"قازاقستان اۆياسيا زاۋىتى" رەسەيلىك "تاگانروگسكيي اۆياسيالىق عىلىمي-تەحنيكالىق كەشەنىمەن" بىرىگە وتىرىپ پەتروپاۆلدا اۆياسيالىق زاۋىت سالۋدىڭ ءىرى ينۆەستيسيالىق جوباسىن قولعا الدى. بۇل تۋرالى NUR.KZ پورتالىنا سىلتەمە جاساپ Qamshy.kz حابارلايدى.
زاۋىت 2020 جىلى قولدانىسقا بەرىلەدى دەپ كۇتىلۋدە.
"بۇگىندە ينۆەستورلار پەتروپاۆل حالىقارالىق اۋەجايى ماڭىنان جەر ءبولۋدى سۇراۋدا. ينۆەستيسيالىق دامۋ مينيسترلىگى جانە قازاقستاننىڭ ازاماتتىق اۆياسيا كوميتەتىمەن كەلىسىمدەر جاسالىپ قويعان... قۇرىلىستى 2017 جىلى باستاۋ جوسپارلانىپ وتىر. الايدا بۇگىننىڭ وزىندە "قازاق ينۆەست" قارجى توبى تاگانروگا زاۋىتىنىڭ ءبىر جۇك ۇشاعىن ساتىپ الىپ، قولدانىسقا ەنگىزىپ كورۋگە ءازىر"، - دەيدى سقو يندۋستريالدى-يننوۆاسيالىق دامۋ باسقارماسىنىڭ باسشىسى جانات ءسادۋاقاسوۆ.
ءسادۋاقاسوۆتىڭ ايتۋىنشا، پەتروپاۆلدا وتكەن ەكىنشى حالىقارالىق ينۆەستيسيالىق فورۋمدا تاگانروگا زاۋىتىنىڭ باس كونسترۋكتورى گرۋدينين يۋ.ۆ. مەن سولتۇستىك قازاقستان وبلىسى اكىمىنىڭ ورىنباسارى احمەتوۆ ر.ب. 67،1 ملرد تەڭگە قاراجاتقا اۆياسيالىق زاۋىت سالۋ بويىنشا ينۆەستيسيالىق جوبانى ىسكە اسىرۋعا بايلانىستى مەموراندۋمعا قول قويعان.
"بۇل جوبا بويىنشا بە-132 مودەلىندەگى جولاۋشى ۇشاقتارىن جىلىنا 70 بورتقا دەيىن قۇراستىرۋ جوسپارلانىپ وتىر. بۇل ۇشاقتار قيىن مەتەوجاعدايلاردا دا ۇشا الادى. قۇراستىرۋشىلار ۇشاقتىڭ ۇزاققا شىداس بەرەتىنىنە ۋادە ەتۋدە"، - دەيدى "قازاقستان اۆيسايا زاۋىتىنىڭ" باس ديرەكتورى انتون پرودانوۆ.
