بۇگىن قازاق ەلىنىڭ تاۋەلسىزدىگى ءۇشىن كۇرەسكەن كەيكى باتىردىڭ باس سۇيەگى تاڭعى 5:30-دا استاناعا جەتكىزىلدى. ق ر مادەنيەت جانە سپورت مينيسترلىگى وسى ماسەلەگە قاتىستى ارنايى جۇمىس توبىن قۇرعان. جۇمىس قورىتىندىسى بويىنشا، باس سۇيەك كەيكىنىكى ەكەندىگى دالەلدەندى. ءبىراق سوعان قاراماستان ءتيىستى دنق-ساراپتاما جاسالادى. بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ۆەدومستۆو ۆيسە-مينيسترى اقتوتى رايىمقۇلوۆا مالىمدەدى،- دەپ حابارلايدى Qamshy.kz Baq.kz-كە سىلتەمە جاساپ.

«مادەنيەت مينيسترلىگى وسى ماسەلەگە قاتىستى ارنايى جۇمىس توبىن قۇردى. ونىڭ قۇرامىنا عالىمدار، مۋزەي قىزمەتكەرلەرى، ارحەولوگتار، انتروپولوگتار كىردى. ولار ءتيىستى زەرتتەۋ جۇمىسىن جۇرگىزدى. زەرتتەۋ جۇمىسىنا سايكەس، بۇل كەيكى باتىردىڭ باسى ەكەندىگىن سەنىمدى تۇردە ايتۋعا بولادى. ءبىراق سوعان قاراماستان دنق-ساراپتاما جاسالادى. قازىرگى تاڭدا ۆەنگريالىق عالىمدارمەن وسى ماسەلەگە قاتىستى كەلىسسوز جۇرگىزىلۋدە. ولار زەرتتەۋ جۇمىسىن قولعا الۋعا دايىن»، - دەدى ۆيسە-مينيستر.

اقتوتى رايىمقۇلوۆا قازاق ەلىنىڭ تۇتاستىعى ءۇشىن كۇرەسكەن باتىر ءوز ەلىندە جەرلەنەتىندىگىن اتاپ ءوتتى.

«حالقىنىڭ تاۋەلسىزدىگى ءۇشىن كۇرەسكەن قازاق باتىرى ءوزىنىڭ تۋعان جەرىندە جەرلەنۋى قاجەت. ءبىز العا تاعى ءبىر قادام جاسادىق. مەن ونى ۇلكەن قۋانىشپەن ايتا الامىن»، - دەدى ول.

سونىمەن قاتار، ق ر مادەنيەت جانە سپورت ۆيسە-مينيسترى الداعى ۋاقىتتا كەنەسارى حاننىڭ باس سۇيەگىن اكەلۋ بويىنشا ءتيىستى جۇمىستار جۇرگىزىلەتىندىگىن ايتتى.

«كەنەسارى حانعا دا قاتىستى جۇمىستار جۇرگىزىلۋدە. بۇل ءبىر كۇننىڭ شارۋاسى ەمەس. وسى باعىت بويىنشا جۇمىس جۇرگىزەتىن بولامىز. ونىڭ ناتيجەسى دە وسىنداي بولادى دەگەن ۇمىتتەمىن»، - دەپ تۇيىندەدى ءسوزىن ا.رايىمقۇلوۆا.