وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ جۇمىس ساپارىمەن سايرام اۋدانىندا بولىپ، ءبىرقاتار شارۋاشىلىقتاردىڭ جۇمىسىمەن تانىستى، دەپ حابارلايدى وبلىس اكىمدىگىنگىڭ باسپا ءسوز قىزمەتى.

 ەڭ الدىمەن، اكىم اۋداننىڭ قايناربۇلاق اۋىلدىق وكرۋگىندەگى «قايىپ-اتا» جشس-نە بارىپ، ەت كومبيناتىن ارالادى. ەت ءوندىرىپ، ونى بۋىپ-تۇيۋمەن اينالىساتىن سەرىكتەستىكتە 30 ادام جۇمىسپەن قامتىلعان. جىلىنا 320 توننا ەت وڭدەۋگە قاۋقارلى كومبيناتتا تاۋلىگىنە 300 باس ءىرى قارا سويىلادى. قوجالىق باسشىلىعى كەلەسى جىلى كاسىپورىندى كەڭەيتىپ، ەت وڭدەيتىن قۇرال-جابدىقتار قويۋ ارقىلى شۇجىق ونىمدەرىن شىعارۋدى جوسپارلاپ وتىر. شارۋاشىلىقتىڭ ءمان-جايىنا قانىق بولعان تۇيمەبايەۆ سايرامعا جاقىن اۋدانداردا بورداقىلانعان ءتورت تۇلىكتى اتالعان ەت كومبيناتىندا سويىپ، جۇمىستى ورتالىقتاندىرۋ تۋرالى تاپسىرما بەردى. ايتا كەتەيىك، «قايىپ اتا» ءجشس-ى مال بورداقىلاۋ الاڭى رەتىندە 2011 جىلى قازىعۇرت اۋدانىنان اشىلعان شارۋاشىلىق. باستاپقىدا 1 مىڭ باس ءىرى قارانى بورداقىلاعان قوجالىقتا بۇگىنگى تاڭدا 3 مىڭ باستان استام مال بار. قىس مەزگىلىنە دەيىن مۇنداعى ءىرى قارانىڭ باسىن 5 مىڭعا جەتكىزۋ جوسپارلانىپ وتىر. مۇنان سوڭ، ءوڭىر باسشىسى ايتەكە بي اۋىلىنداعى «Dala-frut.kz» ءجشس-نىڭ (Green Land) جەمىس باۋىن تاماشالادى. 100 گەكتاردان استام جەرگە ءۇش جىلدان بەرى الما جانە قارا ورىك جەمىستەرىنىڭ كوشەتتەرى ەگىلگەن. باققا زاماناۋي قۇرال-جابدىقتارمەن جابدىقتالعان تامشىلاتىپ سۋعارۋ ءادىسى جانە شپالەرلى جۇيە قولدانىلۋدا. كاسىپورىن بۇگىنگى تاڭدا 1 گا جەر تەلىمىندە «زاماناۋي تەحنولوگيالى سىيىمدىلىعى 10 مىڭ تونناعا دەيىن كوكونىس جانە جەمىس-جيدەك ساقتايتىن قويما» جوباسىنىڭ قۇرىلىسىن باستادى.