قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگى ءدىن ىستەرى كوميتەتى ءبىرقاتار ب ا ق بەتتەرىندە ەلىمىزدەگى مەشىتتەردە رەسمي ۋاعىزداردان كەيىن قوسىمشا تۇردە ونىڭ ورىس تىلىندە تۇسىنىكتەمەسى ايتىلۋى قاجەت دەگەن ماسەلە توڭىرەگىندە تۋىنداعان تالقىلاۋلارعا قاتىستى تۇسىندىرمە بەردى، - دەپ حابارلايدى Qamshy.kz.
«قازاقستان رەسپۋبليكاسى پارلامەنتى ماجىلىسىندە وتكەن ەكسترەميزم مەن تەرروريزمنىڭ الدىن الۋ ماسەلەلەرىنە ارنالعان دوڭگەلەك ۇستەلدە جەكەلەگەن مەشىتتەردە ۋاعىزداردان كەيىن يمامداردىڭ ورىس ءتىلىن پايدالانۋى تۋرالى ماسەلە مينيسترلىك تاراپىنان ەمەس، وسى شاراعا قاتىسۋشىلاردىڭ بىرىمەن كوتەرىلگەن بولاتىن. سايكەسىنشە، ق ر ءدىن ىستەرى جانە ازاماتتىق قوعام ءمينيسترى اتالعان ءىس-شارا بارىسىندا وسى ماسەلە توڭىرەگىندە جۋرناليستەر تاراپىنان سۇراقتار قويىلعاننان سوڭ ءبىرشاما تۇسىنىكتەمە بەرگەن بولاتىن» دەلىنگەن ءدىن جانە ازاماتتىق قوعام ىستەرى جونىندەگى مينيسترلىكتىڭ ءدىن ىستەرى كوميتەتى تاراتقان حابارلامادا.
كوميتەت ماماندارىنىڭ ايتۋىنشا، مۇنداي باستاما قازاق ءتىلىن ايتارلىقتاي مەڭگەرمەگەن ازاماتتارعا باعىتتالعان.
«مينيسترلىككە يسلامعا قىزىعۋشىلىق تانىتىپ جۇرگەن ءبىرقاتار ءدىندارلاردىڭ مەشىت يمامدارىنىڭ ۋاعىزدارىن تولىق تۇسىنبەيتىنى تۋرالى ەل ازاماتتارىنان وتىنىشتەر ءتۇسىپ وتىرادى. وتىنىشتەردە سونداي ءدىندارلاردىڭ وسى سەبەپتى يسلام تۋرالى اقپاراتتى قازاقستان مۇسىلماندارى ءدىني باسقارماسىنىڭ رەسمي كوزدەرىنەن تىس جەرلەردەن، ونىڭ ىشىندە تەرىس ءدىني اعىمداردىڭ ۇستانۋشىلارىنان الۋعا ماجبۇرلىك تانىتاتىنى تۋرالى ايتىلادى. سايكەسىنشە، ءوتىنىش جاساۋشى ازاماتتار حالىقارالىق تاجىريبەنى ەسكەرە وتىرىپ مەشىت يمامدارى رەسمي ۋاعىزداردان كەيىن قازاق ءتىلىن ايتارلىقتاي مەڭگەرمەگەن ازاماتتار ءۇشىن ورىس تىلىندە تۇسىندىرمە بەرۋدى ۇسىنادى.
وسى رەتتە، اتالعان ماسەلە تۇرعىندارىنىڭ قۇرامى كوپتەگەن ۇلتتاردان تۇراتىن ەلدىمەكەندەردەگى جەكەلەگەن مەشىتتەرگە عانا قاتىستى ەكەندىگىن ايتا كەتۋىمىز كەرەك»، - دەيدى كوميتەتتىڭ باسپا ءسوز قىزمەتىنەن.
حابارلامادا سونداي-اق، مينيسترلىك، ءوز كەزەگىندە، ازاماتتاردان ءتۇسىپ وتىرعان كەز-كەلگەن وتىنىشتەردى قاراستىرۋعا جانە ولاردى تالداپ وتىرۋعا مىندەتتى ەكەنى، مينيسترلىك قۇزىرەتىنە قازاقستان مۇسىلماندارى ءدىني باسقارماسىنىڭ ىشكى ماسەلەلەرىنىڭ شەشىمىن تابۋ كىرمەيتىنى ايتىلعان.
سوندىقتان جوعارىدا اتالعان ماسەلە بويىنشا مەشىتتەرگە كەلۋشىلەردىڭ پىكىرلەرىن ەسكەرە وتىرىپ شەشىم قابىلداۋى ءتيىس قازاقستان مۇسىلماندارى ءدىني باسقارماسىنا حابارلاسۋ كەرەك ەكەن.
ودان بولەك، ق ر ءدىن ىستەرى جانە ازاماتتىق قوعام مينيسترلىگى ءدىن ىستەرى كوميتەتى ەلىمىزدىڭ كونستيتۋسياسىندا كەپىلدىك بەرىلگەن ءسوز بوستاندىعىنا قۇرمەتپەن قاراي وتىرىپ، وتاندىق بۇقارالىق اقپارات قۇرالدارىن ءدىن ءتارىزدى وتكىر سالادا تۋىنداپ وتىراتىن ماسەلەلەر تۋرالى ەكىۇداي اقپارات بەرۋگە جول بەرمەۋگە جانە تۇرعىندارعا شىنايى اقپاراتتى دۇرىس جەتكىزۋگە شاقىرادى.
