«اعىمداعى جىلعى 9 قىركۇيەكتە ۇكىمەتتىڭ كەڭەيتىلگەن وتىرىسىندا مەملەكەت باسشىسى ۇكىمەتكە اوك باعدارلاماسىن اعىمداعى «اگروبيزنەس – 2020» ۇكىمەتتىك باعدارلاماسى نەگىزىندە ازىرلەۋدى تاپسىرعان ەدى. ەلباسى اتاپ وتكەندەي، اۋىل شارۋاشىلىعى سالاسى قازاقستان ەكونوميكاسىنىڭ درايۆەرىنە اينالادى»، – دەپ اتاپ ءوتتى اسقار مىرزاحمەتوۆ.
ايتا كەتەيىك، تاۋەلسىزدىكتىڭ 25 جىلدىعىن ەلىمىز رەكوردتىق دەڭگەيدەگى استىقپەن قارسى الىپ وتىر. الەۋمەتتىك-ەكونوميكالىق دامۋ كورسەتكىشتەرى بويىنشا 9 ايدا اۋىل شارۋاشىلىعى سالاسى وندىرىستىك سالانى ارتقا تاستاپ، الدىڭعى قاتارعا شىقتى. مۇنىڭ بارلىعى دا اگراريلەردىڭ قاجىرلى قايراتى مەن ەڭبەگىنىڭ ارقاسى.

كەزدەسۋ بارىسىندا ا.مىرزاحمەتوۆ جاڭا باعدارلامانىڭ ماقساتى مەن مىندەتتەرىن تارقاتىپ ايتتى.

ءوز كەزەگىندە، مينيسترلىك اۋىل شارۋاشىلىعى سالاسىن زەرتتەپ، زەردەلەي كەلە، مال شارۋاشىلىعى مەن بالىق، قۇس ەتى، شۇجىق، ىرىمشىك، سۇزبە، ماي ءوندىرىسىنىڭ تومەن دەڭگەيدە ەكەندىگىن جانە سىرتتان تاسىمالداناتىنىن انىقتادى (33%-تەن 67%-عا دەيىن).

مۇنىڭ وزىندە، قوي، سيىر ەتى جەتكىلىكتى دارەجەدە وندىرىلەتىنى جانە ەكسپورتتىق الەۋەتكە يە ەكەندىگى انىقتالدى.

وسىمدىك شارۋاشىلىعىندا ماكارون، وسىمدىك مايى، كوكەنىستىك كونسەرۆىلەر مەن قانتتىڭ باسىم بولىگىنىڭ سىرتتان يمپورتتالاتىنى بەلگىلى.

«تالداۋ بارىسىندا ءبىز قازاقستاننىڭ بيدايدى ارتىعىمەن وندىرەتىنىن، سونداي-اق، جەم، ارپا، قۇس ەتىنىڭ جەتىسپەيتىنىن دە انىقتادىق. ەت، ءسۇت، كوكەنىستەردى قايتا وڭدەۋ جانە سيىر مەن قوي ەتى ەكسپورتىنىڭ تومەن دەڭگەيدە ەكەنى انىقتالدى»، – دەدى مينيستر.

بۇدان بولەك، ا.مىرزاحمەتوۆ اتالىپ وتكەن ماسەلەلەردىڭ سىرتقى ساۋداداعى ايىرماعا كەرى اسەر ەتكەنىن اتاپ ءوتتى (اۋىل شارۋاشىلىعى ونىمدەرى 2015 جىلى – 2،1 ملرد. دوللار، يمپورتى – 3،4 ملرد. دوللار).

مەملەكەتتىك باعدارلامانىڭ تاعى ءبىر مىندەتىنىڭ ءبىرى – اۋىل تۇرعىندارىنىڭ تابىسىن ارتتىرىپ، نارىققا قاجەتتى باسەكەگە قابىلەتتى اوك ونىمدەرىنىڭ ءوندىرىسىن قامتاماسىز ەتۋ.

ازىرلەنىپ جاتقان مەملەكەتتىك باعدارلامانىڭ نەگىزگى مىندەتتەرى: مال شارۋاشىلىعىنىڭ تيىمدىلىگىن 58%-عا جانە وسىمدىك شارۋاشىلىعىنىڭ تيىمدىلىگىن 40%-عا ارتتىرۋ، تاۋارلى وندىرىسكە 670 مىڭ ۇساق ءوندىرۋشىنى تارتۋ جانە ونىمدەردى وتكىزۋ مەن وڭدەۋدىڭ پارمەندى جۇيەسىن قۇرۋ ءۇشىن اۋقىمدى اۋىل شارۋاشىلىعى كووپەراسيالارىن دامىتۋ، ءاشتو-نى بارىنشا قامتي وتىرىپ، مەملەكەتتىك قولداۋدىڭ تيىمدىلىگىن جانە قولجەتىمدىلىگىن قامتاماسىز ەتۋ، ماقساتقا باعىتتالعان ەكسپورتتىق ساياساتتى ىسكە اسىرۋ جانە ورگانيكالىق ءونىمنىڭ قازاقستاندىق برەندىن جىلجىتۋ، 600 مىڭ گا استام سۋارمالى جەردى اينالىمعا تارتۋ، اوك-نى مەملەكەتتىك رەتتەۋدى جەتىلدىرۋ بولادى.

سونىمەن قاتار، باعدارلامانى مەملەكەتتىك فورماتقا قايتا بەكىتۋ شەڭبەرىندە سۋبسيديالاۋ جۇيەسىنە ءبىرقاتار تۇزەتۋلەر ەنگىزۋ جوسپارلانعان، بۇل قازىرگىدەن دە كوپ مەملەكەتتىك قولداۋ الۋشىلاردى قامتۋعا، وسىلايشا ونىڭ تيىمدىلىگىن جوعارىلاتۋعا مۇمكىندىك بەرەدى.

وسى ورايدا، استىقتى وڭىرلەردىڭ وكىلدەرى وسىمدىك شارۋاشىلىعىنا قاتىستى اوك-تى دامىتۋ شارالارىنا باسىمىراق دەن قويدى.

بۇل رەتتە، ا.مىرزاحمەتوۆ بيدايدى قايتا ءوندىرۋدىڭ ەرەكشەلىكتەرىن ەسكەرە وتىرىپ، اۋىل شارۋاشىلىعى وندىرۋشىلەرىن ەگىس القاپتارىن ديۆەرسيفيكاسيالاۋدى جالعاستىرا بەرۋگە شاقىردى.

«بيداي القاپتارى 2،3 ملن. گا قىسقارادى. بوساتىلعان القاپتارعا ارپا، س ۇلى، جۇگەرى جانە مايلى داقىلدارى ەگىلەدى. ءبىزدىڭ تاراپىمىزدان ەگىس القاپتارى وڭىرلەر مەن داقىلدار كەسىمىندە ەسەپتەلدى»، – دەدى ول.

مال شارۋاشىلىعى سالاسىندا مال ازىعىمەن قامتاماسىز ەتۋ قاجەت. وسىعان وراي، ەلدىك ازىقتىق تەڭگەرىم ازىرلەنىپ، ەنگىزىلەتىن بولادى، ازىقتىق داقىلداردىڭ الاڭدارى ۇلعايتىلادى، قۇراما جەمدەردى ءوندىرۋ جانە تۇتىنۋ ىنتالاندىرىلادى، سونداي-اق جايىلىمداردى پايدالانۋدىڭ تيىمدىلىگىن جوعارىلاتۋ بويىنشا جۇمىس جۇرگىزىلەتىن بولادى. سونىمەن قاتار، مەملەكەتتىك قولداۋ كورسەتۋ ارقىلى اسىل تۇقىمدى جانۋارلاردىڭ ۇلەسىن جوعارىلاتۋ بويىنشا شارالار قابىلداناتىن بولادى.

اۋىل شارۋاشىلىعىن سۋمەن قامتاماسىز ەتۋ جانە سۋارمالى جەرلەردىڭ الاڭدارىن ۇلعايتۋ بويىنشا شارالاردان باسقا، قوسىمشا ەلەكتروندىق فورماتتا جەر رەسۋرستارىنىڭ جاي-كۇيى تۋرالى مالىمەتتەر قالىپتاستىرىلادى.

بۇدان باسقا، اوك-نى ينفراقۇرىمدىلىق قامتاماسىز ەتۋ ءۇشىن ءونىمدى وتكىزۋ بويىنشا اۋىلدىق كووپەراتيۆتەر قۇرۋدى ىنتالاندىرۋ، اۋىل تۇرعىندارىنا نەسيە بەرۋ جانە ولارعا سەرۆيستىك قىزمەت كورسەتۋ، سونداي-اق قارجىلىق قۇرالداردىڭ قولجەتىمدىلىگىن قامتاماسىز ەتۋ بويىنشا ءىس-شارالار ىسكە اسىرىلاتىن بولادى.
بۇگىنگى تاڭدا اگروونەركاسىپتىك كەشەندى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنىڭ تۇجىرىمداماسى حالىق تالقىسىنان وتۋدە.
ەسكە سالا كەتەيىك، اتالعان باعدارلاما تۇجىرىمداماسى ەلىمىزدىڭ باتىس وڭىرىندە، «اتامەكەن» ۇلتتىق پالاتاسى كەشەنىندە قوعامدىق كەڭەس پەن اگرارلىق ساياسات جونىندەگى كەڭەس وكىلدەرىمەن تالقىلاندى.

ق ر اشم باسپا ءسوز قىزمەتى