ءقادىرلى وقىرمان!
پورتالىمىزدا جاريالانعان "ارانداتۋشىنىڭ ارتىندا كىم تۇر؟" دەگەن ماقالاعا قاتىستى رەسمي تۇسىنىك بەرۋدى ءجون سانايمىز! بىردەن ايتۋ كەرەك، وتكەن سەنبى كۇنى جاريالانعان ول ماقالا رەداكسيانىڭ كوزقاراسىن بىلدىرمەيتىن، ماڭىزدى ەلدىك ماسەلەگە قاتىستى قاراماي-قايشىلىققا تولى جازبا. ەلەكتروندى پوشتاعا كەلگەن كوپ ماتەريالدىڭ ءبىرىن سەنبى كۇنى كەزەكشىلىكتە بولعان جاس قىزمەتكەر ماسەلەنىڭ مانىسىنە بارماستان جاريالاپ جىبەرگەنى انىقتالىپ وتىر. انىقتالا سالىسىمەن ول ماتەريال سايتتان ءوشىرىلدى. سونىمەن قاتار، الگىندەي سارىنداعى نەگىزسىز ايىپتاۋلاردان تۇراتىن ماقالالار وزگە دە اقپارات قۇرالدارىنا جولدانعانى بەلگىلى بولىپ وتىر. ءتىپتى، الەۋمەتتىك جەلىدە الدەبىر توپتار وسى باعىتتا ماقساتتى تۇردە جۇمىس ىستەپ وتىرعانداي اسەردە قالدىق.
رەداكسيانىڭ ۇستانىمىن بىلدىرمەيتىن ماتەريالدىڭ جاريالانۋىنا كىنالى بىرنەشە قىزمەتكەر شىعارماشىلىق ۇجىمنىڭ ىشكى ەرەجەلەرىن بۇزعانى ءۇشىن تارتىپتىك جازاعا تارتىلدى! ماقالاداعى جايتتارعا قاتىستى ايتارىمىز – ول رەداكسيانىڭ ۇستانىمى ەمەس. "قامشى" پورتالى ەل اۋماعىندا جەر رەفورماسىنا قاتىستى بارلىق نارازىلىق شارالارىن اشىق، تولىققاندى جاريالاپ وتىرۋعا تىرىستى. وسىعان دەيىن قازاق حالقىنىڭ باتىر ۇلدارى ماكس پەن تالعاتقا بوستاندىق بەرىلۋىن تالاپ ەتكەن بىرنەشە ماتەريال دا جاريالادىق. بۇل باعىتتا ەشقانداي شەكتەۋ بولعان ەمەس. جەر مەن ءتىل، ءدىن ماسەلەسىندە رەداكسيا ۇستانىمى الداعى ۋاقىتتا دا وزگەرمەيدى.
ورىن العان قولايسىز جايتقا بايلانىستى وقىرمانداردان، جەر مەن ەل تاعدىرىنا الاڭداۋلى بارشا اعايىننان كەشىرىم سۇرايمىز. اتىراۋداعى جەر ميتينگىسىن ۇيىمداتىرعان جىگىتتەردىڭ سوتى ادىلدىك قاعيدالارىنا ساي ءوتىپ، ازاماتتاردىڭ تەزىرەك وتباسىنا ورالۋىنا تىلەكتەسپىز! سايتتىڭ رەداكتورى رەتىندە جەكە ءوز اتىمنان الگى ماقالاسىماقتا ايتىلعان جايلار ءۇشىن قوس ازاماتتان، ولاردىڭ تۋىستارى مەن دوستارىنان، جەر تاعدىرىنا بەيجاي قارامايتىن بارشا ازاماتتاردان كەشىرىم وتىنەمىن.
"قامشى" پورتالىنىڭ باس رەداكتورى: دارحان مۇقانتەگى
