قازۇۋ-دىڭ سپورتشى ستۋدەنتتەرىنىڭ ەلىمىزدە عانا ەمەس سونىمەن قاتار حالىقارالىق ارەنادا باعىندىرىپ جۇرگەن بيىك بەلەستەرى ۋنيۆەرسيتەت جاستارىنىڭ اسقان دارىندىلىقتارى مەن شەبەرلىكتەرىنىڭ ايقىن كورسەتكىشى. قازاق كۇرەسىنەن وتكەن ءىىى الەم چەمپيوناتىندا اعايىندى عۇسمان مەن عۇمار قىرعىزبايەۆتار 60 جانە 70 كەلىگە دەيىنگى سالماق دارەجەسىندە 2 التىن مەدالعا يە بولدى- دەپ حابارلايدى Qamshy.kz .

اعايىندىلاردىڭ ۇلكەنى عۇسمان قورىتىندى بەلدەسۋدە وزبەكستان بالۋانىن تىزە بۇكتىردى. «ءبىز عۇمار ەكەۋمىز جارىس باستالماي تۇرىپ كىم كوبىرەك تازا جەڭىسكە جەتەدى دەپ باستەسكەن ەدىك. مەن جەڭدىم»، – دەدى عۇسمان ەستەلىكتەرىمەن ءبولىسىپ.

«قورىتىندى ايقاستا قىتايدان كەلگەن سپورتشىنى جەڭدىم. چەمپيوناتقا كىل مىقتىلار جينالعان، بارلىق قارسىلاستار جاقسى دايىندىقپەن كەلگەن. بارىنەن دە مونعوليادان كەلگەن سپورشىمەن بەلدەسكەن قيىنداۋ بولدى. ول دەنەنىڭ جوعارى بولىگىن قارماپ ۇستادى، ال مەنىڭ ايلام ونىڭ قۋلىعىن جۇزەگە اسىرمادى»، – دەيدى عۇمار.

وقۋ مەن جاتتىعۋدى تابىستى قاتار الىپ جۇرگەن اعايىندى قىرعىزبايەۆتار زاڭ فاكۋلتەتىنىڭ ءبىرىنشى كۋرس ستۋدەنتتەرى. «قازۇۋ ەڭ ۇزدىك ۋنيۆەرسيتەت. مۇندا ستۋدەنتتەردىڭ بەلسەندى ءومىرى ءۇشىن بارلىق قولايلى جاعدايلار جاسالعان. وقىتۋشىلار دا بارلىق باستامالارىمىزعا ۇنەمى قولداۋ كورسەتىپ جۇرەدى»، – دەيدى پالۋاندار.

«جىگىتتەر حالىقارالىق دارەجەدەگى سپورت شەبەرلەرى. قارسىلاستار ءبىزدىڭ سپورتشىلارمەن بەلدەسۋگە ەرەكشە دايىندالعان. حالىقارالىق جارىستارعا قازاقستاندىق بالۋانداردىڭ قاتىسۋى ءبىزدىڭ ۇلتتىق سپورت تۇرلەرى مەن سپورتتىق داستۇرلەرىمىزگە بەرىلگەن قۇرمەت دەپ بىلەمىن. عۇسمان مەن عۇمار ەلىمىزدى جانە وزدەرى وقيتىن ۋنيۆەرسيتەتتىڭ اتاعىن اسقاقتاتىپ جۇرگەن پالۋاندار»، – دەپ قازۇۋ جاتتىقتىرۋشىسى فايزۋللا قويشىمانوۆ ماقتانىشپەن اتاپ ءوتتى.

          پالۋاندار قازاق كۇرەسىنەن عانا ەمەس، سونىمەن قاتار دزيۋدودان دا رەسپۋبليكالىق جانە حالىقارالىق جارىستاردىڭ بىرنەشە دۇركىن چەمپيوندارى. عۇسمان مەن عۇمار وسى باعىتتارىنان تايماي، 2020 جىلى توكيودا وتەتىن وليمپيادا ويىندارىندا التىن الۋعا بەكىنىپ وتىر.

چەمپيونداردىڭ ايتۋىنشا بوساڭسۋعا بولمايدى. الداعى ۋاقىتتا اعايىندى پالۋاندار قازاق كۇرەسىنەن وتەتىن IV حالىقارالىق چەمپيوناتقا قاتىسۋدى جوسپارلاپ وتىر. «ءبىز «ەۋرازيا بارىسى» اتاعىنا ب ا ق سىناۋعا دايىنبىز»، – دەدى عۇمار قىرعىزبايەۆ.

جۇڭگو حالىق رەسپۋبليكاسىندا قازاق كۇرەسىنەن وتكەن ءىىى الەم چەمپيوناتىنا 28 ەلدەن 200-دەن اسا سپورتشى قاتىستى. قازاقستان كومانداسىنان بەس سالماق دارەجەسى بويىنشا التى سپورتشى باقتارىن سىنادى. ناتيجەسىندە ءبىزدىڭ سپورتشىلار 5 التىن مەدالعا يە بولدى. ونىڭ ەكەۋىن قازۇۋ ستۋدەنتتەرى قانجىعالارىنا بايلادى.

ءال-فارابي اتىنداعى قازاق ۇلتتىق ۋنيۆەرسيتەتىنىڭ ۇجىمى عۇسمان مەن عۇماردى الەم چەمپيوناتىندا جەتكەن جەتىستىكتەرىمەن قۇتتىقتايدى. ءبىز سىزدەرمەن جانە سىزدەر باعىندىرعان بيىك بەلەستەرمەن ماقتانامىز!

سىزدەرگە زور دەنساۋلىق پەن جاڭا جەڭىستەر تىلەيمىز!

ايكەرىم كامالدينوۆا