تاۋلى ايماق - تۇلكىباستا المانىڭ «اپورت» سورتىن ءوسىرىپ جۇرگەن شارۋاشىلىقتاردىڭ سانى ارتىپ كەلەدى. بۇگىنگى تاڭدا اۋدان كولەمىندە اپورت الماسىن وسىرەتىن القاپتاردىڭ كولەمى 200 گەكتارعا جەتتى.

اپورت الماسىن ءوسىرۋدى اۋدانداعى «كوكتال»، «ارشا»  شارۋاشىلىقتارى قولعا الىپ، جىل سايىن جاڭا باۋلار وتىرعىزۋدا. ساتىلىمدا سۇرانىسقا يە اپورت الماسىن ەگۋگە باسقا دا شارۋاشىلىقتار قىزىعۋشىلىق تانىتىپ وتىر. جالپىلاي ايتقاندا، اۋدانداعى ءىرىلى-ۇساقتى 20 شاقتى شارۋاشىلىق جەڭسىك جەمىس ءتۇرىن باپتاۋمەن اينالىسۋدا. دەگەنمەن، باعباندار، ازىرگە، ءونىم العان جوق. ويتكەنى، جەمىستىڭ بۇل سۇرىپى ءونىمدى 7-8 جىلدان سوڭ بەرەدى. ال تۇلكىباستىق اپورتتاردىڭ ءوسىرىلىپ جاتقانىنا 3 جىلدان ەندى استى.

ايتا كەتەيىك، جەمىسى ءىرى كەلەتىن ءبىر المانىڭ سالماعى 500-600 گرامعا دەيىن جەتەدى. ال ءتۇسى القىزىل بولىپ كەلەدى. بۇل سورتتىڭ جەمىسى قىركۇيەك ايىندا پىسەدى، قاڭتار اقپان ايلارىنا دەيىن ەركىن ساقتاۋعا بولادى.

ەسكە سالايىق، تۇلكىباس اۋدانى كەزىندە المانىڭ «اپورت» سۇرىپىن وسىرۋمەن اتى شىققانى بەلگىلى. ويتكەنى، جەمىستىڭ بۇل سورتىن ءوسىرۋ ءۇشىن تاڭدالىپ الىنعان جەر القابى تەڭىز دەڭگەيىنەن 900 مەتردەن جوعارى بيىكتىكتە بولۋى شارت. ال، تۇلكىباس اۋدانى وسىنداي ايماقتا ورنالاسقان ءوڭىر.