اقش-تىڭ مەملەكەتتىك دەپارتامەنتى ىستامبۇلداعى باس كونسۋلدىق قىزمەتكەرلەرىنىڭ وتباسىلارىنا قالانى تاستاپ شىعۋ تۋرالى بۇيرىق بەردى، - دەپ حابارلايدى Qamshy.kz.

بۇل تۋرالى مەملەكەتتىك دەپارتامەنت سايتىندا جاريالاندى.

مۇنداي ارەكەتتى اقش بيلىگى امەريكاندىقتارعا شابۋىل جاسالۋ قاۋىپىمەن ءتۇسىندىرىپ وتىر. بۇعان دەيىن تۇركيادا جۇرگەن اقش ازاماتتارىنا حالىق تىعىز شوعىرلانعان ورىندارعا بارماۋ تۋرالى كەڭەس بەرىلگەن بولاتىن.

«ىستامبۇلدىڭ اقش ازاماتتارى ءجيى باراتىن، مەكەندەيتىن ورىنداردا ەكسترەميستىك توپتاردىڭ شابۋىل جاساۋعا باعىتتالعان اگرەسسيۆتى ارەكەتتەرى جالعاسۋى تۋرالى اقپاراتتارعا بايلانىستى مەملەكەتتىك دەپارتامەنت وسىنداي شەشىم قابىلدادى»، -دەلىنگەن ول حابارلامادا.

سونىمەن قاتار، حابارلامادا بۇل تاپسىرما تەك ىستامبۇلداعى باس كونسۋلدىققا عانا قاتىستى ەكەندىگى، تۇركياداعى باسقا ديپلوماتيالىق وكىلدىكتەرگە بۇل تاپسىرمانىڭ مىندەتتەلمەيتىنى ايتىلعان.

ۆەدومستۆو سونداي-اق، تۇركيادا سوڭعى ۋاقىتتا بولعان لاڭكەستىك ارەكەتتەر مەن ۇستالعان، تۇتقىندالعان امەريكاندىقتاردىڭ كونسۋلعا حابارلاسۋ مۇمكىندىكتەرىن شەكتەۋ وقيعالارىنا دا نازار اۋدارتقان.