كاسىپكەر جەڭىس تۇركيا «مومىش ۇلى» اتىنداعى نامىس مەدالىمەن ماراپاتتالدى

كاسىپكەر جەڭىس تۇركيا «مومىش ۇلى» اتىنداعى نامىس مەدالىمەن ماراپاتتالدى، بۇل تۋرالى «قامشى» اقپاراتتىق پورتالى حابارلايدى. توسبەلگىنى اۋعان سوعىسى ارداگەرلەر ۇيىمىنىڭ «قازاقستان ارداگەرلەرى» قاۋىمداستىعىنىڭ ءتوراعاسى باقىتبەك سماعۇل تابىستادى.

جەڭىس تۇركيا ەل تاۋلەسىزدىگىن الىپ، «كوشى-قون» ساياساتى قولعا الىنعان تۇستا اتاجۇرتقا العاشقى بولىپ كەلگەن قانداستاردىڭ وكىلى. ول ەلگە كەلگەن سوڭ كاسىپكەرلىكپەن اينالىسىپ، قوعامدىق-مادەني ومىرگە ات سالىستى.

ول، «ەر جانىبەك» حالىقارالىق قورىنىڭ پرەزيدەنتى. «ەر جانىبەك» قورى الەم قازاقتارى اياسىندا اتاۋلى مەرەكەلەردى ۇيىمداستىرىپ، ءىس-شارالار وتكىزىپ كەلەدى. ول تاۋەلسىزدىكتىڭ 25 جىلدىعى مەرەكەسىنە بايلانىستى «تاۋەلسىزدىگىمىزگە 25 جىل تولدى. شيرەك عاسىر از ۋاقىت ەمەس. وسى ارالىقتا ەلىمىز باعدارىن تۇزەپ، باعىتىن ايقىنداپ، تۇعىرىن بەكىتتى، تامىرىن تەرەڭگە جايا ءتۇستى. بۇل الەمدەگى قازاق جۇرتى ءۇشىن ۇلكەن قۋانىش، زور مەرەي. تاۋەلسىزدىگىمىزدىڭ وسىنداي اتاۋلى مەرەكەسى مەملەكەت كولەمىندە كەڭىنەن تويلانىپ جاتىر. وعان ءۇن قوسۋ ەل ازاماتتارىنىڭ بورىشى» دەيدى ءوز سوزىندە. سونداي-اق، «الداعى جوسپارلار تۋرالى ايتار بولساق، قازاق ءۇشىن ەڭ ءبىر كيەلى ۇعىمنىڭ ءبىرى الاش دەسەك ارتىق ەمەس. بۇيىرتسا، كەلەسى 2017 جىلى الاشوردا ۇكىمەتىنىڭ قۇرلىنعانىنا 100 جىل تولادى. وسى مەرەيتويعا بايلانىستى كىتاپتار شىعارساق دەيمىز. سوندايق-اق، كەلەر جىلى حاليفا التايدىڭ 100 جىلدىعى، تانىمال عالىم مارقۇم تۇرسىنبەك كاكىشيەۆ اعامىزدىڭ 90 جىلدىعى سەكىلدى اۋقىمدى شارالاردىڭ ويداعىداي وتۋىنە اتسالىسۋدى ويلاستىرىپ وتىرمىز»، - دەپ وتىر توسبەلگى يەسى. 

جەڭىس مىرزا "قامشى" پورتالى ۇيىمداستىرعان "قازاق حاندىعىنا 550 جىل" مەرەكەلىك كونسەرتىنىڭ باس دەمەۋشىلەرىنىڭ ءبىرى بولعان.