الماتى وبلىسىندا توپتاسىپ قىز زورلاعان 4  جىگىتتىڭ ءىسى قايتا تەرگەلەتىن بولدى، - دەپ حابارلايدى  Qamshy.kz كتك ارناسىنا سىلتەمە جاساپ.

ۇكىم شىعارۋ ءۇشىن كەڭەسۋ بولمەسىنە كەتىپ، 5 كۇن ويلانعان سۋديانىڭ شەشىمى وسىنداي. ەندى ونسىز دا ساعىزشا سوزىلعان سوت وتىرىسى قايتا جالعاسادى. ياعني سۋديا سان مارتە سۇرالعان ساراپشىلاردىڭ پىكىرىن تاعى ءبىر تىڭداپ كورۋدى ءجون ساناپتى. ال بۇعان دەيىنگى وتىرىستا پروكۋرور ءتورت ايىپتالۋشىنىڭ ءارقايسىسىنا 11 جىلدان سۇراعان بولاتىن.

ەسىك قالاسىنداعى اۋداندىق سوت عيماراتىندا قاس قارايسا دا قىزۋ جۇمىس قايناپ جاتىر. ويتكەنى توپتاسىپ قىز زورلاعان ءتورت جىگىتكە ۇكىم وقىلادى دەگەندى ەستىپ، قوس تاراپتىڭ تا تۋىستارى تايلى-تۇياعى قالماي جينالعان. الايدا كەشكى ساعات 5-تە باستالۋى ءتيىس سوت وتىرىسى تالايدىڭ جۇيكەسىن توزدىردى. ويتكەنى ءۇش ساعات بويى تار بولمەگە تىعىلعاندار سۋديانى كۇتىپ ابدەن دىڭكەلەگەن. سوت تا كەلە سالا ەشكىم كۇتپەگەن شەشىم شىعارىپ، جينالعانداردى تاڭ قالدىردى.

ەرلان بايمولدينوۆ، سۋديا:

-سوت زەرتتەۋ جاساعان ساراپشىلاردان قايتا جاۋاپ الۋ ءۇشىن سوت تەرگەۋىن جالعاستىرۋ تۋرالى ۇيعارىم جاسادى. كەلەسى وتىرىس 18ء-شى قاراشاعا بەلگىلەنسىن.

جابىرلەنۋشى جىبەك مۋسينوۆا دا بۇگىن سوتقا سوڭعى نۇكتە قويىلىپ، ءوزىن قورلاعاندار ءادىل جازاسىن الادى دەپ ويلاعان. ەندى تەرگەۋدىڭ جالعاساتىنىن ەستىپ، كوڭىلى كۇپتى بولىپ تۇر.

جىبەك مۋسينوۆا، جابىرلەنۋشى:

-ايتارعا ءسوزىم جوق. بۇگىن ۇكىم شىعادى دەپ ويلاعام. ءبىراق بولمادى. نە ءۇشىن بۇلاي بولعانى تۇسىنىكسىز.

مۇنداي شەشىمدى جابىرلەنۋشىنىڭ ادۆوكاتى دا تۇسىنبەي وتىر. ايمان وماروۆا ءتىپتى، سوتقا بىرەۋلەر قىسىم جاساۋى دا مۇمكىن ەكەنىن جاسىرمايدى.  

ايمان وماروۆا، جىبەك مۋسينوۆانىڭ ادۆوكاتى:

ء-بىزدىڭ ويىمىزشا، قىسىم جاسالىپ  جاتىر. نەگە دەسەڭىز سوت ۇكىم شىعارۋعا كەتكەن كەزدە كوبىنەسە ۇكىممەن كەلۋى كەرەك. نە اقتاۋ، نە سوتتاۋ...

جىبەك مۋسينوۆانىڭ زورلانعانىن اناسى الەۋمەتتىك جەلىدە جايىپ سالعان ەدى. قىلمىس اۋداندىق ىشكى ىستەر ءبولىمىنىڭ الدىندا بولعان. يەكتەرىنىڭ استىندا بولعان جايتتەن بەيحابار ساقشىلاردىڭ تورتەۋى جۇمىستان قۋىلدى. قىز زورلادى دەگەن كۇدىكتىلەر دە كوپكە ۇزاماي ۇستالعان بولاتىن. پروكۋرورلار ءقازىر قاماۋدا وتىرعان الماس پەن ەربول ەرمەكوۆتار، اسحات بەكتۇرسىن جانە نۇربول ەلتايدى 11 جىلعا سوتتاۋدى سۇراپ وتىر.