ءيا، ءبارى تازالىقتان باستالادى. دەنساۋلىق، تازالىق، جانعا جايلى اتموسفەرا جاپونياداعى سانتەحنيكا ونىمدەرىن شىعاراتىن كومپانيالار وسىنى ءاردايىم ەستە ۇستادى. ولار ءتىپتى ءبىر وتىرعاندا قان قىسىمىن ولشەپ، جۇرەك سوعىسىن تەكسەرىپ بەرەتىن دارەتحانانى دا جاساپ شىعاردى. جاپونياداعى مەكەمەلەر عانا ەمەس، تۇرعىن ۇيلەردىڭ كوپشىلىگىندە پايدالاناتىن بۇنداي دارەتحانانى EXPO-2005 كورمەسىنە بارعان ەۋروپالىقتار العاش كورمەدە كورىپ قاتتى تاڭدانعان. كەيبىر رەسەي جۋرناليستەرى ۋنيتاز جاپون تىلىندە ءتىل قاتقاندا نە دەرىن بىلمەي ساسىپ قالعانىن دا اقپارات قۇرالدارىندا جازدى. 

جاپون ماماندارى ادام دەنساۋلىعى ءۇشىن وتە ماڭىزدى زات، ياعني دەنساۋلىققا قىزمەت ەتەتىن زاماناۋي ۋنيتاز جاساپ شىعارىپ، دۇنيەجۇزىن تاڭقالدىرىپ وتىر. جاپونداردىڭ وزدەرى تاڭدانبايتىن، قاراپايىم نارسە دەپ قابىلدايتىن جاڭا ۋنيتازدى دا ينتەللەكتۋالدى دەپ اتاساق بولعانداي.

ءيا، قاراپايىم نارسەنى تاڭعاجايىپ ەتىپ جاساۋعا جاپوندار ماشىقتانعان. كوبىنەسە قوناقۇيلەردەن كورىنەتىن بۇل ۋنيتازدىڭ قاقپاعى ادام وعان جاقىنداعان ساتتە وزدىگىنەن اشىلادى. ۇستىنە وتىرعاندا ادام ءوزىنىڭ دەنە تەمپەراتۋراسىنداي جىلىلىقتى سەزىنەدى. دارەتحانالارداعى ساف اۋا، قوڭىرسالقىن اتموسفەرا ناعىز تىنىعۋعا ارنالعانداي. كىسى وتىرعان ساتتە فلەش جادىعا ەنگىزىلگەن مر3 فورماتىنداعى كوپ اۋەننىڭ ءبىرى ويناي باستادى. ادام دەنساۋلىعىن باستى ورىنعا قوياتىن جاپون ماماندارى ەكى اياقتى پەندەنىڭ دارەتحاناعا كىرىپ، قاجەتىن وتەۋ پروسەسىنىڭ ءوزىن ونىڭ دەنساۋلىعىنا وتە پايدالى بولاتىنداي ەتىپ ويلاستىرعان.

Toto، Inax، Matsushita Electric (Panasonic) سياقتى كومپانيالاردىڭ سانتەحنيكالىق ونىمدەرى وسىنى اڭعارتادى. لاس قالدىق تولىق شىعۋ ءۇشىن ادامنىڭ جانى جايلانىپ، راحات سەزىمگە بولەنۋى كەرەك ەكەن. دارەتحانانىڭ اسەم اۋەن شىعاراتىن جادى سول ءۇشىن ورناتىلىپتى. قالدىق شىعىپ بىتكەن سوڭ تومەننەن تەلەسكوپيالىق زات شىعىپ، جىلى سۋمەن جۋىپ، تازالاپ بەرەدى ەكەن. ياعني، بۇنداي دارەتحانادا دارەتحانا قاعازى دەگەن اتىمەن بولمايدى. دارەت الىپ تا اۋرە بولمايسىز، ارنايى اپپارات قاجەت جەرىڭىزدى جۋىپ-شايىپ بەرەدى. سودان سوڭ ۋنيتازدان شىققان فەن جەل سوقتىرىپ، جۋىلعان جەردى لەزدە قۇرعاتادى. ءتىپتى وتىرعان كىسى ۋنيتازعا سۋدىڭ قالاي دىبىسسىز قۇيىلىپ، ءبارىن جۋىپ، تازالاپ تاستاعانىن بايقاماي قالادى ەكەن.

كىسى ورنىنان تۇرعاندا مۇنتازداي بوپ قالعان ۋنيتاز تازا جاپون تىلىندە ادامنان تاعى قانداي قاجەتتىلىگى بارى جونىندە بىرنەشە ساۋال قوياتىن قابىلەتكە يە. سول ۋنيتازدى جاساپ شىعارعان Inax كومپانياسىنىڭ ماركەتينگ جونىندەگى ديرەكتورى ماساشيرو يگۋچي: «جاپون ۇيىندە ادام جاپادان جالعىز وتىرىپ، جانى راحاتقا بولەنەتىن جالىز ورىن — دارەتحانا» دەگەن ءسوزى راس بولسا كەرەك. EXPO-2005 كورمەسىنە قاتىسقان Matsushita Electric (Panasonic) كومپانياسىنىڭ دارەتحاناسىندا اۋا تەمپەراتۋراسى جارتى مينۋتتا 7 گرادۋسقا وزگەرەدى. جاپون ۋنيتازىنىڭ تاعى ءبىر كەرەمەتى — قۇيمىشاققا دەيىن جىلى سۋمەن جۋعان سوڭ ماسساج جاساپ بەرەدى.
 

EXPO-2005 كەزىندە جۇرت ونىمدەرىنە كۋا بولعان Toto ۋنيتازى تۇتاس مەديسينالىق لابوراتوريا دەۋگە بولادى. Wellyouءىى دەپ اتالاتىن بۇل قوندىرعىنى ۇيىنە ورناتقان ادام ەمحاناعا بارىپ اۋرە بولمايدى. دارەتحاناداعى مەحانيكالىق مانيپۋلياتور شاعىن قالاقشامەن ءزاردىڭ ءاناليزىن الادى جانە ءزاردىڭ قانت دەڭگەيىن اۆتوماتتى تۇردە ولشەيدى.

EXPO-2005 كورمەسىندە جاپونيادا جاسالعان مەديسينالىق سۋپەر دارەتحانا تانىستىرىلدى. بۇنداي ۋنيتازدى جاساۋداعى ماقسات جاپون قوعامىندا قاريالاردىڭ سانى ارتىپ بارادى، ولار ۇدايى مەديسينالىق قاداعالاۋدى قاجەت ەتەدى. ۋنيتازدىڭ قاقپاعى ادامنىڭ سالماعىن ءار گراممىنا دەيىن ءدال ولشەيتىن كورىنەدى. قان قىسىمى مەن جۇرەك سوعىسىن تەكسەرەتىن قوندىرعى دا وسى ۋنيتازدىڭ قاقپاعىندا.

ال ۋنيتازدىڭ ىشىندەگى مينيلابوراتوريا قانت پەن ءالبۋميننىڭ زاردەگى مولشەرى مەن قاندى تەكسەرەدى. ءزاردىڭ اعىسىنا قاراپ جۇرەك جۇمىسىنا انىقتاما بەرۋگە بولادى ەكەن. ۋنيتازداعى ءۇش ولشەمدى دەتەكتور ءزاردى تەكسەرىپ، بالليستيكالىق كارديوگرامما قۇرادى. سۋپەر ۋنيتاز ادامنىڭ جۇرەك جۇمىسى جايىندا قورىتىندى ەسەپتى ينتەرنەت ارقىلى اۆتوماتتى تۇردە ارنايى مەديسينالىق ورتالىققا جىبەرەدى.

شارافات جىلقىبايەۆا