كەشە ق ر ينۆەستيسيالار جانە دامۋ ءمينيسترى جەڭىس قاسىمبەك مينيسترلىكتەگى ەڭ ۇزدىك ءۇش قىزمەتكەرمەن كەزدەسىپ، ەمەن-جارقىن سويلەسىپ، مينيسترلىك اسحاناسىندا كەشكى اس ءىشىپ، ءتىپتى جاس مامانداردىڭ ۇسىنىستارىن تىڭداپ، ساتتىلىك تىلەدى، دەپ جازادى BAQ.kz.

"مينيسترلىكتە "ق ر يدم ميسسياسى" دەگەن بايقاۋدىڭ قورىتىندىسى بويىنشا ءۇش قىزمەتكەر جەڭىمپاز اتانعان ەكەن. مينيستر ارقايسىمەن جەكە تانىسىپ، جاعدايىن سۇراپ، ەستەلىكتەرىمەن ءبولىسىپ، تەڭ دارەجەدە ديالوگ قۇرىپ، ءراۋىشتى ءبىر كەش ءوتتى. ەڭ بىرىنشىدەن، بۇل قالعان قىزمەتكەرلەر ءۇشىن ۇلكەن موتيۆاسيا دەپ بىلەم. بالاسى ۇزدىك شىعىپ، ءمينيستردىڭ ەرەكشە نازارىنا بولەنىپ جاتسا، قۋانبايتىن اتا-انا جوق. ەكىنشىدەن، باسشىلىق پەن قىزمەتكەرلەر اراسىنداعى بايلانىستىڭ نىعايۋى، ەڭبەكتىڭ ەلەنۋى، نازاردا بولۋ." - دەيدى مينيسترلىك قىزمەتكەرلەرى جەڭىس قاسىمبەكتىڭ باستاماشىلدىعى جونىندە.

ال مينيسترمەن بىرگە وتىرىپ كەشكى اس ءىشىپ، ەمەن-جارقىن اڭگىمە وربىتكەن بوتاگوز ەسىمدى قىزمەتكەر ءوزىنىڭ الەۋمەتتىك جەلىدەگى پاراقشاسىندا بۇل باستامانىڭ ەرەكشەلىگى تۋرالى توقتالعان ەكەن.

"كەشە ءبىزدىڭ مينيسترلىكتە «ق ر يدم ميسسياسى» بايقاۋىنىڭ جەڭىمپازدارى ماراپاتتالدى. مينيستر جەڭىس قاسىمبەك ءبىزدى قۇتتىقتاپ، ەستەلىك كىتاپتار مەن بيلەت ساتىپ الاتىن سىيلىق سەرتيفيكاتىن تابىستادى. ماراپاتتاۋ راسىمىنەن كەيىن جەڭىس ماحمۇد ۇلى جەڭىمپازداردى مينيسترلىك اسحاناسىنا كەشكى اسقا شاقىردى. ول جەردە مينيستر ءاربىر جەڭىمپازبەن جەكە تانىسىپ، وتباسىلىق، ءبىلىم جانە تاعى باسقا دا جەكە ومىرلەرىمىزگە قاتىستى جايتتاردى ءبىلدى. مينيستر ءوزىنىڭ قىزىعۋشىلىعى مەن بالالارىنىڭ نەمەن اينالىساتىنى تۋرالى دا قىسقاشا ايتىپ بەردى. ستۋدەنتتىك شاعىنداعى سۋرەتتەردى كورسەتتى. كەشكى اس بارىسىندا قازاقستاننىڭ كورشى ەلدەرمەن ىنتىماقتاستىعى تۋرالى، مينيسترلىكتە وتكەن جانە الداعى جوسپارلانعان ءىس-شارالار تالقىلاندى. مينيستر بىزدەن مينيسترلىك ترانسفورماسياسى اياسىندا ءوزىنىڭ ۇسىنىستارى تۋرالى سۇرادى. ونىڭ ىشىندە مينيسترلىك جۇمىسىن بۇدان ءارى قالاي جاقسارتۋ، قۇجات اينالىمىن قىسقارتۋ، شەشىمدەر قابىلداۋ جانە تاپسىرمالاردى كەلىسۋ ۇدەرىسىن وڭتايلاندىرۋ، مەملەكەتتىك قىزمەتشىلەردىڭ جەكە مۇمكىندىكتەرىن دامىتۋ سياقتى ماسەلەلەر بولدى. مەن ءوزىم سپورتپەن شۇعىلدانامىن. جۇمىستىڭ كوپتىگىنەن ارنايى سپورت كەشەندەرىنە بارا الماعاندىقتان، مينيسترلىك عيماراتىنان جاتتىعۋ زالىن اشۋ تۋرالى ۇسىنىس ايتتىم. سپورت دەنساۋلىق كەپىلى ەكەنىن ايتقان مينيستر، ۇسىنىسىما كەلىسىم بەرىپ، ق ر يدم جاۋاپتى حاتشىسىنا جاتتىعۋ زالىن اشۋعا ورىن قاراستىرۋ تۋرالى تاپسىرما بەردى. جالپى ەمەن-جارقىن اڭگىمەلەسكەن ساليقالى وتىرىس بولدى. وزگە ارىپتەستەرىم ءمينيستردىڭ جاقسى كورەتىن فيلمدەرى مەن قىزىعىپ وقيتىن كىتاپتارى تۋرالى سۇرادى. سونىمەن قاتار، مينيستردەن اقىل-كەڭەس تە سۇراپ قالۋعا مۇمكىندىگىمىز بولدى" - دەيدى قىزمەتكەرلەر.

ايتپاقشى، ءۇش قىزمەتكەردىڭ ءبىرى مينيسترلىك عيماراتىندا جاتتىعۋ زالىن اشۋ تۋرالى ۇسىنىس جاساپتى، بۇيىرسا كەلەر جىلى عيماراتىمىزدا سپورت زالى بولۋى مۇمكىن.

ايتا كەتۋ كەرەك، قىزمەتكەرلەر اراسىنداعى «ق ر يدم ميسسياسى» بايقاۋى «كاسىبي مەملەكەتتىك اپپارات قۇرۋ» ينستيتۋسيونالدىق رەفورماسىن جۇزەگە اسىرۋ ماقساتىندا مينيسترلىكتەگى ترانسفورماسيا ۇدەرىسى اياسىندا ءوتتى. مۇنداي شارا مينيسترلىكتە العاش رەت ءوتىپ وتىر. الداعى ۋاقىتتا توقسان سايىن مينيسترلىكتىڭ ۇزدىك قىزمەتكەرلەرىمەن ءدال وسىلاي ءمينيستردىڭ كەزدەسىپ وتىرۋ ءداستۇرى جالعاساتىن بولادى.