ءدىن ىستەرى جانە ازاماتتىق قوعام جونىندەگى مينيسترلىك سالافيزمگە قاتىستى نەگىزگى ۇستانىمىن ءبىلدىردى، - دەپ حابارلايدى Qamshy.kz.
مينيسترلىكتىڭ باسپا ءسوز قىزمەتى قازاقستان اۋماعىندا سالافيزم اعىمىنا زاڭمەن تىيىم سالۋعا قاتىستى ۆەدومستۆو باسشىسى نۇرلان ەرمەكبايەۆتىڭ پىكىرىن جولدادى.
سۇراق: قازىرگى كۇندە قوعامدا جانە ساراپشىلار ورتاسىندا «سالافيزمگە» تىيىم سالۋ ماسەلەسى تالقىلانۋدا. مينيسترلىكتىڭ وسى ماسەلەگە قاتىستى ۇستانىمى قانداي؟
جاۋاپ: ن.ەرمەكبايەۆ. راسىندا قوعام ىشىندە سالافيزمگە تىيىم سالۋدى قولدايتىن جانە وعان قارسى ءارتۇرلى پىكىرلەر ايتىلىپ جاتىر.
وسىعان بايلانىستى سالافيزم ماسەلەسىنە قاتىستى ءدىن سالاسىنداعى ۋاكىلەتتى ورگان رەتىندە مينيسترلىكتىڭ ۇستانىمىن قوعامعا جەتكىزۋگە رۇقسات ەتىڭىزدەر.
مينيسترلىك قازىرگى كۇندە ءتيىستى مەملەكەتتىك ورگاندارمەن بىرلەسىپ وسى ماسەلەنى مۇقيات قاراستىرۋدا.
وسىعان دەيىن قازاقستاندا 23 لاڭكەستىك جانە ەكسترەميستىك ۇيىمدارعا، سونىڭ ىشىندە سالافيتتىك باعىتتاعى «ات-تاكفير ءۋال-حيدجرا» ەكسترەميستىك ۇيىمىنا، تىيىم سالىنعاندىعىن اتاپ وتكىم كەلەدى.
وسى رەتتە سالافيزم ۇيىم ەمەس ەكەندىگىن اتاپ ءوتۋ قاجەت. ول - ءدىني اعىم، كوزقاراستار جۇيەسى.
ەلىمىزدىڭ قولدانىستاعى زاڭدارى ءقازىردىڭ وزىندە زاڭسىز ۋاعىز جۇرگىزۋ، جاسىرىن ءدىني جيىندار مەن راديكالدى ءدىني ادەبيەتتەردى تاراتۋدىڭ جولىن كەسۋگە بارلىق مۇمكىندىكتەردى بەرەدى.
ولاردى ورىنداۋدى قامتاماسىز ەتۋ كەرەك.
سالافيزم تاقىرىبىنا كەلەتىن بولساق، مەملەكەتتىك قۇرىلىسى شاريعاتقا نەگىزدەلگەن جەكەلەگەن ەلدەردە سالافيزمگە جاقىن ءدىني اعىمدار ءداستۇر رەتىندە ورنىعۋى مۇمكىن.
ال قازاقستانعا كەلەر بولساق، وتاندىق ءدىنتانۋشىلاردىڭ پىكىرىنشە، سالافيزم قازاقستان ءۇشىن ايتارلىقتاي ءقاۋىپ تۋدىراتىن الەۋەتكە يە.
سالافيزم ۇستانۋشىلارىنىڭ ءوز يدەيالارى مەن قۇندىلىقتارىن ءبىزدىڭ ۇلتتىق مادەنيەتىمىزدەن، رۋحاني داستۇرلەرىمىز مەن قۇندىلىقتارىمىزدان جوعارى قويادى.
سالافيلەردىڭ بارلىعى اشىق ايتپاسا دا قاتاڭ ءدىني قاعيدالارعا قۇرىلعان مەملەكەتتى قوعامدىق قۇرىلىستىڭ «يدەالدى جۇيەسى» دەپ ەسەپتەيدى.
ءبىز قازىرگى كۇندە يسلام الەمىندە، سونىڭ ىشىندە ءبىرقاتار اراب ەلدەرىنىڭ وزىندە، سالافيزم يدەيالارى بەدەلدى ءدىني تۇلعالار مەن زاماناۋي يسلام ويشىلدارى تاراپىنان سىنعا ۇشىراپ وتىرعانىن كورىپ وتىرمىز.
ءبىز وسىعان بايلانىستى ءسالافيزمدى قازاقستان رەسپۋبليكاسى ءۇشىن مۇلدەم جات ءارى تەرىس ءدىني اعىم دەپ سانايمىز.
ەلىمىزگە سىرتتان كەلگەن بۇل ءدىني اعىم كۇن وتكەن سايىن حالىق تاراپىنان تويتارىسقا ۇشىراۋدا.
جالپى، قازاقستاندىق قوعام راديكاليزمگە جەتەلەيتىن بۇل جات اعىمعا تەرىس كوزقاراستا.
وسى سەبەپتى بۇگىنگى كۇندە ەلىمىزدەگى سالافيزم جاقتاستارىنىڭ سانى ازايىپ جاتقاندىعى بايقالادى جانە ولاردىڭ قازاقستاندا ۇيىمداسقان قۇرىلىمدارى جوق.
سوندىقتان الداعى ۋاقىتتا سالافيزم يدەولوگياسىن ناسيحاتتايتىن ۇيىمداردىڭ پايدا بولۋىنا، ادەبيەتتەرىنىڭ تارالۋىنا جانە ينتەرنەت-سايتتارىنىڭ جۇمىستارىنا جول بەرمەيتىن بولامىز.
قاجەت بولعان جاعدايدا، قازاقستان مۇسىلماندارى ءدىني باسقارماسىنا ءدىندار ازاماتتار تاراپىنان ەل مەشىتتەرىندە بەكىتىلگەن ءتارتىپ ەرەجەلەرىن ساقتاۋعا كومەكتەسەتىن بولامىز.
ءبىز قازاقستاندىق دانا حالقىمىز ەلىمىزگە جات سالافيزم اعىمىنىڭ تارالۋىنا زاڭمەن تىيىم سالماي-اق جول بەرمەيدى جانە زايىرلى قاعيداتتاردى باسشىلىققا الاتىن دەموكراتيالىق قازاقستاندى قۇرۋدى تاڭدايدى دەپ سەنەمىز.
بۇل تاڭداۋدى قازاقستاننىڭ ءاربىر ازاماتى قولداۋى ءتيىس. جۇمىلا كوتەرگەن جۇك جەڭىل.
