە-بىر كولىك جوق. ءبىز جۇمىس ىستەيتىن جەرگە جاقىن تۇراتىندىقتان اۆتوبۋسپەن نەمەسە جاياۋ قاتىنادىق. ءتىپتى بانككە دە جاياۋ باراتىنبىز»،- دەپ ءتۇسىندىردى س. ماتايەۆ. سوتتاعى سوزىندە ول ءوزىنىڭ دە، تۋىستارىنىڭ دا قاراجاتى جوقتىعىن ايتتى. «ءبارىن تەكسەردى. ءتىپتى مەنىڭ ەندى ءتاي-تايلاپ جۇرگەن نەمەرەلەرىمدى دە تەكسەردى. سول تەكسەرىلگەن 64 ادامنىڭ ىشىندەگى ۇشەۋى عانا تۋىستارىم: كەلىنىم، ءوزىم جانە ۇلىم»،- دەدى «ۇلتتىق باسپا ءسوز كلۋبى» ءقب-نىڭ پرەزيدەنتى.

ءامىرلان ءالىمجان