وڭتۇستىك قازاقستان وبلىسى، سارىاعاش اۋدانىندا بۇگىندە 1891 گەكتار ءجۇزىم القابى بار. ونىڭ ءونىم بەرەتىن 1648 گەكتارىنان شارۋالار بيىل 13184 توننا ءونىم الىپ وتىر. بيىلعى ورتاشا ونىمدىلىك گەكتارىنا 80 سەنتنەردى قۇراعان، دەپ حابارلايدى وقو اكىمدىگىنىڭ باسپا ءسوز قىزمەتى.

جينالعان ءجۇزىمنىڭ 4 313 تونناسى اسحانالىق بولسا، 8871 تونناسى تەحنيكالىق سورتتار. بيىل جىلداعىدان مول ءونىم الىپ وتىرعاندىعىن ايتقان ديقاندار جينالعان 8871 توننا تەحنيكالىق ءجۇزىم سورتىن اۋدانداعى «Caspian Food» جشس-گى مەن «سەميرەچە» ءجشس-نىڭ شاراپ زاۋىتتارىنا وتكىزگەنىن ايتۋدا. ال قالعان ءونىم ىشكى نارىققا جانە ەلىمىزدىڭ باسقا وبلىستارى مەن 500 تونناسى رەسەي فەدەراسياسىنا جونەلتىلگەن.

وتكەن جىلى 1648 گا ءجۇزىم القابىنان 13 مىڭ توننا ءونىم الىندى. ورتاشا ونىمدىلىك 79،2 سن/گا بولعان.

ايتا كەتەيىك، وڭتۇستىك قازاقستاننىڭ تاعى ءبىر اۋدانى  تۇلكىباستا المانىڭ «اپورت» سورتىن ءوسىرىپ جۇرگەن شارۋاشىلىقتاردىڭ سانى ارتىپ كەلەدى. بۇگىنگى تاڭدا اۋدان كولەمىندە اپورت الماسىن وسىرەتىن القاپتاردىڭ كولەمى 200 گەكتارعا جەتكەن. اپورت الماسىن ءوسىرۋدى اۋدانداعى «كوكتال»، «ارشا» شارۋاشىلىقتارى قولعا الىپ، جىل سايىن جاڭا باۋلار وتىرعىزۋدا. ساتىلىمدا سۇرانىسقا يە اپورت الماسىن ەگۋگە باسقا دا شارۋاشىلىقتار قىزىعۋشىلىق تانىتىپ وتىر. جالپىلاي ايتقاندا، اۋدانداعى ءىرىلى-ۇساقتى 20 شاقتى شارۋاشىلىق جەڭسىك جەمىس ءتۇرىن باپتاۋمەن اينالىسۋدا.