ەلىمىزدە قازاقستاننىڭ مەملەكەتتىك تاۋەلسىزدىگىنە ارنالعان مادەني-ارحيتەكتۋرالىق ەسكەرتكىشتەر استانادا، الماتىدا، وبلىس ورتالىقتارى مەن باسقا دا ەلدى مەكەندەرىمىزدە ورناتىلعان. ال قاستەرلى تاۋەلسىزدىگىمىزگە ارنالعان سونداي ساۋلەت ونەرى تۋىندىسى شەتەلدە دە اشىلعانىن كوپشىلىك بىلە بەرمەس، دەپ جازادى اقوردانىڭ باسپا ءسوز قىزمەتى فەيسبۋكتەگى پاراقشاسىندا ، - دەپ حابارلايدى Qamshy.kz  قازاقپارات سايتىنا سىلتەمە جاساپ. 

«وسىدان تۋرا ون جىل بۇرىن، 2006 جىلعى 28 قىركۇيەكتە، مەملەكەت باسشىسى اقش-قا رەسمي ساپارى اياسىندا ۆاشينگتون قالاسىندا قازاقستان رەسپۋبليكاسى تاۋەلسىزدىك مونۋمەنتىنىڭ رەسمي اشىلۋ راسىمىنە قاتىستى»، دەلىنگەن جازبادا.

سوندا ەلباسى: «قازاقستان مەن اقش تاريحىندا بۇگىن ەرەكشە ءبىر كوڭىل تولقىتاتىن كۇن. تۇڭعىش رەت ءبىز قازاقستاننىڭ تاۋەلسىزدىك مونۋمەنتىن شەت ەلدە اشىپ وتىرمىز. ەگەمەن قازاقستاننىڭ سيمۆولىنا اينالعان وسى ەسكەرتكىشتىڭ اقش استاناسىندا بوي كوتەرگەنىن ماقتان تۇتامىز. حالقىمىزدىڭ ەركىندىك پەن تاۋەلسىزدىككە ۇمتىلىسىن سيپاتتايتىن وسى تاماشا ەسكەرتكىش قازاقستان مەن اقش-تى بەرىك دوستىق، ورتاق قۇندىلىقتارعا نەگىزدەلگەن ستراتەگيالىق ارىپتەستىك بىرىكتىرەتىنىن ءبىلدىرىپ تۇراتىن بولادى»، - دەگەن ەدى.

اقوردانىڭ باسپا ءسوز قىزمەتى قازاقستان پرەزيدەنتىنىڭ ۆاشينگتوندا تاۋەلسىزدىك مونۋمەنتىن اشقان سول ساتىنەن تۇسىرىلگەن فوتوسۋرەتتى وقيعانىڭ ونجىلدىعىنا وراي فەيسبۋك پايدالانۋشىلارىنىڭ نازارىنا ۇسىندى.