الەمدەگى ەڭ ۇزدىك مەديسينالىق تەحنولوگيا

جاپون مەديسيناسى جاڭاشا تەحنولوگيالارىمەن تانىمال. مەديسينالىق ورتالىقتار زاماناۋي تەحنيكالارمەن جابدىقتالعان. تەحنولوگيالىق كورسەتكىشى جونىنەن الەمدە ءبىرىنشى ورىندا تۇرعان جاپونياعا اۋرۋحانالار مەن ەمحانالارداعى  ماگنيتتىك-رەزونانستىق توموگرافيالىق اپپاراتتار سانى جونىنەن تەڭدەسەر مەملەكەت الەمدە كەزدەسپەيدى. جاپون اۋرۋحانالارىنداعى جاڭاشا ءارى تەڭدەسسىز كومپيۋتەرلىك تەحنولوگيالار ەمدەلۋشىلەرگە جىلدام ءارى ساپالى قىزمەت كورسەتۋدە. جاپونيانىڭ مەديسينالىق تەحنولوگياسى الەمدەگى ەڭ ۇتىمدى تەحنولوگيا دەپ تانىلعان.

كۇنشىعىس ەلىندەگى ەمحانالاردىڭ 80 پايىزى جەكەمەنشىك ساناتىندا. ءبىراق ەمدەلۋ اقىسىنىڭ بارلىق تۇرلەرى مەملەكەت تاراپىنان بەلگىلەنەتىندىكتەن ەمدەلۋشىلەر ءۇشىن مەملەكەتتىك پەن جەكە مەنشىك ەمحانا اراسىندا اسا ءبىر ايىرماشىلىق جوق دەۋگە بولادى. ياعني، بۇل ەلدە مەديسينالىق قىزمەت اقىسىن مەملەكەت باقىلاۋدا ۇستايدى. جاپونياداعى ەمدەلۋ اقىسى نەگىزىنەن ەۋروپا ەلدەرىندەگى ەمدەلۋ اقىسىمەن دەڭگەيلەس. جانە مەديسيناسىنىڭ قۇنى مەن ساپاسىنىڭ تەڭدەسۋى تۇرعىسىنان جاپونيا الەمدەگى جەتەكشى ەل سانالادى.

2050 جىلى جاپونيادا جاسى 100-دەن اسقان ادام سانى 1 ميلليوننان  اسپاق

بۇگىندە جاپونيا مەديسينالىق قىزمەت كورسەتۋ ساپاسى جونىنەن الەمدە الدىڭعى ورىندا تۇرعان مەملەكەت. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا جاپونيا مەديسينالىق جەتىستىكتەرى جونىنەن شۆەيساريا، يزرايل سياقتى مەملەكەتتەردىڭ  الدىندا تۇر. جاپونياداعى دەنساۋلىق ساقتاۋ جۇيەسىنىڭ جوعارى دەڭگەيدە ەكەنىن ءومىر جاس ۇزاقتىعىنان دا كورۋگە بولادى. قازىرگى تاڭدا جاپونداردىڭ ورتاشا ءومىر جاس ۇزاقتىعى  79،19 (ەرلەر) جانە 85،99 (ايەلدەر). بۇل دۇنيەجۇزى بويىنشا ءبىرىنشى ورىن دەگەن ءسوز. سوڭعى 25 جىلدا جاپون ايەلدەرى جاس ۇزاقتىعى بويىنشا الەمدىك رەيتينگتە ءبىرىنشى ورىننان تۇسپەي كەلەدى.

بۇۇ-نىڭ مالىمەتى بويىنشا 2050 جىلى جاپونيادا جاسى 100-دەن اسقان ادام سانى 1 ميلليوننان اسادى دەپ بولجانۋدا. جاپونيادا نارەستەنىڭ شەتىنەۋى دۇنيەجۇزى بويىنشا ەڭ تومەنگى كورسەتكىشكە يە: 1000 جاعدايدا 2،8. ال بۇل كورسەتكىش گەرمانيادا  4،0،  اقش-تا  6،3،  رەسەيدە  10،5.

بۇل ەلدە ەمدەلۋ دەمالۋمەن ۇشتاسىپ جاتادى

جاپون مەديسيناسىنىڭ تاعى ءبىر ەرەكشەلىگى، بۇندا مەملەكەتتىك ەمحانالاردا جۇمىس ىستەيتىن دارىگەرلەر جالاقى الادى. ال جەكە مەنشىك ەمحانا قىزمەتكەرلەرىنە مەملەكەت تاراپىنان گونورار تولەنەدى. گونورار مولشەرىن ۇكىمەت بەلگىلەيدى. جاپون مەديسينالىق جۇيەسىنىڭ جەتىلگەندىگى سونشا، بۇندا قاريالار سانىنىڭ شەكتەن تىس كوپتىگىنە قاراماستان ناۋقاستار باسقا مەملەكەتتەرمەن سالىستىرعاندا وتە از. حالىقتىڭ دەنساۋلىققا جۇمسايتىن شىعىنى بۇكىل مەملەكەتتىك شىعىننىڭ 12 پايىزىن قۇرايدى. ءتورت ادامنان قۇرالعان ءبىر وتباسىنىڭ مەديسينالىق ساقتاندىرۋعا جۇمسايتىن قارجىسى  4 پايىز دەڭگەيىندە.

جاپونيادا مەديسينالىق ورتالىقتار مەن ەمحانالار شيپاجايلى قالاشىقتاردا، بالنەولوگيالىق دەمالىس ورىندارىنا جاقىن ورنالاسقان. سوندىقتان جاپونيادا ەمدەلۋ دەمالۋمەن ۇشتاسىپ جاتادى.

جاپونيادا عىلىمي مەديسينا جوعارى دەڭگەيدە دامىعان. مىسالى، دياگنوستيكا، ونكولوگيا، كارديولوگيا، كارديوحيرۋرگيا، نەيروحيرۋرگيا، ەستەتيكالىق  مەديسينا، رەپرودۋكتيۆتى مەديسينا، گاستروەنتەرولوگيا، ت.ب. سالالارداعى زەرتتەۋلەر جۇرگىزگەن جاپون عالىمدارىنىڭ ەڭبەكتەرى الەمدە مويىندالعان.

جاپونيادا قازىرگى تاڭدا 140 مىڭ ەمدەۋ ورتالىعى بار. ونىڭ ىشىندە 80 مىڭ ەمحانا، 10 مىڭ اۋرۋحانا، پرەفەكتۋرا اكىمشىلىگىنە باعىناتىن 850 مەديسينالىق ورتالىق جانە 50 ستوماتولوگيالىق كلينيكا. ناۋقاستىڭ ەمدەلۋ ورتالىعىندا جاتۋ ۇزاقتىعى الەم بويىنشا ءبىرىنشى ورىندا تۇر. اۋرۋ كىسى تولىعىمەن 19 كۇن جاتىپ ەم قابىلداۋىنا بولادى. ايەلدەردىڭ بوسانعان سوڭ پەرزەنتحانادا 5 تاۋلىك قالۋىنا مۇمكىندىگى بار. ال اقش، رەسەي، ت.ب. ەلدەردە ايەلدەر بوسانعان سوڭ  پەرزەنتحانادا  1-2 كۇن عانا بولادى.

جاپونيادا دارىگەرلەرگە تالاپ قاتال

جاپونيادا دارىگەرلەرگە قويىلاتىن تالاپ وتە جوعارى. وتباسىلىق دارىگەر  بولىپ قىزمەت ەتۋ ءۇشىن ماماندار مەديسنالىق جوعارى وقۋ ورنىن بىتىرۋمەن قاتار قيىن ەمتيحاندار تاپسىرۋى كەرەك. جاس دارىگەرلەر تەراپيا، پەدياتريا، جەدەل مەديسينالىق كومەك، حيرۋرگيا، پسيحياتريا سياقتى مەديسينا سالالارىندا ءۇش جىل تاجىريبە جيناۋعا مىندەتتى. بۇدان بولەك ارنايى دايىندىق كۋرسىنان وتەدى.

جاپونيانىڭ  قىرىق جاستان اسقان تۇرعىندارى تەگىن كەشەندى تەكسەرۋگە جازىلادى. ال ايەلدەر تەگىن گينەكولوگيالىق، بالالار بولسا تۇراقتى پروفيلاكتيكالىق تەكسەرىستەن وتەدى. ۇكىمەت كومپانيالاردىڭ ءوز قىزمەتكەرلەرىنىڭ مەديسينالىق تەكسەرىسىنە جىل سايىن اقى تولەۋىن قاداعالايدى.

جاپونيا تۇرعىندارى تولىعىمەن مەملەكەت تاراپىنان جانە جۇمىس بەرۋشىنىڭ قامقورلىعىمەن مەديسينالىق ساقتاندىرۋمەن قامتىلعان. قازىرگى تاڭدا جاپونيانىڭ جالپى ىشكى ءونىمىنىڭ 8،1 پايىزى دەنساۋلىق ساقتاۋعا جۇمسالادى. وسى ورايدا جاپونياداعى مەديسينالىق قىزمەت كورسەتۋ جۇيەسىندەگى كورسەتكىشتەردىڭ ساقتاندىرۋعا ەكى ەسە ارتىق قارجى جۇمسايتىن اقش-پەن سالىستىرعاندا اناعۇرلىم جاقسى ەكەندىگىن ايتا كەتۋ كەرەك. جاپونيا بۇنداي جەتىستىككە دارىگەرلەر ەمدەلۋشىنىڭ قالتاسىنا كوز ءسۇزىپ، كولدەنەڭ تابىس تابۋىنا اپارار جولدى جاۋىپ تاستاۋ  ارقىلى قول جەتكىزدى. 

جاپونيا جوعارى وقۋ ورىندارىنىڭ جانىنان اشىلعان 80 مەديسينالىق مەكتەپتە 6 جىل بويى دارىگەرلەردى دايارلايدى. بۇنداي وقۋ ورىندارىنا جىلىنا 8 مىڭ ستۋدەنت قابىلدانادى.

دارىگەرلەردىڭ جالاقىسى، ەمدەلۋ قىزمەتتەرىنىڭ اقىسى، دارى-دارمەك قۇنى مەن مەديسينالىق تاۋارلاردىڭ باعاسىن دەنساۋلىق ساقتاۋ مينيسترلىگى جانىنداعى الەۋمەتتىك جانە مەديسينالىق قىزمەت كورسەتۋ كەڭەسى بەلگىلەيدى. سوندىقتان بۇل ەلدە مەديسينا سالاسىندا الاياقتار كەزدەسپەيدى.

جاپونيادا مەديسينا سالاسىندا زەرتتەۋلەر جۇرگىزەتىن 137 عىلىمي ينستيتۋت  بار. بۇل عىلىمي ينستيتۋتتاردىڭ بازاسىندا اشىلعان جاڭالىقتار جاپون عالىمدارىن الەمگە تانىتقان.

شارافات جىلقىبايەۆا

جاپونتانۋشى