قازاقستاندىقتاردىڭ، ءتىپتى دۇنيە ءجۇزىنىڭ نازارىن اۋدارعان قازاقستاننىڭ كاسىپقوي بوكسشىسى قانات ءسىلام ۇلى مەن گانالىق ارىپتەسى پاتريك اللوتەيدىڭ الداعى ۋاقىتتا الماتى قالاسىندا وتەتىن جارىسىنا وراي جۇڭگو حالىق رەسپۋبليكاسىنداعى ەڭ ۇلكەن بوكس سايتى  – «بوكس اۆياماتكاسى» سايتى ارنايى حابار تاراتىپ، قىتايداعى قالىڭ بوكس اۋەسكەرلەرىنىڭ نازارىنا ۇسىندى. حاباردىڭ مازمۇنى مىناداي:

قانات 29 قازاندا پاتريكپەن بەلدەسپەك 

اقپارات دانەكەرلەرىنىڭ حابارىنا قاراعاندا، كەزىندە جۇڭگو قۇراماسى اتىنان 2008 جىلعى بەيجيڭ وليمپياداسىنا قاتىناسقان قازاقستان كاسىپقوي بوكسشىسى قانات ءسىلام ۇلى قازاننىڭ 29 كۇنى تاعى دا بوكس شارشى الاڭىنا شىعىپ، گانالىق ارىپتەسى پاتريك اللوتەيمەن جەكپە-جەككە تۇسپەك. قارسىلاستار WBA Fedelatin جانە WBO Intercontinental نۇسقالارى بويىنشا تيتۋل  ءۇشىن بەلدەسەدى. جەكپە-جەك 29 قازاندا استانا ۋاقىتى بويىنشا ساعات 18: 00 دە «الماتى ارەنا» سپورت كەشەنىندە وتەدى. 

32 جاستاعى قانات ءسىلام ۇلى قازىرگە دەيىن كاسىپتىك جەكپە-جەكتە 21 رەت تولىق جەڭىسكە جەتكەن، 18 رەتكى جەكپە-جەكتە قارسىلاسىن نوكاۋتقا جىبەرگەن (تالدىرىپ تۇسىرگەن). قانات 1984 جىلى شىڭجاڭنىڭ التاي ايماعىندا تۋىلعان. 1997 جىلى شىڭجاڭ باسەكەلىك دەنەتاربيە مەكتەبىنىڭ بوكس كومانداسىنا، 2001 جىلى شىڭجاڭ بوكس كومانداسىنا، 2004 جىلى وليمپيادا جارىسى مەملەكەتتىك شوعىرلى جاتتىعۋ كومانداسىنا كىرگەن. 2007 جىلى تامىزدا ءۇرىمجى حالىقارالىق بوكس دوستىق جارىسىندا قانات ءسىلام ۇلى 69 كيلوگرام سالماق دارەجەسىندە اعا جۇلدەگەر، 2007 جىلعى دۇنيە جۇزىلىك جۇلدەلى جارىستا 69 كيلوگرام سالماق دارەجەسىندە 3 بولعان، 2008 جىلعى بەيجيڭ وليمپياداسىنىڭ 1 ورتا سالماق دارەجەسىندە (69 كيلوگرام) قولا مەدال العان. 2009 جىلى قانات ءسىلام ۇلى دۇنيە جۇزىلىك كاسىپتىك بوكس ساحناسىنا رەسمي قادام تاستادى، قازىرگە دەيىن ءۇرتىس 21 رەت جەڭىسكە جەتتى، مۇنىڭ ىشىندە 18 رەتكى جەكپە-جەكتە قارسىلاسىن نوكاۋتقا جىبەرگەن. قاناتتىڭ ەڭ جاقىندا وتكەن جارىسى بيىل مامىر ايىندا بولدى، وندا كولۋمبيالىق حۋان دە انحەلمەن كەزدەسىپ، ونى تەحنيكالىق نوكاۋتپەن جەڭدى. قانات ــ جۇدىرىعى اۋىر، شابۋىلعا مايتالمان بوكسشى. 

26 جاستاعى پاتريك اللوتەي ــ قازىرگە دەيىن كاسىپتىك جەكپە-جەكتە 34 رەت جەڭىپ، 2 رەت جەڭىلگەن، 28 رەتكى جەكپە-جەكتە قارسىلاسىن نوكاۋتقا جىبەرگەن. ول جۋىرداعى 4 رەتكى جەكپە-جەكتە ءۇرتىس جەڭىسكە جەتكەن، كۇشى مىعىم بولعانىمەن، شايقاستاعى ناتيجەسىنەن قاراعاندا، قانات ءسىلامۇلىنا تەڭ كەلە الاتىنداي ەمەس. 

ءقازىر قازاقستاندا گولوۆكيننىڭ توبە كورسەتۋىمەن بوكس جۇرتتىڭ نازارىن اۋداردى. گولوۆكيننەن تىس، قازىرگى WBA دىڭ 1 اۋىر سالماق دارەجەسىندەگى جاي بوكس پاتشاسى بەيبىت شۇمەنوۆ تا قازاقستاندىق.

مىنە، وسىلايشا ميللياردتار ەلى اتانعان ەلىمىزدەگى ەڭ ۇلكەن بوكس سايتى قانات ءسىلامۇلىنا زور سەنىم ارتىپ وتىر. قاتارداعى جانكۇيەر رەتىندە قانات ءسىلامۇلىنا ساتتىلىك تىلەيمىز.

سەنبەك اۋەسقان ۇلى