بايان ەسەنتايەۆا كۇيەۋىمەن ارادا بولىپ جاتقان وقيعالارعا قاراماستان، ءوزىنىڭ تەگىن وزگەرتپەيتىندىگىن ايتىپ ءوتتى. مۇنىمەن قاتار، ول جولداسىمەن سويلەسىپ، دوس بولىپ قالۋ تۋرالى شەشىم قابىلداعان ەكەن.
بۇل تۋرالى ول بلوگەر ەلۆيرا ەرعالييەۆاعا بەرگەن سۇحباتىندا ايتقان.
بلوگەردىڭ ينستاگرام پاراقشاسىندا بايان ماقساتقىزىمەن بولعان ۆيدەوسۇحبات جاريالاندى. “بايان ماقسات قىزى، جوق، بايان ەسەنتايەۆا كۇيەۋىن كەشىرىپ، ايەلدەردىڭ قۇقىعىن قورعايتىن ۇيىم اشۋ تۋرالى يدەياسىن ۇمىتىپ كەتكەن جوق. ءالى قولعا الادى. ايتپاقشى، بايان حانىم فاميلياسىن اۋىستىرمايدى، “ەسەنتاي پروداكشن” دا اتىن اۋىستىرمايدى”، – دەپ جازدى ەرعالييەۆا ءوز پاراقشاسىنا.
بۇدان وزگە بايان ماقسات قىزى كۇيەۋىن كەشىرۋدىڭ وزىنە قيىنعا سوققانىن ايتىپ ءوتتى. مۇنى ءبىرىنشى كەزەكتە بالالارى ءۇشىن جاساعانىن دا جاسىرمادى. “ونىڭ اباقتىدا وتىرعانىنا ءتورت اي بولدى. مەنىڭشە، تۇرمەدە ءبىر كۇن وتىرۋدىڭ ءوزى قيىن”، – دەيدى ول. بايان حانىمنىڭ بۇل شەشىمىن ەستىگەن جۇرت شۋلاعان-دى. دەسە دە، پروديۋسەر قانداي جاعداي بولسا دا، ءوزىنىڭ شەشىمىن وزگەرتپەيتىنىن ايتىپ ءوتتى.
“مەننەن ۇلگى العاندى ەشقاشان قالامايتىنمىن. مەن قاراپايىم اداممىن. مۇنداي شەشىم قابىلداپ جاتقاندا ادامداردىڭ پىكىرلەرىنە سۇيەنگەنىم جوق. سەبەبى، بۇل مەنىڭ وتباسىم، مەنىڭ قارىم-قاتىناستارىم. جانە ەكراننىڭ ار جاعىنداعى ەشبىر ادام مەنىڭ ومىرىممەن ءومىر سۇرمەيدى”، – دەپ قورىتتى.
پىكىر قالدىرۋ