اۋىل شارۋاشىلىعىن دامىتۋ قازاقستان ءۇشىن وتە ماڭىزدى. «التىن، كۇمىس تاس ەكەن، ارپا،بيداي اس ەكەن» دەمەكشى، ازىق تۇتىناتىن ادام قاشاندا اۋىل شارۋاشىلىعى ونىمدەرىنە مۇقتاجدىق تانىتىپ جاتادى. التىن، كۇمىسسىز شىداۋعا بولادى، ال، تاماقسىز ۇزاق شىداۋ مۇمكىن ەمەس. وسى ماقساتتا قازاقستاندا اۋىل شارۋاشىلىعىن دامىتۋعا ارنالعان «اگروبيزنەس 2020» باعدارلاماسى اياسىندا وڭتۇستىك ءوڭىرى وراسان زور جەتىستىككە جەتتى.
سارسەنبىنىڭ ءساتتى كۇنىندە ءوڭىر باسشىسى ب.اتامقۇلوۆ وبلىستىق دەپۋتتارمەن ەسەپتى كەزدەسۋ وتكىزدى. وندا وبلىس اكىمى وڭىردە ءى جارتىجىلدىقتىڭ قورىتىندىسىمەن اۋىل شارۋاشىلىعىنىڭ ءونىم كولەمى 123 ملرد. تەڭگەنى قۇراپ، 2 پايىزعا ارتقانىن ايتتى. ال ەگىس كولەمى وتكەن جىلدان 13 مىڭ گەكتارعا ارتىپ، 788 مىڭ گەكتاردى قۇراعان. بۇل وتكەن جىلعا قاراعاندا الدەقايدا كوپ. وسىدان وڭىرىمىزدە جىلدان-جىلعا اۋىل شارۋاشىلىعى اسا كوپ ءمان بەرىپ كەلە جاتقانىن كورۋگە بولادى.
ەسەپتى كەزدەسۋدە ءمالىم بولعانداي اگرارلى ايماقتىڭ شارۋالارى وسى جىلى داندىك جۇگەرىدەن 108،4 مىڭ توننا، كوكونىستەن 811 مىڭ توننا، باقشادان 1 252 مىڭ توننا، كارتوپتان 195 مىڭ توننا، ماساقتى داقىلداردان 470 مىڭ توننا ءونىم جيناعان. سونداي-اق، وبلىستا العاش رەت بيدايدىڭ ورتاشا ونىمدىلىگى 22 سەنتنەردى قۇراپ، رەكوردتىق ءونىم الىنىپ وتىر.
جيىندا ايماق باسشىسى تامشىلاتىپ سۋعارۋ ءادىسى قوسىمشا التى مىڭعا جۋىق گەكتارعا ەندىرىلىپ، جالپى كولەمى 49،7 مىڭ گەكتارعا، ال جىلىجايلار قوسىمشا 72 گەكتارعا سالىنىپ، جالپى 1 098 گەكتارعا جەتكەنىن ايتتى. ايتا كەتەيىك، جالپى ەلىمىز بويىنشا جىلىجايلاردىڭ 87% وڭتۇستىك ۇلەسىندە. وسى جىلىجايلاردان 80 مىڭ توننا كوكونىس ونىمدەرى جينالدى.
