وڭتۇستىكتە ماقتا تەرۋ ناۋقانى قىزا باستادى. وسى ناۋقان كەزىندە ماقتارال اۋدانىندا ماقتاشىلاردىڭ ءداستۇرلى سەمينار-كەڭەسى ءوتتى. وندا ناۋقان كەزىندە اق التىندى شاشپاي-توكپەي، جيناپ الۋ جولدارى مەن وزىق تەحنولوگيانى جۇمىلدىرۋ ماسەلەلەرى تالقىلاندى. سونداي-اق، ماقتا شارۋاشىلىعىنداعى تۇيتكىلدى ماسەلەلەر دە ورتاعا سالىندى.
جالپى ەلىمىزدە «اق التىندى» ەگەتىن بىردەن-بىر وبلىس سانالاتىن وڭتۇستىك قازاقستاندا ماقتاشىلارعا مەملەكەت تاراپىنان كوپتەگەن جەڭىلدىكتەر بەرىلىپ جاتىر. «اگروبيزنەس 2020» جانە باسقا دا باعدارلامالار اياسىندا شارۋالارعا سۋبسيديا تولەندى. ۇزاق مەرزىمگە ليزينگ ارقىلى تەحنيكا، پايىزى تومەن نەسيە بەرىلدى.
وسى سەمينارعا قاتىسقان وبلىستىق اۋىل شارۋاشىلىعى باسقارماسى باسشىلارىنىڭ ايتۋىنشا، الداعى ۋاقىتتا جەڭىلدەتىلگەن نەسيەنىڭ كولەمىن 18 ميلليون تەڭگەگە جەتكىزۋ، مەرزىمىن بەس جىلدان جەتى جىلعا ۇزارتۋ قاراستىرىلىپ جاتىر. گەكتارلى سۋبسيديانى قالپىنا كەلتىرۋ دە جوسپاردا بار. ۇلتتىق قوردان قارجى قارالسا، 15 قاراشادان باستاپ اتالعان سۋبسيديا ماقتا، جۇگەرى، كۇرىش وسىرۋشىلەرگە تولەنۋى ءتيىس.
قازاق ماقتا شارۋاشىلىعى عىلىمي-زەرتتەۋ ينستيتۋتى ماقتانىڭ جاڭا تۇقىم سورتتارىن شىعارۋدا. ونىڭ ساپاسى جۇڭگو، تۇركيادان اكەلىنگەن شيتتەن ارتىق بولماسا، كەم ەمەس.ماقتالى ايماقتا اۋىل شارۋاشىلىعىن ءار تاراپتاندىرۋ باعىتىندا بيىل اۋقىمدى ىستەر اتقارىلدى. ەندىگى جيىن-تەرىمدە ءونىمدى ءراسۋا ەتپەۋ قول كۇشىنە بايلانىستى بولماق. شارۋانىڭ كەز-كەلگەنىندە تەحنيكا جوق. كومباين از. ەگىلگەن ماقتا شيتىنەن جوعارى ءونىم الۋ وزەكتىلىگى باسقوسۋدىڭ باستى تاقىرىبىنا اينالدى. بيىل اۋدانداعى ماقتانىڭ 65 پايىزى كومباينمەن جينالادى دەگەن جوسپار بار.
ديحاندار جىل سايىن ماقتالىق القاپتىڭ كولەمىن بارىنشا ازايتىپ، ونىمدىلىكتى جوعارىلاتۋعا كۇش سالىپ جاتىر. عىلىمي ورتالىقتاردىڭ تۇجىرىمىنا سۇيەنىپ، قۇرعاقشىلىققا شىدامدى ءارى ونىمدىلىگى جوعارى ماقتا سورتتارىن ەگۋدە.
