تاعى دا تەرروريستەر قاندى قىرعىن سالا جازدادى! ۇلتتىق قاۋىپسىزدىك كوميتەتى بۇل جولى الماتىنىڭ كۇلىن كوككە ۇشىرماق بولعان 3 لاڭكەستىڭ قولىنا كىسەن سالىپ، جويقىن جارىلىستىڭ الدىن الدى. جات دىنگە شىرمالىپ ساناسى ۋلانعان راديكالدار پوليسيا، پروكۋرور مەن سۋديالاردى نىساناعا العان ەكەن، - دەپ حابارلايدى Qamshy.kz كتك-عا سىلتەمە جاساپ. 

الايدا ارنايى قىزمەت قاسكويلەردى دەر كەزىندە قۇرىقتاپ، حالىقتى تاعى ءبىر اجالدان امان الىپ قالدى. ۇستالعانداردان جارىلعىش زاتتار مەن تەراكت جاساۋعا ۇندەيتىن ەكسترەميستىك ماتەريالدار تابىلعان. انىعى - لاڭكەستەر الماتىنىڭ بىرنەشە جەرىندە پوليسيا، پروكۋراتۋرا مەن سوت عيماراتتارىنا شابۋىل جاساۋعا تىڭعىلىقتى ازىرلەنىپتى. ءبىراق، جوسپارلارىن الدىن-الا ءبىلىپ قويعان ۇلتتىق قاۋىپسىزدىك كوميتەتى جارىلىستى بولدىرماي تاستادى. ال، بيىلدىققا ارنايى قىزمەت ەل بويىنشا ويران سالماق بولعان 70-تەن استام راديكالدى توپتىڭ جولىن كەسكەن. سوندا دا ءقاۋىپ سەيىلمەي تۇر. ويتكەنى وبلىس ورتالىقتارىنداعى حالىق كوپ جينالاتىن قوعامدىق ورىندار، بازار مەن ساۋدا ورىندارىنا كەز-كەلگەن ساتتە تەرروريستەر باسىپ كىرۋى ابدەن مۇمكىن. بۇعان عيماراتتاردىڭ ءجوندى قورعالماۋى سەبەپ.