"الماتى ارەنادا" شارشى الاڭعا كوتەرىلگەن ەكىنشى جۇپ ايدار شارىبايەۆ (قازاقستان) - حۋان وكۋرا (يسپانيا) باسكەسىندە جەرلەسىمىز جەڭدى. جەرلەسىمىز ءبىرىنشى راۋندتا وسالداۋ ءتۇسىپ، كوڭىلىمىزدى قوبالجىتقان، ەكىنشى راۋندتا قارسىلاسىنان باسىم ءتۇستى. ال، ءۇشىنشى راۋندتا ايقىن باسىمدىلىق كورسەتىپ، قارسىلاسىن قۋالاپ ءجۇرىپ سوقتى. الايدا، سوڭعى سەكۋندتا قاتتى سوقىپ جىبەرىپ الدى. ءتورتىنشى راۋندتا جەرلەسىمىز دە، قارسىلاسى دا قاتتى شابۋىلدار جاساي المادى، شارشاعانى بايقالدى. بەسىنشى راۋندتا بولسا، ايداردىڭ قولعابىنىڭ باۋى شەشىلىپ كەتىپ، شامالى ءۇزىلىس بولدى. دەگەنمەن ايدار يسپاندىققا بىرنەشە سوققىسىن ءساتتى دارىتتى. التىنشى راۋند حۋان وكۋرانىڭ شابۋىلداۋىمەن باستالدى. ايدار دا قاراپ قالماي، بىرنەشە رەت قۇلاشتاي سەرمەدى. سولاي بولسا دا، جەرلەسىمىزگە قاراعاندا يسپاندىق تىڭ كورىندى. تورەشىلەر جەڭىستى ايدارعا بەردى.

ايدار شارىبايەۆ ءبىر ايدان استام ۋاقىتتىڭ ىشىندە ەكىنشى جەكپە-جەگىن وتكىزدى. 24 قىركۇيەك كۇنى وتانداسىمىز گرۋزيالىق زازا اميرادزەنى ءبىرىنشى راۋندتا-اق تەحنيكالىق نوكاۋتپەن ۇتقان بولاتىن. بۇل جولى يسپان بوكسشىسى حۋان وكۋرامەن جۇدىرىقتاستى. يسپاندىق وسىعان دەيىن كاسىپقوي بوكستا 18 جەكپە-جەك وتكىزگەن. 11 كەزدەسۋىندە جەڭىسكە جەتىپ، 1 جەكپە-جەگىن تەڭ اياقتاعان. قالعان كەزدەسۋلەرىندە جەڭىلگەن.