- 16 جاستا سۇيەگىڭ قاتايىپ، دەنە مۇشەلەرىڭ تولىق قالىپتاسا باستايدى. سوندىقتان دا شامادان تىس زىلدەي اۋىر سالماق كوتەرمە. سپورتپەن نەمەسە وتە كوپ كۇش جۇمساۋدى قاجەت ەتەتىن ىسپەن ەسىڭنەن تامعانشا اينالىسۋشى بولما. بۇل سەنىڭ كەلەشەك ومىرىڭە قاتەر. ارقايسىمەن كەرەگىنشە عانا اينالىس.
- اۋزىڭا اراق (نەمەسە شاراپ) تامشىسىن اپارۋشى بولما. تەمەكى ۇستاپ تا، تارتىپ تا ۇيرەنبە. ىشىمدىكتىڭ قانىڭا ابدەن ارالاسقان ءاربىر ءزارلى مىسقىلى سەنىڭ جاقسى ءوسىپ كەلە جاتقان دەنە مۇشەلەرىڭدى كۇرت توقتاتىپ، باۋىر، نەرۆ جۇيەلەرىن تەز توزدىرىپ، سارىتاپ بولا باستايسىڭ. ءسويتىپ، ءتۇرىڭ، دەنە مۇشەلەرىڭ مەن دەنساۋلىعىڭ جاعىنان ءوز قاتارىڭنان مۇلدە قالىپ، كەيىننەن دەرتتى بولا باستايسىڭ.
- ەشقاشان ءبىر تاماقتى تويا جەۋشى بولما. ءبىراق، شاماڭ كەلگەنشە دۇرىس تاماقتان. قازاق داستارقانىنداعى ءداستۇرلى تاعامدارعا قوسا، مۇمكىندىگىنشە، جەمىستەر مەن كوكەنىستەردى مولىراق قابىلدا. اعارعاندى (ءسۇت، ايران، ىرىمشىك، قۇرت، قىمىز، ت.ب.) داستارقاننان قالدىرماۋعا تىرىس. بەتالدى ءشاي ءىشىپ، نان جەي بەرۋ وتە زيان.
- ءوزىڭنىڭ ءاربىر كۇنگى ۋاقىتىڭدى الدىن-الا ناقتى جوسپارلاپ، اتقاراتىن ىسىڭە قاراي ساعات-ساعاتقا ءبولىپ ۇيرەن. بۇگىنگى شارۋانى ەرتەڭگە قالدىرۋشى بولما. مەزگىلىمەن دەمالا ءبىل. ءبىلىم الۋدان تىسقارى مەزگىلدە ءۇي ءىشىڭ ءۇشىن ايانباي ەڭبەك ەتىپ ۇيرەن. كىتاپتان الاتىن ءبىلىم مەن قارا جۇمىس ىستەۋدەن الاتىن ءلاززاتىڭ سەنى الداعى 4-5 جىلدا مىقتى ازامات ەتىپ قالىپتاستىرادى. سوندا سەن ءوز قۇرداستارىڭنان وق بويى وزىپ كەتكەنىڭدى بايقايسىڭ.
- ءوز قاتارىڭمەن (دوس-قۇربىلارىڭمەن)، ەرەسەك ادامدارمەن (مۇعالىمدەرىڭمەن، اتا-اناڭمەن، اۋىل ايماقتاعى ەگدە كىسىلەرمەن، ت.ب.) وسى باستان ارالاسىپ، اشىق سويلەسىپ ۇيرەنە بەر. ولارمەن ارالاسىپ، ەركىن پىكىر الماسۋ كەزىندە ومىردەن جيناعان ازدى كوپتى ءوز تاجىريبەلەرىڭ مەن كىتاپتان العان بىلىمدەرىڭدى ەپتەپ قولدانا باستا. كورگەن بىلگەنىڭنەن ۇنەمى قورىتىندى شىعارا ءبىل.
مىنە، دوسىم! وسى ايتىلعان ومىرلىك داعدىلاردى بىرتە بىرتە ءوز بويىڭا ءسىڭىرىپ، ىزدەنە تۇسسەڭ، سەن كوپ ۇزاماي 4-5 جىلدا جۇرت كوزىنە ءبىلىمدى، ىسكەر، ىزدەنىمپاز، قىسقاسى وتە كورنەكتى جىگىت بولىپ شىعاسىڭ. ارمەن قاراي سەنىڭ ءومىر جولىڭ...وزىنەن ءوزى سايراپ جاتادى.
