شىڭعىسحاننىڭ جولداۋىن   رعا سب فيلولوگيا ينستيتۋتىنىڭ باس عىلىمي قىزمەتكەرى يرينا نيەۆسكايانىڭ باسشىلىعىمەن عىلىمي ديسسەرتاسيا قورعاۋ اياسىندا گەرمانيالىق ۋنيۆەرسيتەتتىڭ ستۋدەنتى حەرلەن بولد شەشتى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى. عالىمدار شەشكەن قولجازبا التاي رەسپۋبليكاسى ا.ۆ. انوحين اتىنداعى ۇلتتىق مۇراجايىندا ساقتالعان.

 «اقىل كىلتى» قولجازباسى XIII-XIV عاسىرلارداعى كونە موڭعول تىلىندە جازىلعان. بۇل عىلىمعا بەلگىلى ەڭ ەجەلگى موڭعول قولجازبالارىنىڭ ءبىرى. تاۋلى التاي مۇراجايى قىزمەتكەرلەرىنىڭ حابارلاۋىنشا، قولجازبا سۋترا ۇزىندىلەرىن قامتيدى. كوپ پاراعى جوعالىپ قالعان. عالىمداردىڭ پىكىرىنشە، ءماتىندى بامبۋك تاياقشالارىمەن جانە قىلقالاممەن جازعان. جوعارىدان تومەن قاراي جازىلعان كلاسسيكالىق موڭعول حاتى، جولدار وڭنان سولعا قاراي ورنالاسقان.

سۋترا بالالاردى تاربيەلەۋ كەزىندە تاپسىرما، وسيەت تۇرىندە اۋىزشا تاراتىلعان بولۋى مۇمكىن. باستاپقىدا ونى شىڭعىسحاننىڭ ءوزى ايتقان. اۋىزدان-اۋىزعا تاراپ، قولباسشىنىڭ جولداۋى قاتتى وزگەرىسكە ۇشىراعان.

جازبادا شىڭعىسحاننىڭ كەيىنگى ۇرپاققا  كەڭەستەرى جازىلعان، وندا «سەنىمسىزدىك تۋدىرعان ادامعا سىرىڭدى اشۋدىڭ قاجەتى جوق» دەلىنگەن.

سونداي-اق شىڭعىسحان كەڭەستەرىندە «ايەلدەردىڭ سوزىنە اسا سەنبەۋگە» ۇندەگەن. «قۇل ارقىلى ۇلىڭا بۇيرىق بەرمە»، «جاۋىز نەمەسە ءىشى تار اداممەن كەڭەسپە»، «كوپشىلىك ادام ماقۇلداعاندى تەرىسكە شىعارما» دەگەن ۇزىندىلەر بار.