كەشە قازاقستاننىڭ حالىق ءارتىسى، اكتەر، رەجيسسەر تۇڭعىشباي جامانقۇلوۆتىڭ «فەنيكس» كوركەم ءفيلمىنىڭ تۇسىرىلىمىنە بولىنگەن قاراجاتتان 69 ميلليون تەڭگە جىمقىردى دەگەن كۇدىكپەن قاماۋعا الىنعانى تۋرالى حابارلاعان بولاتىنبىز.

الەۋمەتتىك جەلى مەن قوعام بەلسەندىلەرى اراسىندا ت. جامانقۇلوۆتىڭ ۇستالۋى قىزۋ تالقىلاۋعا تۇسۋدە. پىكىر بىلدىرۋشىلەردىڭ ءبىرى تانىمال اكتەردىڭ ۇستالۋىن قانداي دا ءبىر ساياسي ينتريگانىڭ سالدارى دەسە، ءبىر توپ قارجى جىمقىرۋ تۋرالى جورامالعا سەنەتىندەرىن ايتۋدا.

Qamshy.kz ءتىلشىسى وسى وقيعاعا وراي پىكىرلەرىن سۇراپ بىرنەشە تەاتر، ونەر قايراتكەرلەرىنە حابارلاسقان بولاتىن. ءبىر تاڭ قالارلىعى، حابارلاسقان ازاماتتاردىڭ دەنى اتالعان جاعدايعا بايلانىستى قانداي دا ءبىر پىكىر بىلدىرۋدەن باس تارتتى.

قازاقستاننىڭ حالىق ءارتىسى، اكتەر، رەجيسسەر ءاسانالى ءاشىموۆ ت. جامانقۇلوۆتىڭ ۇستالۋى تۋرالى ەشتەڭە ايتا المايتىنىن ايتتى.

«بىلمەيمىن. بۇل تۋرالى ەشقانداي حابارىم جوق. بىلمەگەن سوڭ نە ايتاسىڭ. ەشتەڭە ايتا المايمىن»، - دەيدى ا. ءاشىموۆ.

ال، تاعى ءبىر تەاتر اكتەرى بەكجان تۇرىس الماتى اۋماعىنان تىس جەردە جۇرگەندىكتەن بۇل حاباردى ەندى ەستىپ جاتقانىن، ءمان-جايعا قانىق ەمەستىگىن ايتتى. 

بۇعان دەيىن، قازاقستاننىڭ تەاتر قايراتكەرلەرى وداعىنىڭ كەزەكتەن تىس جيىنىندا ا. ءاشىموۆ ت. جامانقۇلوۆتى ت. جۇرگەنوۆ اتىنداعى قازاق ۇلتتىق ونەر اكادەمياسىندا ورىن العان جاعداي تۋرالى پىكىرى ءۇشىن سىناعان بولاتىن.