ەلىمىزدىڭ ءبىرقاتار تەاتر قايراتكەرلەرى ق ر حالىق ءارتىسى، اكتەر، رەجيسسەر تۇڭعىشباي جامانقۇلوۆتىڭ قامالۋىنا بايلانىستى halyknews.kz پورتالىنا پىكىر ءبىلدىردى، - دەپ حابارلايدى Qamshy.kz.
ەسمۇحان وبايەۆ – قازاقستاننىڭ حالىق ءارتيسى، پروفەسسور
مەن بۇل جونىندە پىكىر ايتا المايمىن. سەبەبى نە ءۇشىن، قالاي…ۇقپايمىن. سەنۋگە بولا ما، بولماي ما، بۇل جونىندە ەش حابارىم جوق. ۇزاق جىلدار قازاق ونەرىندە، پروفەسسيونالدى ونەرىندە، كينوسىندا، تەاترىندا جۇمىس ىستەگەن ادام. ونى ەشكىم سىزىپ تاستاي المايدى، ال قالعانىن مەن ۇقپايمىن.
ەركىن جۋاسبەك – ق ر ونەر قايراتكەرى، تەاتر سىنشىسى
«اققا – قۇداي جاق» دەيدى. ەگەر اعامىز شىن مانىندە سونداي بولعان جاعدايدا، مەن اقتالىپ شىعاتىنىنا كامىل سەنەمىن. ءقازىر ءومىر وسىنداي بولعاندىقتان، مۇمكىن ءبىر الدىن-الا تەكسەرۋ، تاعى دا باسقا شارانىڭ شارۋاسى شىعار دەگەن ءۇمىتىم بار. كىمگە بولسا دا، بۇل ءوزى وڭاي بوپ تۇرعان شارۋا ەمەس. سوندىقتان، ءۇمىتىم بىرەۋ-اق، اقتالىپ، ءوزىنىڭ وتباسىنا، ورتامىزعا قايتادان كەلەدى دەگەن ويدامىن. بۇل دا ءبىر ۋاقىتشا نارسە شىعار.
اسكەر قۇلدانوۆ – قويۋشى-رەجيسسەر، ق ر مادەنيەت قايراتكەرى
تەاتر ساحناسىندا ونىڭ ەڭ باستى ءرولى، قازاقتىڭ بەتكە شىعار ادامدارىنىڭ بارلىعىن ويناعان ازامات. مەن مينيسترگە ايتار ەدىم، بۇل ازاماتتى قورلاعانى – ونەردى قورلاعانى، قازاق تەاترلارىن قورلاعانى جانە مينيستر ءوزىن قورلاعانى دەپ ەسەپتەيمىن!
قۋاندىق قاسىموۆ – قازاقستاننىڭ ەڭبەك سىڭىرگەن قايراتكەرى، وڭتۇستىك قازاقستان وبلىستىق تەاترىنىڭ كوركەمدىك جەتەكشىسى
قىر-سىرىن بىلمەيمىز عوي، ارعى جاقتا نە بولىپ جاتقانىن. ونىڭ قانداي قۇپيا ەكەنى بولاشاقتا اشىلار. اق، ادال جان رەتىندە مەن بىلەتىنمىن. ول كىسى تەاتردىڭ تابالدىرىعىن اتتاپ، اكتەرلىق قىزمەتتى باستاعان، ءارقاشاندا دا ۇجىمعا وڭ كوزىمەن قاراپ تۇرعان ادام. بۇل كەلەڭسىز جاعدايلار دا باسىنان وتەر، ءبىراق جاسى كەلگەندە وتە قيىن. ادامنىڭ ىستەگەن ءىسى ءبارىبىر ەرتەڭ اقتالىپ شىعادى عوي دەپ ويلايمىن. ويتكەنى، ول قازاق تەاترىنىڭ قالاي بولسا دا – تۇلعاسى. قانداي جاعداي بولسا دا – تۇلعاسى. ساحنادا جاسالعان ءوزىنىڭ قايتالانباس وبرازدارى بار، ونى، ول ونەردى ەشكىم تارتىپ الا المايدى.
