الماتى وبلىسى جامبىل اۋدانىندا ايۋاندىقپەن ولتىرىلگەن ءۇش ازاماتتىڭ تۋىستارى ەلباسىدان اتۋ جازاسىن قايتا ەنگىزۋدى سۇرادى، - دەپ حابارلايدى Qamshy.kz.
جارقىنبەك دولدان ۇلى، مۇقيات زارلىحان ۇلى جانە قادىلبەك ءالىمحان ۇلى ەسىمدى ءۇش ازاماتتىڭ ۇزىناعاش بازارىنا مال ساتۋعا كەلىپ جوعالعانىن، كەيىن ولاردىڭ ايۋاندىقپەن ولتىرىلگەنىن جازعان بولاتىنبىز. قاندى قىلمىسقا قاتىسى بار دەگەن كۇدىكپەن تالعات سۇلەيمەنوۆ، مۇرات وڭالبايەۆ ەسىمدى ەكى ازامات قاماۋعا الىنعان.
توبەدەن تۇسكەندەي بولعان اۋىر قىلمىستان ەستەرىن جيىپ ۇلگىرمەگەن ولار مۇنداي قىلمىسكەرلەر ءۇشىن ءولىم جازاسىن قولدانۋدى قايتا ەنگىزۋ كەرەك دەپ سانايدى.
«مەنىڭ عانا ءوتىنىشىم ەمەس شىعار، ءولىم جازاسىنا ەنگىزىلگەن ءموراتورييدى الىپ تاستاۋدى سۇرايمىز. ايەل زورلاعان، ايۋاندىقپەن كىسى ولتىرگەندەر ءولىم جازاسىنا كەسىلۋى كەرەك»، - دەيدى مارقۇمداردىڭ ءبىرىنىڭ تۋىسى ەركىن بەيسەكەي ۇلى.
مارقۇمداردىڭ تۋىستارى قىلمىستى تەرگەۋ بارىسىنا كوڭىلدەرى تولمايتىنىن، پوليسيا قىزمەتىندە سالعىرتتىق بارىن ايتادى. ولاردىڭ ايتۋىنشا، قىلمىس ورنىندا تەرگەۋگە سەپ بولاتىن ءبىرشاما ايعاق زاتتار سول جەردە قالىپ قويعان. كۋاگەرلەردەن دە تولىق جاۋاپ الىنباعان.
«وسى ءىستى اياعىنا دەيىن جەتكىزە الاتىن مەملەكەتتىك ورگاندارعا، «نۇر وتان» پارتياسىنا سەنەمىن. بۇل قىلمىس ەكى ادامنىڭ ءىسى ەمەستىگىن تولىق تەكسەرىپ، حالىقتىڭ رازىلىعىن الادى دەپ سەنەمىن. قىلمىستى اشۋعا تالپىنباعان ۇزىناعاش پوليسياسىنىڭ جاۋاپكەرشىلىگىن انىقتاۋدى سۇرايمىز»، - دەيدى ايۋاندىقپەن ولتىرىلگەن ءۇش ازاماتتىڭ تۋىسى تۇرسىن ءامىرباي ۇلى.
قازا بولعان ءۇش جىگىتتىڭ ارتىندا ايەلدەرى جەسىر، سەگىز بالا جەتىم قالدى. مارقۇمداردىڭ تۋىستارى مەملەكەتتىك مەكەمەلەردەن وسى وتباسىلارعا ماتەريالدىق جاردەم كورسەتىلسە دەپ تىلەيدى.
