ۇلتتىق قوردى پايدالانۋدىڭ جاڭا تۇجىرىمداماسى ازىرلەنەدى. بۇل تۋرالى بۇگىن ق ر پارلامەنتى ءماجىلىسىنىڭ جالپى وتىرىسىندا دەپۋتاتتاردىڭ ساۋالىنا وراي ق ر ۇلتتىق ەكونوميكا ءمينيسترى قۋاندىق بيشىمبايەۆ ءمالىم ەتتى،- دەپ حابارلايدى Qamshy.kz قازاقپاراتقا سىلتەمە جاساپ.
مينيستر وتىرىس بارىسىندا «قازاقستان رەسپۋبليكاسىنىڭ ۇلتتىق قورىنان 2016-2018 جىلدارعا ارنالعان كەپىلدەندىرىلگەن ترانسفەرت تۋرالى» ق ر زاڭىنا وزگەرىس ەنگىزۋ تۋرالى» ق ر زاڭىنىڭ جوباسىن تانىستىرعان بولاتىن.
«قاراستىرىلىپ جاتقان زاڭعا سايكەس 2016 جىلى كەپىلدەندىرىلگەن ترانسفەرتتىڭ مولشەرى 400 ملرد تەڭگەگە ازايتىلىپ، ال 2017-2018 جىلدارى بۇرىن بەكىتىلگەن 2480 ملن تەڭگەنى قاراستىرىپ وتىرسىزدار. سونىمەن قاتار بۇگىنگى تاڭدا ماجىلىستە 2017-2019 جىلدارى ۇلتتىق قوردان كەپىلدەندىرىلگەن ترانسفەرت تۋرالى جاڭا زاڭ جوباسى قارالىپ جاتىر. وندا 2017، 2018 جانە 2019 جىلدارعا ارنالعان كەپىلدەندىرىلگەن ترانسفەرت مولشەرى كەرىسىنشە 2 880 ملرد تەڭگە دەڭگەيىندە جوسپارلانۋدا. سىزدەر وسى جىلى ترانسفەرت مولشەرىن ازايتتىڭىزدار، الايدا كەلەسى جىلدارى ترانسفەرت مولشەرىن وسىنشا سوماعا دەرلىك ۇلعايتىپ وتىرسىزدار. وسى جوسپاردىڭ نەگىزگى سەبەبى نەدە؟»، - دەپ سۇرادى مينيستردەن ءماجىلىس دەپۋتاتى ايزادا قۇرمانوۆا.
ءوز كەزەگىندە ق.بيشىمبايەۆ بۇل 2016 جىلدىڭ باسىنداعى بولجامعا بايلانىستى جايت ەكەندىگىن اتاپ ءوتتى.
«بولجامىمىز وتە پەسسەميستى تۇردە جاسالعان بولاتىن. قازىرگى جاعدايدا، 8 ايدى قاراعاندا بولجامىمىزدان بۇگىنگى جاعداي جاقسى دەۋگە بولادى. ويتكەنى، ەكونوميكانىڭ، ونىڭ سالالارىنىڭ ءوسۋى بايقالادى. مۇناي ءوندىرۋ كولەمى دە ۇلعايۋدا. 8 ايدىڭ بۇل ناتيجەسى ءبىزدىڭ بولجامىمىز پەسسيميستىك بولعانىن دالەلدەيدى. بيىل 800 ملرد تەڭگەدەن استام قوسىمشا سالىق كىرىستەرى جانە باسقا دا كىرىستەر الىنادى. وسىعان وراي بيىل كەپىلدەندىرىلگەن ترانسفەرتتى تومەندەتۋگە مۇمكىندىك تۋىندايدى. ال كەلەسى جىلداردى الار بولساق، پارلامەنتكە ەنگىزىلگەن 2017 جىلدىڭ بيۋدجەتىندە ءبىزدىڭ بولجامىمىز كونسەرۆاتيۆتى تۇردە كورسەتىلگەن. ۇلتتىق قوردى پايدالانۋ تۇجىرىمداماسىنا سايكەس ءبىز جىل سايىن 8 ملرد دوللاردى، تەڭگەگە شاققاندا 2 880 ملرد تەڭگەنى الۋعا قۇقىعىمىز بار. ءبىراق، وسى جىلدىڭ سوڭىنا دەيىن جاڭا تۇجىرىمداما ازىرلەيتىن بولامىز. ويتكەنى، ۇلتتىق قوردى بۇلاي پايدالاناتىن بولساق، ونىڭ تومەندەۋ ءقاۋىپى وتە جوعارى»، - دەدى ق.بيشىمبايەۆ.
