جۇرەگىندەگى بار ارمانىن بىر-بىرىمەن ۇشتاستىرىپ، ونەرى مەن وتباسىن قاتار الىپ جۇرگەن تانىمال انا – اسەل اكباروۆامەن جاقىندا سۇقباتتاسۋدىڭ ءساتى تۇسكەن ەدى. ءارى ول تىزگىندەيتىن «حابار» ارناسىنداعى «ءبىزدىڭ ءۇي» توك-شوۋىنا بارىپ، كادر سىرتىنداعى كورىنىستەرمەن، جۇمىس بارىسىمەن تانىسىپ قايتتىق.

— نەگىزگى ماماندىعىڭىز زاڭگەر ەكەن. تەليەۆيزيا سالاسىنا قالاي كەلدىڭىز؟

— تەليەۆيزيا جۇيەسىندە جۇمىس ىستەۋ، ديكتور بولۋ – بالالىق شاقتان كەلە جاتقان ارمان ەدى. قۇدايعا شۇكىر، بۇل ارمانىم ورىندالدى. 2006 جىلى استانا قالاسىنا قونىس اۋداردىم. سول كەزدە مەن نەگىزى مينيسترلىكتىڭ بىرىندە جۇمىس ىستەۋىم كەرەك ەدى. سوعان دايىندالىپ، جاۋاپتارىن كۇتىپ وتىرعانمىن. سول ساتتە ارنالاردىڭ بىرىنە «تەلەجۇرگىزۋشىلەر كەرەك» دەگەن حابارلاندىرۋدى ەستىدىم. بۇرىننان كەلە جاتقان ارمانىم بولعاننان كەيىن، باعىمدى سىناماقشى بولىپ باردىم، كوردىم. باعىما وراي، ول كىسىلەر مەنى ۇناتتى، ايتەۋىر (كۇلىپ). «داۋسىڭ دا، تۇر-الپەتىڭ دە كەلەدى ەكەن، جۇمىس جاساۋعا بولادى» دەپ، كەۋدەمە ءبىر ءۇمىت ۇيالاتتى. ارينە، مەن بالا ارمانىمنان باس تارتپاي، تەليەۆيزيادا قالدىم. كىم ءبىلسىن، پەشەنەگە جازىلعانى سول شىعار. تاعدىر ءوزى ايداپ كەلگەن شىعار دەپ ويلايمىن.

—تەلەجۋرناليستيكا كۋرستارىنا قاتىسىپ، دايىندالدىڭىز با؟

— جوق، ونداي ارنايى دايىندىق بولعان جوق. سول ارنادا العاش كەلگەنىمدە ديكسيامەن جۇمىس ىستەيتىن، داۋىستى قوياتىن ارنايى ماماندار دا بولدى. سىناق مەرزىمى كەزىندە مەن سولاردىڭ ارتىنان جۇگىرىپ ءجۇرىپ سۇراسام دا «قوي، اينالايىن اسەل، ونىڭ ساعان قاجەتى جوق» دەپ وزدەرى مەنى سەندىردى.

—ماماندىعىڭىز باسقا بولعان سوڭ كاسىبي تەلەجۋرناليستەر تاراپىنان سىندار ءجيى ايتىلاتىن شىعار؟ قالاي قابىلدايسىز؟

—ارينە، ەندى ونداي-ونداي بولادى عوي. اسىرەسە، ايەلدەر اراسىندا. ەندى جىگىتتەردىڭ ويىندا نە جۇرگەنىن بىلمەيمىز عوي، ال قىزدار ايتىپ قالىپ جاتادى. كەيبىر كەزدە نەشە ءتۇرلى پىكىرلەردى ەستيسىڭ. ءقازىر الەۋمەتتىك جەلىلەردە وڭاي بولدى عوي. كەز كەلگەن ادام ءوزىنىڭ پىكىرىن بىلدىرە بەرەدى. ءبىراق وسى كۇنگە دەيىن «جۋرناليست مامانى ەمەسسىڭ، تەليەۆيزيادا نە ىستەپ ءجۇرسىڭ؟» دەگەندى ەستىگەن ەمەسپىن. قايتا ءتانتى بولىپ جۇرگەندەردىڭ، مەنەن ءدارىس العىسى كەلەتىندەر مەن اقىلداسقىسى كەلەتىندەردىڭ قاتارى كوپ. ەندى بۇل سالادا جۇرگەنىمە 10 جىلدان استى عوي. بارلىعى تاجىريبەنىڭ ارقاسىندا كەلەدى.

— ءوزىڭىزدى اكتريسالىق قىرىڭىزدان دا كورسەتىپ ءجۇرسىز. بۇل جولعا قالاي ءتۇستىڭىز؟ الدىن-الا اكتەرلىق شەبەرلىگىڭىزدى دامىتىپ، ارنايى كۋرستارعا باراسىز با؟

— بۇل دا بالالىق ارمانىم (كۇلىپ). نەگىزى ادام ارمانداي ءبىلۋ كەرەك قوي، الدىنا ماقسات قويا ءبىلۋ كەرەك. مەن تەك ۇيدە جاتىپ ارمانداپ، ويلاۋمەن عانا شەكتەلگەن جوقپىن. تەليەۆيزياعا كەلۋ ءۇشىن مەن الدىمەن ءوزىمدى سىناپ كوردىم، كورسەتە ءبىلدىم. بۇل – ءبىر. ال اكتريسالىققا كەلەتىن بولساق، وعان دا مەن ارنايى دايىندالدىم. بىرىنشىدەن، ىشتەي دايىندالدىم. سودان سوڭ اكتەرلىق شەبەرلىك كۋرستارىنان ءوتتىم. بۇعان دا ءبىر سونداي مۇمكىندىك بولدى. حابار ارناسىندا، بىلسەڭىز، باياعىدا «توعىسقان تاعدىرلار» دەگەن تەلەحيكايا بولدى. سونىڭ جالعاسى رەتىندە تۇسىرىلەتىن سەريالعا كاستينگ ءجۇرىپ جاتقانىن ەستىدىم. بارىپ ونى دا كوردىم. بۇكىل ساتىسىنان ءوتىپ، رەجيسسەردىڭ كوڭىلىنەن شىققانداي بولدىم. ءبىراق كىم ەكەنىمدى، قايدا قىزمەت ەتەتىنىمدى ايتقان جوقپىن. ول كىسى دە قازاقشا باعدارلامالاردى كورەتىن ادام ەمەس، سوندىقتان مەنىڭ كىم ەكەنىمدى بىگەن جوق. ءسويتىپ كاستينگتەن  ءوتىپ، سالتاناتتىڭ رولىنە مەنى بەكىتكەن بولاتىن.

— بۇگىنگە دەيىن قانشا فيلمگە، سەريالعا ءتۇستىڭىز؟ 

— سول «ب ا ق مەكەنىم، استانا» («پەرەكرەستوك ۆ استانە»)، ودان كەيىن «زاۋال» دەگەن تەلەحيكاياعا ءتۇستىم. ونى ءقازىر «حابار» ارناسىنان دا كورسەتىپ ءجۇر. ودان كەيىن، بىلسەڭىز، وسى جازدا اسقار ۇزابايەۆتىڭ «گلامۋر دليا دۋر» تولىقمەتراجدى فيلمىنە ءتۇستىم. ول، قۇداي قالاسا، 1 جەلتوقساندا ەكرانعا شىعادى. ودان كەيىن استاناعا كەلىپ، دەمالىس ۋاقىتىمدى پايدالانىپ، «ۆسە يز-زا مۋجيكوۆ» دەگەن كينوعا دا ءتۇسىپ كەلدىم. ازىرشە، ەكى سەريال، ەكى تولىق مەتراجدى فيلم.

—«گلامۋر دليا دۋر» فيلمىنە العاشىندا بايان ەسەنتايەۆا ءتۇسۋى قاجەت ەكەن. سىزگە شاقىرتۋ تۇسكەندە بىردەن كەلىستىڭىز بە؟

— بۇل جەردە نەشە ءتۇرلى الىپ-قاشپا اڭگىمەلەر بار ەندى. اركىمنىڭ اۋزىنا قاقپاق بولا المايسىڭ عوي. ناقتى ءوزىم بىلەتىنىم، العاشىندا بايان ماقسات قىزى بۇل ءرولدى سومداۋى كەرەك بولاتىن. ءسويتىپ كەلىسىلگەن ەدى. ءبىراق اياق استى ءوزى باس تارتقان. سودان وسى ءفيلمنىڭ رەجيسسەرى اسقار ۇزابايەۆ حابارلاسىپ، ماعان وسى ءرولدى ۇسىندى. ارينە، باس تارتپايمىن عوي (كۇلىپ). كەلىسىمىمدى بىردەن بەردىم.

— ءسىزدى كوبىنە «بايان حانىمعا ەلىكتەيدى، سول كىسىگە ۇقسايدى» دەپ جاتادى. ءوز باسىم، ۇقساستىق بايقاماپپىن. جالپى بۇل سىزگە قالاي اسەر ەتەدى؟

— مەن دە سونى تۇسىنبەيمىن. بىرىنشىدەن، ۇقسامايمىز. بايان ماقساتقىزىن مەن دە بىلەمىن، بىرگە جۇمىس تا ىستەدىك. نەلىكتەن جۇرتتىڭ كوزىنە ولاي كورىنەتىنىن بىلمەيمىن. مەنىڭشە، ءبىز ۇقسامايمىز. «ەلىكتەيدى» دەيدى.  قالاي ەلىكتەيمىن؟ مەنىڭ شاشىمنىڭ ءتۇسىن قاراڭىز. ول كىسىنىڭ شاش ۇلگىسىن قاراڭىز. قاي جەرىممەن ەلىكتەيدى ەكەنمىن مەن؟ سونى دا تۇسىنبەدىم. ول كىسىمەن سالىستىرىپ جاتسا، ارينە، رەنجىمەيمىن، «بايانعا ۇقساتتى» دەپ تە رەنجىمەيمىن. ويتكەنى ول ەڭ سۇلۋ، كورىكتى ارۋلارىمىزدىڭ ءبىرى عوي. مۇنى مويىنداۋ كەرەك. ونىڭ ۇستىنە ءبىزدىڭ مادەنيەتىمىزگە زور ۇلەسىن قوسىپ جاتقان تۇلعا، ماقتانارلىق، ۇلگى تۇتارلىق ايەل. رەنىش جوق. دەگەنمەن قىتىعىمدى كەلتىرەتىن تۇسى دا بار. ءوز باسىم بۇل پىكىرمەن مۇلدە كەلىسپەيمىن. ۇقساستىعىمىز دا جوق، ەلىكتەۋ دە جوق.

— وقىرماندارىمىزعا ءوزىڭىز جايلى ايتا كەتسەڭىز.

— مەن جالپى، جەكە ءومىرىم، وتباسىم جايلى اشىقتان-اشىق كوپ ايتاتىن اداممىن. 17 جاسىمدا تۇرمىسقا شىققانمىن. جىگىتىم مارقۇم وڭتۇستىك قازاقستاننىڭ تۋماسى. بىرگە زاڭ ۋنيۆەرسيتەتىندە وقىپ ءجۇرىپ تانىسقانبىز. ءسويتىپ، 1-كۋرستى ءتامامداعان سوڭ، تۇرمىسقا شىعىپ كەتتىم. 4-كۋرستى بىتىرگەندە مەنىڭ ءۇش بالام بار ەدى. ءقازىر سول ەكى قىزىم، كەنجە ۇلىم – ءۇش بالا-شاعام بار. كۇيەۋىم مارقۇم 2005 جىلى اۋىر ناۋقاستانىپ، دۇنيەدەن وزدى. بىلايشا ايتقاندا، ميىندا ىسىگى بولدى. سودان بەرى تۇرمىسقا شىققان جوقپىن. ءبىراق ءبارىن تاستاپ، استاناعا كوشىپ كەلدىم. وسىندا كوشكەننەن كەيىن جاڭا ءومىر باستالدى.

—بالالاردى جالعىز تاربيەلەگەن قيىن ەمەس پە؟

— قيىن، ارينە.

—ەكىنشە رەت وتباسىن قۇرۋ ويىڭىزدا جوق پا؟

— مەن وتباسىن قۇرار ەدىم. بىرىنشىدەن، مەن تۇرمىسقا شىعاتىنداي، لايىق ادامىمدى كەزدەستىرگەن جوقپىن ءالى كۇنگە دەيىن. ەكىنشىدەن، ءقازىر كەز كەلگەن ادامنىڭ باسقا بىرەۋدىڭ بالاسىنا باۋىر باسۋى ەكىتالاي. ونىڭ ۇستىنە، مەنىڭ بالالارىم – جاسوسپىرىمدەر. قىزدارىم بويجەتىپ قالدى. ءبىر جاعىنان ءقاۋىپتى دە. نەشە ءتۇرلى جاڭالىقتاردى ەستيمىز عوي. الەۋمەتتىك جەلىلەردە دە، تەلەديداردان دا كورسەتىپ جاتادى. ءوزىنىڭ تۋعان بالاسىن اياماعاندار بىرەۋدىڭ بالاسىن ايايدى دەيسىز بە؟ سونداي دا ۇرەيلەر بار. سول ءۇشىن بوتەن ءبىر ەر ازاماتتىڭ ۇيدە جۇرگەنىن ءوزىم دە قالامايمىن. ءبىراق مەنىڭ باقىتىم ءۇشىن بالالارىم قارسى ەمەس تە شىعار؟! ولار تەك قانا جاقسىلىق تىلەيدى عوي ماعان. تىلەكتەس، جاناشىرلارىم، كومەكشىلەرىم – مەنىڭ وسى بالالارىم.

— ءبىراق مۇمكىن بە الداعى ۋاقىتتا؟

— مۇمكىن ەندى، كىم بىلەدى؟ كەزدەستىرىپ قالارمىن. مۇمكىن كەزدەستىرمەيتىن دە شىعارمىن. ونى تەك قانا اللا تاعالا بىلەدى.

— بالالارىڭىز وسى توڭىرەكتەگى ويلارىن ايتا ما سىزگە؟

— بۇل تاقىرىپتا اشىق اڭگىمەلەسە بەرەمىز. وندا تۇرعان ەشنارسە جوق. وزدەرى دە ءبىلىپ ءجۇر، كورىپ ءجۇر. لايىق ادام جولىقپاي ءجۇر ماعان (كۇلىپ).

— سىزبەن تاعدىرلاس قازاق ايەلدەرى كوپ. سول كىسىلەرگە سىزدەن كەڭەس بولسىن، موتيۆاسيا بولسىن. قيىندىقپەن كۇرەسۋگە، جەڭۋگە قانداي كۇش اسەر ەتتى؟ وسىنشا كۇش-جىگەردى قايدان الاسىز؟

— سول قيىندىقتى باستان وتكەرگەننەن كەيىن ءبىز كۇشەيەمىز عوي. ول بىزگە قۋات بەرەدى. بىرىنشىدەن، بالا-شاعام بار. سولاردى ويلاۋىم كەرەك. ءقازىر جولداسىمسىز كەشىپ جاتقان ومىرىمە كوز جۇگىرتىپ، ارتقا قاراسام، جاساعانىمنىڭ بارلىعى بالالارىم ءۇشىن عانا. ارينە، مەنىڭ ارماندارىم ورىندالىپ جاتىر (كۇلىپ)، ونى دا ەسكەرمەۋ مۇمكىن ەمەس. ءبىراق ەڭ قوزعاۋشى كۇش – بالالار. ولار بولماسا، مەن بىلمەيمىن، مۇڭايىپ، قانداي كۇيگە تۇسەتىنىمدى، ايتپاي-اق قويايىن، بولجاماي-اق تا قويايىن. ايتەۋىر امان-ەسەنبىز، دەنىمىز ساۋ، بالا-شاعام ساۋ، ەڭ باستى بايلىق، باقىت وسى.

— بالا تاربيەسىندە، اسىرەسە، قىز بالانىڭ تاربيەسىندە نەگە كوڭىل بولەسىز؟

— تيىم كوپ. ءبىر جاعىنان ويلايمىن، مۇمكىن مەن شەكتەن تىس قاتىگەز ادام شىعارمىن دەپ.

— نەگە؟

— بىلمەيمىن، ەندى. سولاردىڭ اڭگىمەسىنە قاراساڭ (كۇلىپ) دەگەنىم عوي. «ماما، تۇك تە رۇقسات ەتپەيسىز عوي، بىزگە تۇك بوستاندىق بەرمەيسىز» دەيدى. ولاردى وسىلاي تيىپ ۇستاۋىم بولاشاعىنا الاڭداعاندىقتان، قورقىنىشتان. جالعىزباستى انا بولعاننان كەيىن، قاسىمدا جولداسىم بولماعاننان كەيىن مەنى دە تۇسىنۋگە بولاتىن شىعار. كەڭەسەتىن اكە-شەشەم دە جوق، اجەم دە جوق. ءبارى وسى ومىردەن قايتقان. بۇكىل جاۋاپكەرشىلىكتى مەن ءوز موينىما الۋعا تۋرا كەلدى. سوندىقتان دا وسى ۇل-قىزدارىمنىڭ تاعدىرى، بولاشاعى كوبىنەسە ماعان بايلانىستى دەپ ويلايمىن. سوندىقتان دا مەن وسىنداي قاتال شىعارمىن. بارلىعى وسىمەن تۇسىندىرىلەتىن شىعار.  كوبىسى ويلايدى عوي بۇعان بىرەۋ كومەكتەسەدى-اۋ، بۇنىڭ تىرەگى بار-اۋ دەپ نەشە ءتۇرلى ويلار كەلەتىن شىعار. ەشكىمنىڭ ويىنا توسقاۋىل قويا المايمىز. ءبىراق مەنىڭ ايتارىم، ءۇش بالانى تاربيەلەۋ وڭاي ەمەس، قيىن. كىشكەنتاي كەزىندە ءوزىنىڭ قيىنشىلىعى بولادى، وسكەن سايىن جاۋاپكەرشىلىگى دە ارتادى. ءجاسوسپىرىم شاعىندا «وتپەلى كەزەڭ» دەگەن بولادى. بۇنىڭ ءبارى وڭاي ەمەس.

— بولاشاقتا بالالارىڭىزدىڭ كىم بولعانىن قالايسىز؟ جالپى ءسىز ولاردىڭ تاڭداۋىنا ارالاساسىز با؟

— جوق، ولاردىڭ تاڭداۋىنا مەن ارالاسپايمىن. وزدەرىنە مۇمكىندىك بەرەمىن. ويتكەنى مەنىڭ ءوز باسىمدا وتكەن جاعدايدى ايتايىن، دالەل رەتىندە. مەن زاڭ ۋنيۆەرسيتەتىن بىتىرەمىن دەپ ويلاعان جوقپىن. ونى ارمانداعان دا جوقپىن. مارقۇم اكەم جاقسى زاڭگەر بولعان، جاقسى قورعاۋشى بولعان كەزىندە. باستاپقىدا، تاۋەلسىزدىك العان كەزدەردە ەلىمىزدە زاڭگەرلەر، ەكونوميستەر كەرەك بولدى. كوپشىلىگى وسى ماماندىقتارعا تۇسەتىن. سودان انام ويلاعان عوي وسى سالادا ءبىلىم السا دەپ. ال ءوزىم اكتەرلىق وقۋدى بىتىرەمىن دەگەن ەدىم. ونەرگە بارايىنشى دەپ سۇراعانمىن دا. ءبىراق انام قارسى بولدى. ءوز باسىمنان وتكەننەن كەيىن بالالارىمنىڭ قاتەلەسپەۋىن، وزدەرىنە ۇناعان ماماندىقتى تاڭداعانىن قالايمىن.

— سوڭعى ۋاقىتتا ءان جازدىرىپ، مۋزىكاعا بەت بۇرعانىڭىزدى بايقاپ قالدىق. بۇل دا بالا كۇنگى ارمانىڭىز با؟

— (كۇلىپ) ءيا، ول دا ارمانىم. مەن قايتپايتىن اداممىن عوي. ارماندارىمنىڭ ءبارىن ورىنداماسام، كوڭىلىم جاي تاپپايدى. داۋسىم ءبىر سونداي كەرەمەت بولماسا دا بالالىق شاقتان ءان ايتىپ جۇرگەنمىن. نەگىزى اجەمنىڭ داۋسى جاقسى بولعان، ءاندى دە شەبەر ورىندايتىن. كەزىندە نۇرعيسا تىلەندييەۆتىڭ «وتىرار سازى» وركەسترىندە شاڭقوبىز اسپابىندا ويناعان. مۋزىكادان ءدارىس بەرگەن. ءبىراق ناعاشى اتام وتە قىزعانشاق كىسى بولعان سوڭ اپاما رۇقسات بەرمەگەن (كۇلىپ). مەن ەندى ارنايى مەكتەپكە بارىپ، مۋزىكالىق ءبىلىم العان جوقپىن. دەگەنمەن ازداپ سول اجەمنەن بەرىلگەن بولار. ءبىراق ءان جازدsرعاندa ۇلكەن ساحناعا شىعىپ، ەسترادا جۇلدىزى بولامىن دەگەن ماقسات جوق مەندە. ءوزىم ءۇشىن، جاقىندارىم ءۇشىن ورىنداپ ءجۇرمىن.

— زاڭگەر، تەلەجۇرگىزۋشى، ءانشى، اكتريسا. قايسىسى جانىڭىزعا جاقىن؟

— ءبارى جاقىن ماعان. مەن ءوزىم سۇيمەيتىن جۇمىسپەن، قىزىقپايتىن نارسەمەن اينالىسپايمىن. وعان ۋاقىتىمدى ءبولىپ قايتەمىن؟ وعان ۋاقىتىمدى ءبولىپ ەمەس، ۋاقىتىمدى جۇمساپ قايتەمىن؟ ءومىر ءبىر-اق رەت بەرىلەدى. مۇمكىندىك بولسا تەك قانا ءوزىڭدى قىزىقتىراتىن، ۇنايتىن ىسىڭمەن اينالىسۋىڭ كەرەك دەپ ويلايمىن.

— بالا كۇنگى ارماندارىڭىزدىڭ بارلىعىنا قول جەتكىزىپ كەلەدى ەكەنسىز. تاعى قانداي ارماندارىڭىز بار؟

— (كۇلىپ) ايتپايمىن. ايتپەسە، ورىندالماي قالادى. ورىندالعاننان كەيىن ەستيسىزدەر عوي…

— ءۇي شارۋاسىمەن ءوزىڭىز اينالىساسىز با؟

— قولىم قالت ەتكەندە مىندەتتى تۇردە، ارينە. بالالارىما تاماق ازىرلەيمىن. مەنىڭ قولىم تيمەسە، جۇمىستان شىعا الماي جاتسام، قىزدارىم ىستەيدى. ءۇي تازالاۋ، ءۇي جيناۋ – سولاردىڭ قولىندا، سولاردىڭ موينىندا. مەن ولارعا اكەمىن دە، شەشەمىن دە. قولىمنان كەلگەنشە بارلىعىن جاساپ جاتىرمىن.

— جاس، ادەمى كورىنەسىز. ءوزىڭىزدى قالاي كۇتەسىز؟

— كوبىسى وسى سۇراقتى قويادى. اۋزىمدى تولتىرىپ ايتاتىنداي، كۇتىم جاسامايمىن، شىنى كەرەك. بۇل قانىمدا بار نارسە. مارقۇم انام دا ءبىراز جاس كورىنگەن ەدى. ول كىسى دە اۋىر ناۋقاستىڭ سالدارىنان دۇنيەدەن ەرتە قايتتى. وزىمە كەلەتىن بولسام، ۋاقىتىم بار كەزدە سپورتپەن اينالىسامىن. سونىڭ ءوزى اسەر ەتەتىن شىعار. ودان بولەك 5 جىلداي بالەت ۋچيليششەسىندە وقىدىم. فيزيكالىق تۇرعىدان الاتىن بولساق،  مۇمكىن دەنەمە ونىڭ دا اسەرى بار شىعار. ال بىلاي تۇقىمىمىزدا 35 جاسقا دەيىن وتە جاس كورىنەمىز. كىم بىلەدى، مۇمكىن سوسىن جاقسىلاپ كۇتىم جاساۋ كەرەك بولار.

— قىزدارىمىزعا، بولاشاق انالارىمىزعا، سىڭلىلەرىڭىزگە قانداي كەڭەس ايتاسىز؟

— ادام دەگەن ءوز ومىرىنە قاناعاتتانۋ ءۇشىن، سۇيىكتى ىسىمەن اينالىسۋ كەرەك. سوسىن وتباسى قۇرعان بولسا، بالا-شاعاسى بار بولسا، ەڭ باستىسى سول بالا-شاعانىڭ اماندىعىن، دەنىنىڭ ساۋلىعىن ويلاۋى كەرەك. انا ءۇشىن ەڭ ماڭىزدىسى سول. قالعانىنىڭ ءبارىن كۇش-قۋات، مۇمكىندىك بولىپ جاستا، ورىنداۋعا بولادى. تەك بويداعى جالقاۋلىقتى، جىگەرسىزدىكتى جەڭە ءبىلىپ، ەڭبەككە قۇشتار بولا الساق، بارلىعىنا قول جەتكىزەمىز.

ماتەريال ikerim.kz سايتىنان الىندى.