ورال قالاسىنىڭ تۇرعىندارىنىڭ كوپشىلىگى «241-241» تەلەفون ءنومىرىن جاتقا بىلەدى. ونىڭ ۇستىنە، «تاكسي «سity» كومپانياسىنىڭ كوشە بويىنا ىلىنگەن جارنامالارى كوكتەگى جىپىرلاعان جۇلدىزدان كەم ەمەس. قاجەت كەزىندە تەلەفون شالساڭ، جولاقىنىڭ قۇنىن ايتادى دا، دىتتەگەن جەرىڭە اپارىپ تاستايدى. «Whatsap» جەلىسى دە ونلاين-تاپسىرىستى قابىلداي بەرەدى. راس، اراسىندا دەر كەزىندە ناقتى حابارىن ايتپاي، دىڭكەڭدى قۇرتاتىنى بار. ءبىرازدان سوڭ، كومپانيا قاراۋىنداعى اۆتوكولىكتەردىڭ بوس ەمەس ەكەنىن ايتىپ sms-حابارلاما جىبەرە سالادى. ءبىزدى الاڭداتىپ وتىرعان ماسەلە – بۇل ەمەس. ايتپاعىمىز، وپەراتورلاردىڭ ىلعي دا ورىسشا ءتىل قاتاتىنى. اۆتوماتتى تۇردە ورىسشا سامبىرلاي جونەلەتىن باعدارلاما داۋسىنان كەيىن جەلىگە قوسىلعان وپەراتورعا مەكەنجايىڭدى ايتا باستاساڭ، ءۇنسىز تىڭدايدى دا، ىلە-شالا تاپسىرىستىڭ ءمان-جايىن ورىس تىلىندە قايتالاۋىڭدى وتىنەدى. امال جوق، قازەكەڭنىڭ اقكوڭىلدىلىگىنە سالىپ، ەلپ ەتە تۇسەسىڭ. كەيىنگى ۋاقىتتا كومپانيا قىزمەتكەرلەرىنەن مەملەكەتتىك تىلدە قىزمەت كورسەتۋىن تالاپ ەتە باستادىم. ولار قازاقستاندىقتارعا «تۇسىنىكتى» تىلدە سويلەۋىمدى ءوتىنىپ، تەلەفون تۇتقاسىن قويا سالاتىن بولدى. بىردە تۇنگى مەزگىلدە تەمىر جول بەكەتىنە سۋىت بارۋ كەرەك بولعان سوڭ، ادەتتەگىدەي ۇيالى تەلەفونىمنان «241-241» ءنومىرىن تەردىم، مەنىڭ «قيسىق-قىڭىر» سويلەگەنىمنەن شوشىدى ما، بىردەن قازاق ءتىلدى وپەراتورعا جەلىنى باعىتتايتىندارىن ايتتى. سارىلا كۇتكەنىممەن، تەلەفون تۇتقاسىن ەشكىم «كوتەرمەدى». بىرنەشە مارتە دىڭىلداي بارعان دىبىس ءۇنسىز قالدى. ءسىرا، وپەراتورىمىز «ۇيقىسىن قيماسا» كەرەك.
ءتىل ماسەلەسىنە بەي-جاي قاراي الماعان سوڭ، ورال قالاسىنداعى كومپانيا كەڭسەسىنە بارۋعا بەل بايلادىم. «جولى بولار جىگىتتىڭ...» دەمەكشى، «تاكسي «سity» كومپانياسىنىڭ باس ديرەكتورى ءمادي قىزدارقۇلوۆتىڭ تۋرا وزىنە جولىعۋدىڭ ءساتى ءتۇستى. تەلەفون شالعاندا كومپانيا قىزمەتكەرلەرىنىڭ قازاق تىلىندە دۇرىس جاۋاپ بەرمەيتىنىن، مۇنىڭ ماڭىزدى ماسەلە ەكەنىن العا تارتا سويلەدىم. مەنىڭ «ىلىك ىزدەپ» باستىرمالاتا جونەلگەنىمە شامدانسا كەرەك: «ءياا... سوندا... ورىس ءتىلىنىڭ «مارتەبەسىن» قايدا ىسىرىپ قويامىز؟» – دەدى بىردەن زور دەنەلى جىگىت اعاسى قاراتورى وڭىنەن مىسقىل تابى ويناپ. «ءتىل تۋرالى» ق ر زاڭىنداعى اتىشۋلى باپتىڭ نەگىزگى ءمانىن تاپتىشتەپ ءتۇسىندىرىپ، وزىمشە ءۋاج ايتتىم.
– ءبىزدىڭ كومپانيانىڭ قىزمەت ەتىپ جاتقانىنا بەس جىلعا جۋىقتادى. باسىندا وپەراتورلار اراسىندا بىردە-بىر قازاق مامانى بولعان جوق. قازىرگى ۋاقىتتا ءار اۋىسىمدا بىر-ەكى قازاق ءتىلدى وپەراتور وتىرادى. كوبىنە ولاردىڭ جاۋاپ بەرۋگە قولدارى بوساماي جاتادى. نەگىزگى جۇمىس كەڭسەلەرىمىز پەتروپاۆل مەن كوكشەتاۋ قالالارىندا ورنالاسقان. سولتۇستىك ايماق تۇرعىندارى ورىس ءتىلدى بولىپ كەلەتىنىن بىلەسىزدەر. ونىڭ ۇستىنە، كومپانيا تاكسي جۇيەسىن باسقارۋعا رەسەيلىك باعدارلامانى پايدالانادى. قازاق ءتىلدى ماماندار قاجەت ەكەنىن جاسىرمايمىز. بۇل ماسەلەنى شەشۋ باعىتىندا جۇمىستانۋدامىز. قىزمەتكەرلەرىمىزدى قازاق ءتىلىن تەگىن وقىتاتىن كۋرستارعا جىبەرىپ تۇرامىز. ورال قالاسىنىڭ وزىنەن تاۋلىگىنە ون مىڭنان استام تۇرعىن حابارلاسادى. ونىڭ ەكى-ۇش پايىزى عانا قازاق ءتىلدى وپەراتورعا جەلىنى قوسۋدى سۇرايدى. مەملەكەتتىك قىزمەتكەر بولماعان سوڭ، نەگىزىنەن، قازاق تىلىندە جاۋاپ بەرۋگە مىندەتتى ەمەسپىز، – دەدى ءمادي قىزدارقۇلوۆ.
«راسىمەن دە، ورىسشا سويلەۋگە ءوزىمىز قۇمار ەمەسپىز بە؟» كەڭسەدەن وسى ويدىڭ جەتەگىمەن شىقتىم. كەيىن تۇرعىندارعا ساۋال قويىپ ەدىم. ءبىر قارىنداس اسىعىس: «وپەراتورلارمەن ورىس تىلىندە سويلەسۋ ەش قيىندىق تۋىندامايدى، وزىمە قولايلى» دەي سالدى (ساناسى سونداي!).
– ەگەمەن ەل بولعاننان كەيىن مەملەكەتتىك ءتىل مۇددەسى باستى ورىندا تۇرۋى كەرەك. رەسمي شارالاردىڭ كوبى ورىس تىلىندە وتەدى. الدىمەن ۇكىمەت باسىنداعى شەنەۋنىكەر قازاق تىلىندە سويلەپ، ۇلگى كورسەتسىن! ونىڭ قاسىندا، سەن تاكسي كومپانياسىنىڭ قىزمەت ءتىلى جونىندە نەسىنە سۇرايسىڭ؟! – دەدى وزىمە «دۇرسە قويا بەرگەن» قالا تۇرعىنى يوسەف مۇحامبەتجانوۆ. تۇتىقتىم دا قالدىم... زەينەتكەردىڭ ايتقانى ورىندى-اق!
