جاقىندا عانا "Esquire" جۋرنالىنا تانىمال مۋزىكانت عالىمجان مولدانازار بەرگەن سۇحباتتى "قامشى" پورتالى قازاق تىلىنە اۋدارىپ، وقىرمان نازارىنا ۇسىنادى:

ەگەر ءبىر بەدەلدى ادام بەلگىلى ءبىر مۋزىكانت جايلى ماقتاپ جاقسى پىكىر ايتسا، ونى ءبارى جاپپاي تىڭداي باستايدى. الايدا كىمدى جانە قانداي اۋەندى تىڭداۋ كەرەكتىگىن ادام ءوز تالعامىنا سۇيەنىپ شەشۋى كەرەك. بۇل ءبىزدىڭ ورتاق ماسەلەمىز.

90-شى جىلدارى وزبەكستان مەن تۇركيادان كەلگەن اۋەندەرگە بايلانىستى جۇرتتىڭ مۋزىكالىق تالعامى بۇزىلعان.

فونوگرامما جايىندا ۇزاق تالقىلاماي، جاي عانا فونوگرامماعا زاڭمەن تىيىم سالا سالۋ كەرەك. جاندى اۋەننەن ادام كوبىرەك ەنەرگيا، رۋحاني ازىق جينارى ءسوزسىز.

قازاقستانداعى شىنايى تالانتتاردىڭ زامان-ۋاقىتى ءبىر كۇنى كەلەدى. بىردەن ەمەس. وڭاي سوقپاسى انىق.

شىعارماشىلىق ادامعا ازاپتانعان، مۇڭايعان پايدالى. اسىرەسە، ماحاببات تاۋقىمەتىنەن. ماحاببات سالعان جارانى جازامىن، جىرلايمىن دەگەندە ادەمى ان-اۋەن دۇنيەگە كەلەدى.

5-6 جاسىمدا سۋرەتشى بولۋدى ارماندايتىنمىن. 9 سىنىپتى بىتىرگەن شاقتا كوركەمونەر مەكتەبىنە وقۋعا ءتۇستىم. ءبىراق سۋرەتشى بولۋ قولىمنان كەلمەدى.

پروديۋسەر دەگەن مەنىڭشە ءارتيستىڭ بەينەسىن قالىپتاستىراتىن، ءستيلىن ويلاستىرىپ، انشىگە اۋەن جازىپ بەرەتىن ادام. بۇل تۇرعىدا ماعان پروديۋسەر كەرەك ەمەس. ءاننىڭ ءسوزىن دە جازامىن، ءاننىڭ ارانجيروۆكاسىن دا ءوزىم جاسايمىن. ال، بەت-بەينەم بولسا قالىپتاسقان.

اتاق-داڭق پەن اقشادان قورقامىن. سەبەبى ولاردى قايتپەكپىن دەگەن سۇراقتىڭ جاۋابىن ءالى تاپپادىم.

باي ادامنىڭ ۇنەمى ماتەريالدىق دۇنيەنى ويلاي بەرۋى شارت ەمەس. 10 دوللارلىق دجينسى شالبار ساتىپ الىپ كيەتىن ميلليونەرلەر بار ەمەس پە؟!

اقشا ەشقاشان ارتىق بولمايدى. ەگەر ساعان ولار كەرەك بولماسا، مۇقتاجعا كومەكتەس.

مەن ادامداردى ءبولىپ جارمايمىن. قازاق ءتىلىن بىلمەيتىندەر بىلمەستىگى ءۇشىن كىنالى ەمەس. وعان سەبەپتەرى بار.

"قازاق جالقاۋ حالىق" دەگەن اڭىزدى ۇناتپايمىن. مۇنداي پسيحولوگيانى كىم ويلاپ تاپقانىن بىلمەيمىن. ەگەر ادام ءوزى جايلى جامان ويلاسا، سوندايعا اينالىپ كەتەدى.

مەكتەپتە ناشار وقىعانىما، ومىرىمدە ءبىر كىتاپ تاۋىسپاعانىما ۇيالامىن.

مەن وسكەن ورتادا بارلىعى تازا قازاق تىلىندە سويلەيتىن. اكە-شەشەم دە جالپاق تىلمەن اڭگىمەلەسپەيتىن. اكەم ۇرىسقاندا دا ايتار ءسوزدى مۇقيات تاڭداي بىلەتىن. سول سەبەپتى ۇرىس ەستىگەندە جۇرەگىڭدە تەسىك پايدا بولعانداي سەزىم تۋاتىن. ولەڭ شىعارا الاتىنىم دا سوندىقتان.

قازاق ءتىلىن بۇكىل جەر-جاھان ەستىسە دەگەن ارمانىم بار. ءان ارقىلى سول ارمانىما قول جەتكىزۋگە ەندى مۇمكىندىگىم بار.