قۇمساي اۋىلىندا تۇراتىن بوقانوۆتار وتباسى 25-تەگى ۇلىن دارمەنسىزدىكتەن بايلاپ ۇستاۋعا ءماجبۇر،- دەپ حابارلايدى Qamshy.kz كتك ارناسىنا سىلتەمە جاساپ.
زىڭگىتتەي جىگىت تالماسى ۇستاعان ساتتە ەشكىمگە ءال بەرمەي كەتەدى. جاقىندا ءتىپتى اكەسىنىڭ ساۋساعىن شايناپ تاستاعان.
نۇنباي بوقانوۆ، ا.بوقانوۆتىڭ اكەسى:
-اندا-ساندا «كوتەرىلەدى». سول كوتەرىلگەن كەزدە كوشەگە شىعىپ بىرەۋگە زيانى ءتيىپ كەتە مە دەگەن وي بولدى . اياق-قولى بايلاۋلى تۇرادى. سوندا دا سول ساۋساعىمدى تىستەپ الدى.
ازاماتتى اتا-اناسى ءبىر ساتتە كوزدەن تاسا قىلعان ەمەس. ءوزى دە اۋلادان ارىگە شىقپاي، كۇندىز جاقىندارىنا قولعابىس بەرىپ جۇرەدى. تەك تۇندە بۇل شاڭىراقتىڭ تىنىشتىعى قاشادى. ازامات كوتەرىلگەندە نە ىستەپ، نە قويعانىن بىلمەيدى.
ازامات بوقانوۆ:
-كۇندىز دەنى ساۋ ادام قۇساپ جۇرەمىن. اكە-شەشەمنىڭ قاسىندا جاتامىن قۇتتاي بالا سياقتى. بىلاي-بىلاي شىعا دا المايسىڭ. شارشادىم.تۇسىنبەيمىن. ەمدەلگىم كەلەدى...
بۇل دەرت جىگىتكە اسكەردە تاپ بولعان. اۋىر سوققى العان كۇنى العاش ەسىنەن تانادى. ءۇشارالداعى ءبولىم باسشىلارى توبەلەس بولعانىن جاسىرىپ، ونى ەپەلەپسيامەن اۋىرعان دەپ ەلىنە شىعارىپ سالعان كورىنەدى.
ازامات بوقانوۆ:
-بەسەۋى جابىلدى. توبەلەس قالاي اياقتالعانىن ءوزىم دە بىلمەي قالدىم. تاڭەرتەڭ كازارما ىشىندە جاتىرمىن. تۇلا بويىم، اياق-قولىم تارتىلىپ.
وتان قورعايمىن دەپ بارىپ، اۋرۋ جاماپ قايتقان ۇلىنىڭ بولاشاعىنا اتا-اناسى الاڭدايدى. كوتەرىلگەندە الاسۇراتىن ونىمەن ارپالىسىپ وزدەرى دە شارشاعان. وسى كۇنگە دەيىن كورسەتكەن مامانداردىڭ ەشبىرى ناقتى دياگنوزدى قويا المادى. ءتىپتى جىندىحاناعا جاتقىزعان. ونداعىلار ساۋ دەپ شىعارىپ سالىپتى.
زىليحا سماعۇلوۆا، ا.بوقانوۆتىڭ اناسى:
-جىلاپ-ەڭىرەپ اكەسى ەكەۋمىز بارماعان جەرىمىز جوق. رەسەيگە دەيىن باردىق وسىعان ءبىر شيپا ىزدەپ. ءبىز بالامىزدى ارمياعا اۋرۋ بوپ قايتسىن دەپ جىبەرمەگەن ەدىك....
بۇل وتباسى ەمشى دەسە ەلەڭدەپ، ۇلدارىنىڭ دەرتىن انىقتايتىن مامان ىزدەپ وتىر. ايماقتاعى دەنساۋلىق ساقتاۋ باسقارماسىنداعىلار ەم-دومىمەن اينالىسامىز دەپ ۋادە ەتتى. دەسە دە، وسىنداي جاعدايعا تاپ قىلعان اسكەريلەردىڭ ارەكەتى كەش بولسا دا جاۋاپسىز قالماسا دەپ تىلەيدى اتا-اناسى.
